Akamaroiroi Maata Mei te Reta Meangiti Poepoe Reo Epera
Ka papu ainei ia tatou e ka tupu pouroa te au taputou a te Atua? Kua irinaki papu a Iesu i teia e kua akamaroiroi katoa aia i te akarongo o te tangata na roto i tana apiianga. Akamanako ana i te akatutuanga tana i oronga i roto i tana Ako i te Maunga i roto ia Mataio 5:18: “Koia tika taku e karanga atu kia kotou nei, E kore ake te rangi e te enua, i tetai iota e tetai vaʼi mea ngiti poepoe o te ture nei, kare ïa e kore, e ope takiri ïa i te tupu.”
Te reta meangiti poepoe o te ara reta Epera e י (yod), koia te reta mua o te Tetragrammaton, te ingoa tapu o te Atua ko Iehova. * Pera katoa te au tuatua e te au reta o te Ture a te Atua koia “tetai vaʼi mea ngiti poepoe,” e mea puapinga tikai ki te au tata tuatua e te au Pharisea.
Te karanga nei a Iesu e mea papu ake ka kore te rangi e te enua e kare tetai tuatua rikiriki o te Ture e akatupuia. Inara te akapapu maira te Tuatua Tapu e ka vai ua rai te rangi e te enua e tuatau ua atu. (Salamo 78:69) No reira te akaari maira teia tuatua umere e kare tetai ua atu mea rikiriki o te Ture e kore ei e tupu.
Te manako ra ainei te Atua ko Iehova i te au mea rikiriki? Ae. Akamanako ana i teia: Kua akaueia to Iseraela i taito, auraka kia aati i tetai ivi o te mamoe Pasa. (Exodo 12:46) Penei e akakite anga rikiriki ua teia. Kua mārama ainei ratou i te tumu, auraka kia aati i te ivi? Kare paa. Inara, kua kite te Atua ko Iehova e kua totou teia mea rikiriki e kare rava tetai ivi o te Mesia e aatiia me tamateia aia ki runga i te rakau tamamae.—Salamo 34:20; Ioane 19:31-33, 36.
Eaa ta Iesu e apii maira ia tatou? Ka papu tikai ia tatou e ka tupu pouroa te au taputou a te Atua ko Iehova e tae ua atu ki te mea rikiriki. E akamaroiroi maata mei te reta meangiti poepoe reo Epera!
^ para. 3 Te reta meangiti poepoe o te ara reta Ereni e iota e kua vaitata ki te reta Epera י (yod). I te mea e kua tata muaia e kua tukuia mai te Ture a Mose i te reo Epera, penei te taiku ra a Iesu i te reta Epera.