Kare te Pipiria i te puka noa ua nei. Te oronga maira te reira i te akoanga no ko mai i Tei Anga ia tatou. (2 Timoteo 3:16) Ka riro tana karere ei akakeu tikai ia tatou. Te tika, te akakite ra te Pipiria: “E mea ora oki te tuatua a te Atua, e te ririnui.” (Ebera 4:12) E mana ririnui to te reira i te taui i to tatou oraanga na roto i teia nga mataara puapinga e rua—te oronga i te aratakianga i roto i te oraanga i te au rā ravarai e te tauturu ia tatou kia kite i te Atua e tana au taputou.—1 Timoteo 4:8; Iakobo 4:8.

Akameitaki atu i toou oraanga i teianei. Ka tauturu te Pipiria i to tatou oraanga tikai. Te oronga maira i te akoanga tau meitaki no teia au mea.

•   Au pirianga ki tetai ke.​—Ephesia 4:31, 32; 5:22, 25, 28, 33.

• Oraanga pae kopapa e te manako ngakau.​—Salamo 37:8; Maseli 17:22.

• Tu akono tau.​—1 Korinetia 6:9, 10.

• Turanga pae moni.​—Maseli 10:4; 28:19; Ephesia 4:28. *

Kua akaperepere maata tetai nga tokorua mapu i Asia i te akoanga a te Pipiria. Mei te maata anga o te aronga akaipoipo ou, kua ngata ia raua i te akatano ki te au tu o tetai e tetai e kia tuatua maoraora ua. Inara kua akamata raua i te taangaanga i ta raua i tatau i roto i te Pipiria. Eaa tei tupu? Karanga te tane ko Vicent e: “Ko taku i tatau i roto i te Pipiria kua tauturu iaku kia akono i te au akaaoanga i roto i to maua oraanga akaipoipo ma te aroa. Na te akono anga i ta te Pipiria kua oronga mai i te oraanga mataora no maua.” Āriki rai tana vaine ko Annalou: “Kua riro te tatauanga i te au akaraanga Pipiria ei tauturu ia maua. I teianei e mataora tikai toku e te mareka ua ra i to maua oraanga akaipoipo e to maua au akakoroanga no te oraanga.”

Kia kite i te Atua. Kapiti mai ki tana tuatua no te oraanga akaipoipo, karanga katoa a Vicent e: “Na te tatauanga i te Pipiria, kua piri vaitata tikai au kia Iehova.” Te akamou ra ta Vicent tuatua ki runga i tetai manako puapinga​—ka tauturu te Pipiria ia koe kia kite i te Atua. Me pera koe, ka puapingaia koe mei tana akoanga e pera katoa ka kite koe iaia ei oa. Ka kite katoa koe e ka oronga mai aia i te au akakiteanga no tetai tuatau meitaki ki mua, e tuatau e rekareka ai koe i te “ora mutu kore.” (1 Timoteo 6:19) Kare atu e puka mei teia te tu.

Me akamata koe i te tatau i te Pipiria e te rave tamou i te reira, ka rauka ia koe teia au akameitakianga​—te akameitaki atu i toou oraanga i teianei e te kite i te Atua. Inara, ia koe e tatau ra i te Pipiria, e mea papu e maata taau uianga. Me tupu te reira, e akamaara i te akaraanga meitaki o te tangata Etiopia tei ora ana e 2,000 mataiti i topa. E maata tana uianga no runga i te Pipiria. Te uiia anga kiaia me kua mārama aia i tana e tatau ra, kua pau mai aia: “Eaa au e kite ei, naringa e tangata te akakite mai kiaku?” * E oti kua āriki viviki aia i te tauturu no ko mai i tetai puapii Pipiria tukatau, ko Philipa, tetai o te pipi mua a Iesu. (Angaanga 8:30, 31, 34) Mei tera te tu, me ka inangaro koe kia kite maata atu no runga i te Pipiria, te pati nei matou ia koe kia akaki i te patianga i runga i te initaneti i te www.pr418.com me kore e tata atu ki te ngai nooanga tei vaitata ia koe i roto i teia makatini. Penei ka aravei katoa koe i te Au Kite o Iehova vaitata kia koe me kore e atoro i te Are Uipaanga Patireia i toou ngai. Eaa ka kore ei e rave i taau Pipiria i teia rā e kia tuku i te reira ei arataki ia koe ki te oraanga meitaki atu?