Eaa te au ravenga te ka tauturu ia koe kia mataora i taau tatau anga Pipiria e kia puapingaia? E akamanako ana e rima ravenga tei tauturu i te manganui.

Kimi i te ngai tau meitaki. E tauta i te kimi i tetai ngai muteki ua. Akaiti mai i te au manamanata kia rauka ia koe i te akamou ki runga i taau e tatau ra. Penei ka tauturu te ngai mārama e te reva ou ia koe kia puapingaia mei taau tatau anga.

Akatupu i te manako tau. I te mea e no ko mai te Pipiria i to tatou Metua i te ao ra, ka puapinga maataia koe me akatupu i te tu o tetai tamaiti tei papa ua i te apii mei tona metua aroa. Me e manako tarevake toou no runga i te Pipiria me kore e ngai ke toou manako, tauta i te akaatea i te reira e rauka ai i te Atua i te apii ia koe.—Salamo 25:4.

Pure i mua ake ka tatau ei. Tei roto i te Pipiria te au manako o te Atua, no reira kare i te mea poitirere e ka anoanoia tana tauturu kia mārama i te reira. Te taputou nei te Atua kia oronga i ‘te vaerua tapu i te aronga e pati atu aia ra.’ (Luka 11:13) Ka tauturu te vaerua tapu ia koe kia mārama i to te Atua au manako. I te tuatau ka aereia, ka akatuera te reira i toou manako kia mārama i “te au mea oonu rai o te Atua.”—1 Korinetia 2:10.

Tatau kia mārama. Auraka e tatau kia kapi ua te au manako. Mari ra, e akamanako oonu i taau e tatau ra. E ui kia koe uaorai i teia au uianga: ‘Eaa te au tu taku e kite ra me tatau no runga i teia tangata? Akapeea au te taangaanga anga i teia i toku oraanga?’

Akanoo i te au akakoroanga taka meitaki. Kia rauka te akameitakianga me tatau i te Pipiria, e akakoro kia apii i tetai mea te ka akameitaki atu i toou oraanga. Penei ka akanoo koe i teia au akakoroanga: ‘Ka inangaro au kia apii maata atu no runga i te Atua.’ ‘Ka inangaro au kia riro ei tangata meitaki, ei tane me kore ei vaine meitaki.’ E oti i reira e iki i te au tuanga o te Pipiria te ka tauturu ia koe kia itae i teia au akakoroanga. *

Ka tauturu teia au ravenga e rima ia koe kia akamata. Inara akapeea koe me akariro i taau tatau anga ei mea mataora? Ka oronga mai te atikara e aru maira i te tauturu.