TUMU MANAKO I TE KAPI MUA | KA RAUKA IA KOE TE MĀRAMA I TE PIPIRIA
Eaa Koe ka Mārama ai i te Pipiria?
“E puka rongonui te Pipiria. Inara e puka tuke ake rai teia e kare e tau ki te iti tangata Tinito.”—LIN, TINITO.
“Kare au e mārama ana i te au puka tapu o taku akonoanga Hindu. No reira akapeea au e mārama ai i te Pipiria Tapu?”—AMIT, INITIA.
“E akangateitei ana au i te Pipiria ei puka taito e kua rongo au e puka oko maataia te reira. Inara kare au i kite ake i tetai kopi.”—YUMIKO, TIAPANI.
E manganui te tangata i te ao katoa tei akangateitei tikai i te Pipiria. Inara penei e meangiti ua ta ratou i kite no runga i te akapapaanga Pipiria. E tika rai te reira no te mirioni ua atu e noo ra i Asia, inara e tika katoa te reira i roto i te au enua te tuʼa maataia ra te Pipiria.
Inara, penei ka ui koe, ‘Eaa ra au ka inangaro ei kia mārama i te Pipiria?’ Na te mārama anga i teia puka tapu e tauturu ia koe kia rave i te ka aru mai:
-
Rauka te oraanga merengo e te mataora
-
Akono i te au manamanata o te ngutuare
-
Akakoromaki i te au taitaia
-
Akameitaki atu i te pirianga tangata
-
Akaaere meitaki i te moni
Ei akaraanga, akamanako ana ia Yoshiko, i Tiapani. Kua manako aia eaa ra to roto i te Pipiria e kua tatau i te reira. Eaa tei tupu? “Kua tauturu te Pipiria iaku kia kite i te akakoroanga no te oraanga e te manakonakoanga no te tuatau ki mua,” i nana ai, karanga katoa aia: “I teianei kare au e maromaroa akaou ana.” Ko Amit, tei taikuia i mua ake nei, kua manako aia i te akara matatio i te Pipiria. “Kua umere au,” i nana ai. “Kua ki te Pipiria i te au akakiteanga tau meitaki no te katoatoa.”
Kua akakeu te Pipiria i te mirioni ua atu tangata. Eaa ka kore ei e akara matatio i te reira noou uaorai kia kite akapeea te reira te akapuapinga anga ia koe?
