AKAMANAKO ANA: Tei roto koe i tetai are runanga apinga taito. Maataanga o te apinga kua ngaangaa, maratea e te putaputa. Tetai au pae kua pururu. Inara tetai te mako ua ra te au apinga pouroa i runga kare i kino. “E ou ake teia i te katoa anga?” i ui ei koe ki te tangata arataki i te turoto. Pau mai aia e “kare, e taito atu te reira i te maataanga, kare i akaouia ana.” “I paruruia ana teia kia kore e kino?” i ui akaou ei koe. Pau mai aia e “kare, i na roto ana teia i te au turanga kino. E e maata tei tauta ana i te takore i te reira.” Penei ka umere koe, ‘I maaniia teia ki teaa?’

I tetai tua, kua aite te Pipiria ki teia apinga taito. E puka takere—taito atu i te maataanga o te au puka. Te vai katoa atura tetai au puka takere mei te Pipiria rai. Inara mei te apinga takere rai, kua taito te au tataanga i te au tuatau i aereia mai. Ei akaraanga, ta ratou i mārama no runga i te kite taieni i mua ana, kua taui te reira no te au mea ou ta ratou i kite mai. Ta ratou ravenga rapakau maki kare i te mea meitaki. No reira te maataanga o teia au tataanga kua taito, tetai au tuanga kua ngaro, me kore kua pururu.

Inara ko te Pipiria, e tuke te reira. Kua tataia mei tetai 3,500 mataiti akenei e kare te Pipiria i taui. Noatu kua tauta ana tetai aronga i te takore, te arai e te patoi i te apiianga a te Pipiria, kua vai rai te reira e tae mai ki teia tuatau. E maata te mārama tei rauka i te tangata inara kua riro rai te au kaveinga Pipiria ei mea puapinga no tatou i teia tuatau.—Akara i te pia “Mea Taito me e Mea Puapinga?”

Penei ka manako koe e ‘E puapinga ainei te au kaveinga Pipiria no tatou i teia tuatau?’ Kia kite i te pauanga ui kia koe uaorai: ‘Eaa te au turanga ngatā e tupu nei ki te tangata? Teiea te mea kino roa atu?’ Penei ka manako koe e tamaki, kino te ao rangi, te ta tangata e te keia. Akamanako ana i tetai kaveinga a te Pipiria. Ia koe e rave ra i tera e ui kia koe uaorai, ‘Naringa te au tangata i aru i teia au kaveinga, ka meitaki atu ainei te turanga o teianei ao?’

AKATUPU I TE AU

“E ao to tei akamoeau: e karangaia ratou e tamariki na te Atua.” (Mataio 5:9) “Peneiake ko te tika, ko ta kotou ïa e aruaru e, kia noo au ua kotou i roto i te tangata katoa nei.”—Roma 12:18.

TAKINGA MEITAKI, AKAKORE I TE ARA

“E ao to tei aroa ia etai ke ra: e aroa katoaia mai ratou.” (Mataio 5:7) ‘E tauturu atu tetai ki tetai, e akakore tetai i ta tetai ara, e tapepeanga ta tetai ki tetai ra; mei ia Iehova * i akakore i ta kotou na, e akapera katoa kotou.’—Kolosa 3:13.

AU TE TANGATA

“E nana i anga i te tangata i te pa enua katoa nei i te toto okotai ra, ei noo i te pa enua katoatoa nei.” (Angaanga 17:26) “Kare te Atua e akono i te tu o te tangata. Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.”—Angaanga 10:34, 35.

AKONO I TE ENUA

“E kua rave iora te Atua ra ko Iehova i te tangata; tuku iora iaia ki roto i taua kainga i Edene ra, ei tatanu, e ei tiaki.” (Genese 2:15) Ka takore te Atua i “te aronga i mate ei to te ao ra.”—Apokalupo 11:18.

NOINOI E TE AKATURI

“E akono meitaki e e matakite ia kotou i te morimori apinga: e maata ua oki to te tangata nei apinga, kare oki tei taua apinga nona ra tona ora.” (Luka 12:15) “Kareka te akaturi, e te au tuatua viivii ravarai, e te noinoi apinga, auraka rava e akaikiia ki o kotou na, ko tei tau ïa i te aronga tapu.”—Ephesia 5:3.

AKAKITE I TE TIKA, ANGAANGA PAKARI

“Ei akono meitaki ta matou i te au mea katoa nei.” (Ebera 13:18) “Te tangata i keia na, auraka aia e keia akaou: e rave ra i te angaanga.”—Ephesia 4:28.

PUAPINGA O TE TAUTURU I ETAI KE

“E akapumaana atu i te ngakau taitaia, e tauturu atu i tei apikepike, kia roa te akakoromaki anga i te tangata ravarai.” (1 Tesalonia 5:14) “Ko te takinga-meitaki i te matiroeroe e te au vaine takaua i to ratou mate anga.”—Iakobo 1:27.

Kare te Pipiria i akakite mai te puapinga o teia au mea pouroa. Inara, oronga mai te reira i te au kaveinga e te au ravenga akapeea tatou me aru i te reira i roto i to tatou oraanga. Naringa te maataanga o te tangata e aru ana i teia au kaveinga, kare ainei e ka iti mai te manamanata o te tangata? E mea papu e puapinga te kaveinga Pipiria e ka tau no tatou i teia tuatau! Eaa ra ta te au kaveinga Pipiria ka oronga mai noou i teianei?

Karanga a Iesu: “E akatikaia ra te pakari e tana ra au tamariki.” (Mataio 11:19) Ka āriki ainei koe? E rauka ai te pakari, ka puapingaia me taangaanga koe i te reira. Akamanako ana: ‘Me e tika ta te Pipiria, kare ainei e meitaki mai toku oraanga? Peea te reira me tauturu mai iaku no toku au manamanata?’ Akamanako i teia akaraanga.

Te oraanga o Delphine, * maata te angaanga e te mataora. Inara i muri mai kua tupu te au mea taitaia. Kua mate tana tamaine. Kua akaruke raua ko tana tane akaipoipo. Maata te kaiou. Karanga aia e: “Kare oku puapinga—no te mea kua mate taku tamaine, kare aku tane, e kare oku kainga. Puapinga kore toku oraanga.”

I mua ana kare roa a Delphine i kite i te aiteanga o teia irava: “Te au rā o to matou au mataiti, e itu ïa ngauru i te mataiti; e kia tae ki te varu i te ngauru i te mataiti i te maroiroi, e riro ra taua maroiroi ra ei roiroi e ei taitaia anga; kare oki e mamia, motu ke atura, rere atura matou.”—Salamo 90:10.

Kua tatau a Delphine i te Pipiria i te kimi  pumaana. E mea umere tana i kite mai. I roto i te au atikara ka aru mai, e maata te au tangata tei puapingaia no tei aru ratou i te au kaveinga Pipiria. Kua kite mai ratou e kua aite te Pipiria mei te apinga taito rai i taikuia i runga akenei. E tuke te reira mei tetai au puka taito. Eaa te tuke i te Pipiria e tetai au puka ke? No te Atua te au manako i roto i te Pipiria, kare no te tangata.—1 Tesalonia 2:13.

Penei kua kite mai koe e poto te oraanga e te maata o te manamanata. Me tupu te manamanata kia koe, ka kimi koe te pumaana, te tauturu e te au akamaroiroianga kiea?

Ka akara tatou e toru au ravenga i puapinga ai te Pipiria i roto i to tatou oraanga. Ka akaari mai te reira akapeea koe me

1. kopae i te manamanata.

2. akaiti mai i te manamanata.

3. akakoromaki i te au turanga taitaia kare e rauka ia koe te taui.

Ka uriuri te au atikara ka aru mai i teia au manako.