AKAMANAKO ana e te aere ra koe na runga i tetai mataara i tetai aiai poiri. Noatu kua opu takere te rā, te kite ra rai koe, te mou ra koe i tetai mori pata. Me turama koe ki raro, ka kite meitaki koe i taau ngai ka takai. Me turama koe ki mua, ka kite koe i te mataara taau ka aere.

Kua aite te Pipiria mei te mori pata rai. Mei ta tatou i akara ana i roto i te au atikara o mua ake, ka rauka i te Tuatua a te Atua te tauturu ia tatou kia rauka te mārama kia kite akapeea me akono i te au manamanata i roto i teia ao kino. E maata katoa ta te Pipiria i oronga mai. Akaari mai te reira i te ka tupu a te tuatau ki mua, kia rauka ia tatou i te aru i te mataara e rauka ai te mataora e te au. (Salamo 119:105) Akapeea ra?

Akara tatou e rua ravenga e oronga maira te Pipiria i te manakonakoanga no te tuatau ki mua: 1 Oronga mai i te akakoroanga meitaki no te oraanga, e te 2 apii maira ia tatou akapeea me akatupu i tetai pirianga vaitata ki Tei Anga ia tatou.

Te oronga maira te Pipiria i te au manako meitaki ei tauturu ia tatou, e e maata atu ta tatou ka kite i roto i teia puka. Kare te reira e akamaroiroi mai ana ia tatou kia akamanako ia tatou uaorai, mari ra te apii maira te Pipiria ia tatou kia akamanako i te au mea puapinga atu. Ka rauka i reira ia tatou te mataora.

Ei akaraanga, teia kaveinga Pipiria: “E mea meitaki i te oronga atu i te rave mai.” (Angaanga 20:35) Maara ra ia koe tetai tuatau i oronga ana koe i te tauturu ki tetai ke? Penei kua oronga koe i toou taime i te akarongo i te au manako o toou taeake? Kare ainei koe i mataora no tei tauturu koe iaia?

 Ka rauka ia tatou te mataora mou me oronga tatou i te tauturu e kare e anoano i te tutaki. Karanga tetai tangata tata puka: “Kare e tano e me oronga koe i taau tauturu kare koe e mataora—noatu kare koe i anoano i te tutaki.” Me oronga tatou i te tauturu, ki te aronga tikai kare e rauka ia ratou i te tutaki ia koe—ka rauka rai ia tatou tetai tutaki. E tuanga puapinga ta tatou e rave ra. Te angaanga kapiti nei tatou ki Tei Anga ia tatou, te kite maira aia i to tatou tu e nana e tutaki mai ia tatou. (Maseli 19:17) E mea puapinga kiaia ta tatou e rave ra, taputou mai aia e ka oronga mai aia i te ora mutu kore no tatou i roto i tetai enua parataito. E manakonakoanga mou teia no te tuatau ki mua!—Salamo 37:29; Luka 14:12-14. *

Tei maata atu, akakite mai te Pipiria e ka rauka ia tatou tetai oraanga meitaki me akamori tatou i te Atua mou, ko Iehova. Akamaroiroi mai tana Tuatua kia oronga tatou i te akapaapaa, te akangateitei e te akarongo ki te Atua. (Koheleta 12:13; Apokalupo 4:11) Me pera tatou, ka rauka ia tatou tetai mea umere: Ka mataora te Atua ia tatou. Te pati maira aia: “E taku tamaiti, kia pakari koe, kia rekareka toku ngakau.” (Maseli 27:11) Akamanako ana, me rave tatou i tetai ikianga tei akatumuia ki runga i te au kaveinga Pipiria, ka akamareka tatou i to tatou Metua i te rangi. No teaa ra? No te mea te manako ra e te inangaro maira aia kia puapingaia tatou me aru i tana au kaveinga. (Isaia 48:17, 18) Eaa te mea puapinga roa atu no tatou i te akamori i te Tutara Ngateitei o te ao e pini ua ake e kia akamareka iaia?

Akakite katoa mai te Pipiria kia akatupu tatou i tetai pirianga vaitata ki te Atua. “E akavaitata atu ki te Atua, e nana e akavaitata mai kia kotou na.” (Iakobo 4:8) Tetai au taime penei ka manako tatou e, ka rauka ainei tetai pirianga vaitata ki te Atua? Akapapu mai te Pipiria e me “kimi” tatou i te Atua ka “kitea” aia, kare “aia i atea ke atu ia tatou.” (Angaanga 17:27) Te pirianga vaitata ki te Atua ta te Pipiria e akakite maira, e mea puapinga no tatou a te tuatau ki mua. Eaa ra te tumu?

Akamanako ana: Noatu ta tatou tautaanga, kare e rauka ia tatou i te takore i taua enemi openga ra—ko te mate. (1 Korinetia 15:26) Inara, e Atua mutu kore a Iehova. Kare rava aia e mate, e ka inangaro aia i tona au oa kia kore e mate katoa. Akakite te Pipiria i ta te Atua ka inangaro no te aronga tei kimi iaia: “Ka ora rai to kotou ngakau e tuatau ua atu.”—Salamo 22:26.

Akapeea e rauka ai ia koe tetai pirianga vaitata ki te Atua? Apii ua atu rai no runga iaia mei roto i tana Tuatua te Pipiria. (Ioane 17:3; 2 Timoteo 3:16) Pati i te tauturu kia mārama i tana Tuatua. Akapapu mai te Pipiria e me ‘pati tatou ki te Atua’ no te pakari, ka oronga mai aia i te reira. * (Iakobo 1:5) Pera katoa, tauta i te rave i taau i kite mai, kia riro te Tuatua a te Atua ei ‘lamepa no toou nei vaevae e ei turama no toou nei arataa’—i teianei e tuatau ua atu.—Salamo 119:105.