KARANGA TETAI PAE E KARE. Akaaite tetai taote i te kaveinga a te Pipiria ki ta tetai puka apii taieni no te mataiti 1920, ei apii i tana pupu apii. Penei ka ui mai tetai tangata e, ka aru ainei koe i te akamāramaanga a tetai puka taito no runga i te komupiuta me taangaanga koe i tetai komupiuta ou. Te kaveinga a te Pipiria, karanga tetai pae e, kua taito.

Eaa tatou ka aru ei i te au kaveinga taito i teia tuatau maata te tauturu? E manganui te tauturu ka rauka i teia tuatau i runga i te initaneti. E akaari katoaia ana na runga i te avata tutu te au tauturu a te au taote, te au puapii e te aronga tata puka. E oko katoa ana tetai au toa i te au puka tauturu no runga i te oraanga, ei kimi moni.

No te maata o te au tauturu e vai nei, eaa tatou ka aru ei i ta te Pipiria—e puka tei tataia mei tetai 2,000 mataiti akenei? Ka tano ainei ta te aronga akaapa e me aruia te au kaveinga a tetai puka taito, aite rai ki te aru i te akamāramaanga a tetai puka apii me kore puka no runga i te komupiuta? Kare. E taui ana te kite taieni e te au mea ta te tangata i maani, kua taui ainei ra te anoano o te tangata? Inangaro te tangata te kite i te akakoroanga o te oraanga, kia rauka te mataora, te au, kia tupu te pirianga vaitata ki te ngutuare tangata e ki te au oa.

Ka kitea te au kaveinga no teia au mea pouroa i roto i te Pipiria. Te akakite katoa maira e na Tei Anga ia tatou i tata i te reira. Te oronga maira te Pipiria i te au kaveinga meitaki no te oraanga e te tauturu kia kite akapeea me akatikatika i te au manamanata. (2 Timoteo 3:16, 17) Pera katoa, te au akoanga e te au kaveinga—kare rava e taito! Karanga te Pipiria: “E mea ora oki te tuatua a te Atua.”—Ebera 4:12.

E tika ainei ta te Pipiria? Kua taito ainei te au kaveinga, me e puapinga atu i ta tetai au puka? Te akakoroanga o teia Punanga Tiaki e tetai atu ka aru mai, ka tauturu ia koe i te kimi i te au pauanga no teia au uianga.