Kua tuatua ana te Atua ki te au tangata. Kua taangaanga aia i tona vaerua tapu, tona mana angaanga, kia akauruia tona manako ki roto i te au manako o te aronga tata Pipiria. (2 Petero 1:20, 21) Ka rauka ia tatou kia kite i te tuatua mou no runga i te Atua na te tatauanga i te Pipiria.​—E tatau ia Ioane 17:17; 2 Timoteo 3:16.

I roto i te Pipiria, kua akaari mai te Atua i te au mea no runga iaia uaorai. Akakite katoa aia e no teaa ra aia i anga ai i te oraanga tangata, e eaa tana ka rave no te tangata, e eaa tana e inangaro ra ia tatou kia rave. (Angaanga 17:24-27) Ka inangaro te Atua ko Iehova ia tatou kia kite meitaki tikai i te tuatua mou no runga iaia.​—E tatau ia 1 Timoteo 2:3, 4.

Ko Iehova te Atua o te tuatua mou, e kua tono mai i tana Tamaiti ko Iesu ei apii i te tuatua mou ki te tangata. No reira, kua akavaitata mai te aronga inangaro i te tuatua mou kia Iesu. (Ioane 18:37) Ka inangaro te Atua i te aronga mei teia te tu kia akamori iaia.​—E tatau ia Ioane 4:23, 24.

Kua akaanga ke te Tiaporo ko Satani i te manganui o te tangata mei te Atua na te akavare anga ia ratou ki te apiianga pikikaa no te Atua. (2 Korinetia 4:3, 4) Ko te aronga kare e inangaro i te mea meitaki, kua akavareia e te au apiianga pikikaa. (Roma 1:25) Inara e mirioni ua atu tangata meitaki tei kimi i te tuatua mou no runga i te Atua na te apiianga i te Pipiria.​—E tatau ia Angaanga 17:11.