Akakite mai no runga i toou tamarikianga.

Anauia au i Itaria i te mataiti 1943. Utuutuia au ma toku nga tuakana, toku teina e te au tuaine i tetai oire meangiti, e kua angaanga toku papa ei tangata tanutanu e te kamuta. Kua utuutu toku nga metua ia matou kia riro mai ei au mema tumu no te akonoanga Katorika.

Eaa koe i inangaro ei kia riro mai ei orometua?

I toku tamarikianga, e reka ana au i te akarongo ki te au orometua i roto i te are pure. Umere tikai au i to ratou reo, e pera katoa te au peu akonoanga. No reira i roto i toku ngakau, inangaro au kia riro mai ei orometua. E 13 oku mataiti, kua tono toku mama iaku ki tetai apii tei akapapa i te tamariki tamaroa kia aere ki te apii teitei a te tuatau ki mua no te riro mai anga ei orometua.

Kua ō mai ainei te apii Pipiria i roto i taau terenianga?

Kare i te apii Pipiria tikai. E 15 oku mataiti, kua oake toku puapii i tetai kopi no te au Evangelia​—e papaanga tuatua enua no te oraanga e te angaanga tutu aere o Iesu​—e kua tatau putuputu au i teia puka. E 18 oku mataiti, kua aere au ki te apii teitei no te au orometua i Roma, tei raro i te mana akaaere a te pope. Apii au i te reo Ratini e te Ereni, te tuatua enua, te kite tangata, te tu e te manako tangata, e no runga i te au akonoanga. Noatu kua taiku matou i te au irava mei roto i te Pipiria e kua akarongo ki te tatauanga Pipiria i te akoanga Tapati, kare matou i apii tikai i te Pipiria.

Te riro anga mai koe ei orometua maata. Kua apii ainei koe i etai ke?

Taku angaanga, ko te akaaere i te apii. Noatu ra kua apii au i te au pupu apii no runga i te au ture a te Second Vatican Council.

Eaa koe i akamata ai i te ekoko i te akonoanga?

E toru apinga tei tamanata iaku. Kua ō atu te akonoanga ki roto i te angaanga poritiki. Kua akatikaia te angaanga tau kore a te au orometua e te au mema. E i te akara anga, kare e tika ana tetai au apiianga Katorika. Ei akaraanga, eaa te tumu ka akautunga ai tetai Atua aroa i te tangata e tuatau ua atu me mate ratou? Pera katoa, ka inangaro ainei te Atua kia taokioki ua te pure e anere ua atu taime ma te taangaanga i te ‘ei pupu rotario? *

Eaa taau i rave?

Ma toku roimata e pururu ra, kua pure au no te tauturu. Oko katoa au i tetai Pipiria Katorika te Jerusalem Bible, koi neneiia i te reo Itaria, e kua akamata au i te tatau i te reira. E oti, i tetai popongi Tapati te tauraki ra au i toku kakau orometua i muri ake i te Oroa, kua aere mai tetai nga tangata ki te apii tereni orometua. Akakite mai raua e e nga Kite raua no Iehova. Kua pukapuka matou tere atu i te tai ora no runga i te Pipiria e te au akairo tei akataka mai i te akonoanga mou.

Eaa toou manako i teia nga tangata?

Poitirere tikai au i to raua tu manako papu e pera katoa e māmā ua ia raua i te taiku i te au irava i roto i te Pipiria Katorika. Muri mai, kua atoro mai tetai Kite ko Mario tona ingoa, iaku. E tangata akakoromakianga roa e te tiratiratu​—i te au popongi Maanakai ravarai, noatu ka topa te ua e ka iti te rā, ka akatangi aia i te oe o te apii orometua i te ora iva no ta maua apii Pipiria.

Eaa ta te au orometua i manako no runga i teia au atoroanga?

Kua pati au ia ratou e noo kapiti mai ki te au uriurianga, kare ra tetai ia ratou i inangaro i te apii i te Pipiria. Ko au ra, reka tikai au i te reira. Te apii ra au i te au mea umere tikai, ei akaraanga, te tumu i akatika ai te Atua kia tupu te mamae e te kino​—tetai apinga e ngata tikai iaku te mārama.

Kua tauta ainei toou au akaaere i te arai i taau apii Pipiria?

I te mataiti 1975, kua tere putuputu au ki Roma no te akamārama i toku manako. Kua tauta toku au akaaere i te taui i toku aerenga manako, kare ra okotai i taangaanga ana i te Pipiria. I te openga, ia Tianuare 9, 1976, kua tata au ki Roma i te karanga e kare au ei mema akaou no te akonoanga Katorika. E rua rā i muri mai, kua akaruke au i te apii tereni orometua e kua na runga i te rerue ki taku uipaanga mua a te Au Kite o Iehova, e akaputuputuanga na ratou e uipa ana te au putuputuanga e manganui. E tuke takiri te reira ki taku i matau! E Pipiria ta te Au Kite tataki tai e kua aru ratou i te vaa tuatua i te uriuri anga i te au tumu manako tukeke.

Eaa ta te ngutuare tangata i manako no runga i teia?

Te maataanga ia ratou, kua patoi pakari iaku. Inara, kite mai au e te apii ra toku teina ma te Au Kite i Lombardy, e ngai i te tua tokerau o Itaria. Kua atoro au iaia, e kua tauturuia au e te Au Kite e noo ana i reira kia kimi i tetai ngai angaanga e te ngai nooanga. I taua mataiti rai, kua papetitoia au ei Kite no Iehova.

Kua tataraapa ainei koe?

Kare rava! I teia taime tikai, kua piri vaitata au ki te Atua, no te mea kua akatumuia taku i kite no runga iaia ki runga i te Pipiria, kare i te kite tangata me kore te au peu akonoanga. Pera katoa, ka rauka iaku te apii i tetai ke ma te tu papu e te ngakau tae.