Kua kite tetai manga tamaine i te auai e aere maira mei roto i te are akatupu auai e te puena atura mei te tiaorangi te akaraanga. Karanga aia e te akakoroanga o te reira are ko te maani tiaorangi. Ka riro rai teia mārama kore anga a te tamaine ei katakata anga. Inara, ka riro tetai mārama kore anga maata ei takino i to tatou oraanga. Ei akaraanga, na te mārama kore anga i te tataanga i runga i te moina vairakau, ka riro ei mea kino tikai.

Ka riro katoa te mārama kore anga i te au mea pae vaerua ei mea kino pakari. Ei akaraanga, kua mārama kore tetai pae tangata i te au apiianga a Iesu. (Ioane 6:48-68) I te mea ka apii maata atu, kua kopae ratou i te au tuatua pouroa ta Iesu i apii. Mei teaa atura to ratou ngere!

E tatau ana koe i te Pipiria ei arataki ia koe? E mea meitaki tikai tena. E kino ainei tetai, penei ka mārama kore koe i taau e tatau ra? E tupu ua ana te reira ki te tangata. Ka akamanako ana e toru manako tei mārama koreia.

• Mārama kore tetai pae tangata i te akaueanga Pipiria “ko te Atua te mataku atu.” Manako ua ratou e kia mataku rikarikaia te Atua. (Koheleta 12:13) Inara kare te Atua e inangaro i te aronga e akamori ra iaia kia manako akapera. Karanga aia: “Auraka e mataku, te vaitata katoao au ia koe: auraka e taitaia, ko au oki toou Atua: e akamaroiroi au ia koe; koia ïa, e tauturu au ia koe.” (Isaia 41:10) Te aiteanga o te mataku i te Atua koia oki te manako meitaki e te akangateitei tikai iaia.

• Kua mārama kore tetai pae tangata i te au tuatua akauruia: “E atianga to te au mea katoa nei, . . . E tuatau to te anau, e e tuatau to te mate.” Karanga ratou kua manako takere te Atua i te tuatau tikai e mate ei te tangata tataki tai. (Koheleta 3:1, 2) Inara, te tuatua ra te reira irava no runga i te aerenga o te oraanga e ko te mate to tatou openga. Te apii katoa maira te Tuatua a te Atua e ka riro ta tatou uaorai ikianga ei akakeu i to tatou oraanga. Ei akaraanga, ka tatau tatou: “Tei te mataku ia Iehova e roaʼi to te tangata nei puke rā.” (Maseli 10:27; Salamo 90:10; Isaia 55:3) Akapeea ra? Ei akaraanga, na te akangateitei anga i te Tuatua a te Atua, ka akakeu ia tatou kia kopae i te angaanga tau kore mei te kona kava e te ainga tau kore.​—1 Korinetia 6:9, 10.

• Te manako ra tetai pae e te tuatua tikai ra te Pipiria no te rangi e te enua e vai nei “te tāpuia nei ïa . . . no te ai,” e te manako ra ratou e ka takore te Atua i teia paraneta. (2 Petero 3:7) Inara kua taputou mai te Atua e kare rava aia e akatika i te enua nei kia takoreia. Na te Atua i “akamou i te tumu o te enua, kia kore roa e ngaueue e tuatau ua atu.” (Salamo 104:5; Isaia 45:18) Ko te akatereanga pikikaa o teianei ao kare ko te paraneta te ka takore takiriia, mei te mea atura kua takoreia e te ai. Kareka te rangi ra, te aiteanga tika o teia tuatua, penei ko te tiao rangi, te au etu i te ao katoa e pini ua ake, me kore ko te ngai nooanga ïa o te Atua. Kare teia au mea e takoreia.

Mei taau e kite ra i roto i teia au akaraanga, putuputu te tangata i te mārama kore i te au irava ta ratou e tatau ra i roto i te Pipiria. Inara eaa te Atua ka akatika ai i te reira kia tupu? Penei ka karanga tetai pae: ‘Me e Atua kite pakari e te karape maata aia, ka oronga mai rai aia i tetai puka tei tata meitakiia kia māmā ua i te katoatoa i te mārama. Eaa aia i kore ei i rave i te reira?’ Akamanako ana e toru au tumu i mārama koreia ai te Pipiria.

1. Kua akakoroia te Pipiria kia māramaia e te aronga tei akaaka e tei inangaro i te apii. Karanga a Iesu ki tona Metua: “E akameitaki au ia koe, e taku Metua, te Atu no te rangi e te enua, i te  mea ko koe i uuna ke atu i teianei au mea i te aronga pakari e te kite, e kua akakite mai ki te tamariki nei.” (Luka 10:21) Tataia te Pipiria no te aronga tu maru anake kia mārama i tana karere. Te aronga ngakau parau​—tei matauia te “aronga pakari e te kite”​—ko ratou te mārama kore ra i te Pipiria. Te au tangata e tatau ra i te Pipiria ma te tu o “te tamariki nei”​—te akaaka ma te aruaru i te apii​—ka puapingaia mei te mārama meitaki anga i te Tuatua a te Atua. Mei teaa atura to te Atua tu karape te tata anga i te Pipiria!

2. Tau te Pipiria no te au tangata tei inangaro tikai i te tauturu a te Atua kia mārama i te reira. Kua akaari mai a Iesu e ka anoano te tangata i te tauturu kia mārama meitaki i tana i apii. Akapeea e rauka ai te reira ia ratou? Akamārama a Iesu: “Na te Akapumaana ra, na te Vaerua Tapu, ko ta te Metua e tono mai ma toku ingoa, nana e apii mai ia kotou i te au mea katoa.” (Ioane 14:26) Ka oronga mai te Atua i tona vaerua tapu​—tona mana ririnui—​ei tauturu i te tangata kia mārama i ta ratou e tatau ra i roto i te Pipiria. Inara, ka tāpu te Atua i tona vaerua mei te tangata kare e inangaro iaia kia tauturu ia ratou, no reira ka ngata rai ia ratou i te mārama i te Pipiria. Ka akakeu katoa te vaerua tapu i te au Kerititiano karape kia tauturu i te aronga e kimi ra kia mārama i te reira.​—Angaanga 8:26-35.

3. Tetai au irava Pipiria ka māramaia e te tangata i te tuatau tau i roto i te tuatua enua. Ei akaraanga, kua akakiteia ki te peroveta ko Daniela kia tata i tetai karere no te tuatau ki mua. Akakite te angera kiaia: “E Daniela, e popani i teianei au tuatua, e topiri atu i te buka e tae ua atu ki te tuatau openga ra.” I te au anere mataiti i aereia mai, e manganui te tangata tei tatau i te puka Pipiria o Daniela inara kare tikai i mārama i te reira. E tika kare rai a Daniela i mārama roa i tetai o tana i tata ki raro. Akakite aia ma te akaaka: “Te akarongo atura au, kare ra au i kite.” I muri akera, ka mārama tikai te tangata i te totou a te Atua tei tataia e Daniela, inara i te tuatau tau tei ikiia e te Atua i roto i te tuatua enua. Akamārama te angera: “Ka aere, e Daniela: kua popaniia taua tuatua nei, e kua sigiloia e tae ua atu ki te tuatau openga ra.” Koai tei mārama i te au karere a te Atua? “Kare oki tetai o te aronga kino e kite, e kite ra te aronga pakari.” (Daniela 12:4, 8-10) No reira kare te Atua e akakite i te aiteanga o tetai au irava Pipiria kia tae roa ki te tuatau tau.

Kua tupu ainei tetai akatanoanga ki te Au Kite o Iehova no tei mārama kore i te Pipiria? Ae. Inara te tae anga mai to te Atua tuatau kia akataka meitaki atu i te au tuatua, kua viviki ua te Au Kite i te akatikatika i to ratou māramaanga i te reira. Irinaki ratou e te aru ra ratou i te au apotetoro a Karaiti, tei akatanotano ma te akaaka i to ratou manako i te taime me akatikatika a Iesu ia ratou.​—Angaanga 1:6, 7.

Te au manako katakata o tetai manga tamaine no runga i te tiaorangi, penei e mārama kore anga iti ua te reira. Inara, e puapinga maata atu ta te Pipiria e apii maira kia koe. E puapinga maata roa te karere a te Pipiria no tetai ua atu kia tauta i te mārama i te reira na roto i tana uaorai tatauanga Pipiria. No reira e kimi i te tauturu kia mārama i taau e tatau ra. E kimi i te aronga tei apii i te Pipiria ma te tu akaaka, te aronga tei irinaki ki runga i te vaerua tapu o te Atua kia mārama i te Pipiria, te aronga kua papu ia ratou e te noo nei tatou i te tuatau tikai ka inangaro te Atua ia tatou kia mārama i te Pipiria. Auraka e emiemi kia tuatua ki te Au Kite o Iehova me kare kia tatau i ta ratou kimikimianga meitaki i runga i te website jw.org. Taputou mai te Pipiria: “Kia kapiki nui koe i te kite, . . . e rauka ia koe te kite i te Atua.”​—Maseli 2:3-5.