TUKEKE te manako no te ora e te mate. Manako tetai pae e me mate ratou, ka ora ua atu rai ei mea ora i tetai ngai ke. Tetai papaki, irinaki ratou e ka anau akaou ma te oraanga tukeke. E tetai pae, manako ratou e ko te mate te openga.

Penei e tuke toou irinaki anga no runga i teia, kia tau ki toou tupuanga e te ngai i utuutuia koe. No te mea e tuke takiri te au manako no runga i te mate, ka aere tatou kiea no te pauanga meitaki e te tika ki teia uianga ngata?

No te anere mataiti, kua apii te au arataki akonoanga i te turanga mate kore o te vaerua tangata. Vaitata rai pouroa te au akonoanga—Kerititiano, Hindu, te ngati Iuda, te Muslim, e te vai atura—irinaki ratou i te vaerua mate kore, tei karangaia ka ora ua atu rai me mate te kopapa e ka noo i te ao vaerua. I tetai tua, irinaki te akonoanga Buda e ka anau akaou tei mate e ka taeria te mana e te ririnui i roto i tetai tangata ki te turanga aite kore tei kapikiia e Nirvana.

No teia au apiianga, kua irinaki te manganui i teianei ao e na te mate e akatuera i te ngutupa ki te ora i te ao ke. No reira, manako te manganui e takainga puapinga te mate i roto i te aerenga o te oraanga, e e tuanga ïa no te anoano o te Atua. Inara eaa ta te Pipiria e karanga ra no teia? Me ka tika e tatau i te atikara ka aru mai. Ka poitirere koe.