Karanga a Rosie e, “Maata atu taku e apiapi ra no te mea kua akamanako ua rai au i toku au manamanata.” Eaa te au irava Pipiria tei tauturu iaia? Tetai ko Mataio 6:34: “Auraka e apiapi i to apopo ra; na apopo e apiapi i tana uaorai. Ko te rā ko tona uaorai kino, oti ra ua ïa.” Kua karanga a Rosie e kua tauturu te au tuatua a Iesu iaia kia kore e apiapi no runga i te au apinga ka tupu apopo. Karanga katoa aia, “Maata toku manamanata, kare au e inangaro i te apiapi maata i te au turanga tei kare i tupu ake.”

Kua pera katoa a Yasmine maata tana e apiapi ra. “Kua aue au no tetai au rā, e kare au e varea e te moe i te po. Kua riro teia au manako apiapi i te tamanamanata iaku.” Eaa tetai irava tei tauturu iaia? Kua taiku aia ia 1 Petero 5:7: “E uri i to kotou tumatetenga katoa ki runga iaia; koia oki te tiaki mai ia kotou.” Karanga katoa a Yasmine: “I te au taime i aereia, kua pure ua rai au kia Iehova e kua pau mai aia i taku au pure. Kite mai au i te mama anga o toku oraanga. Kare toku au manako apiapi e oki akaou mai, inara i teianei kua kite au akapeea me akatere i te reira.”

Karanga tetai mapu vaine ko Isabella: “Manako au e ko te tavarevare e tupu ana te reira i roto i te ngutuare tangata no te mea e mea matau na toku tati te rave i te reira. Akaruke au i te rave i te au mea puapinga—kia rauka iaku te akangaroi me kore te akara teata. Kare te reira i te mea meitaki no te mea ka ō mai te manako apiapi e kare e raveia te angaanga.” Tetai kaveinga tei tauturu iaia tei roto ia 2 Timoteo 2:15, te karanga ra: “E akamaroiroi kia vai meitaki rai koe ki mua i te aroaro o te Atua, ei rave angaanga kare e akama anga.” Karanga a Isabella, “Kare au e inangaro kia akama a Iehova i taku angaanga no te tavarevare iaku.” Kua meitaki mai tona turanga.

Koia katoa a Kelsey tei tuatua: “Taku angaanga ka tiaki roa au kia tae ki te rā ka inangaroia ai, e rave ei au. Ka aue au, kare au e moe meitaki e ka manamanata au. Kare i te mea meitaki noku.” Kua rauka mai ia Kelsey te tauturu i roto ia Maseli 13:16: “E angaanga te tangata karape katoa ma te kite: kareka te neneva ra, e akapueu ïa i tana tuatua neneva.” Akamārama mai teia irava: “E mea puapinga kia akanoo meitaki i taau ka rave. Teianei e puka taku ei tata i taku au angaanga ka rave, e kua tauturu teia iaku kia kore e tavarevare.”

Akakite a Kirsten, “Kua akaruke taku tane iaku e ta maua tamariki e ā.” Eaa te kaveinga Pipiria tei tau kiaia? E tatau ia Maseli 17:17: “E aroa mairai te taunga i te au tuatau katoa ra, i anau maira te taeake no te tuatau e tumatetengaʼi ra.” Kua pati a Kirsten i te tauturu a te au taeake i roto i te putuputuanga. Eaa tana i kite mai? “Kua tauturu toku au oa iaku na roto i te au ravenga tuke ke! Kua oronga mai ratou i te kai e te apinga aroa. Kua tauturu te au taeake ia matou e toru taime, kia neke mei tera are ki tera are. Tauturu katoa tetai iaku kia kimi i tetai ngai angaanga. Ka tauturu ua mai rai toku au taeake iaku.”

Ko Delphine, tei taikuia i mua ana, kua na roto aia i te turanga maromaroa. Maara iaia tona au tumatetenga: “Kite au i te au tangata e mataora ra, ko au nei ra kare oku mataora. Maromaroa tikai au.” Tetai irava tei tauturu iaia ko Salamo 68:6: “E tuku oki te Atua i te taki tai i te ngutuare tangata.” Akamārama aia: “Kite au e kare teia i te ngutuare tangata tika tikai. Kua mārama ra au e te oronga maira a Iehova i te ngutuare pae vaerua, te ngai tinamou ka rauka tetai pirianga oa tumanava ki te aronga tei inangaro ia Iehova. Kare e rauka iaku i te akatupu i te pirianga vaitata ki tetai ke me kare au e akavaitata kia Iehova na mua. Tauturu mai a Salamo 37:4: ‘Kia mataora oki koe ia Iehova; e nana e oronga mai i ta to ngakau e anoano ra.’”

Akakite aia: “Ka anoanoia au i te akatupu i te pirianga vaitata kia Iehova. Koia te oa meitaki rava atu. Ka akanoo au i tetai au mea kia rave matou ko te au taeake, te ka riro i te akaketaketa i to matou pirianga oa. Kite mai au i reira te mea puapinga kia akara i to ratou tu meitaki kare i to ratou tarevake.”

Ae, e aronga ara tatou pouroa. E na roto ana te Au Kite o Iehova i te au manamanata mei te katoatoa rai. Inara na te apii anga i te Pipiria e akakeu i te tangata kia tauturu i tetai ke i te au taime ravarai. E mea meitaki i te iki i te au oa mei teia te tu. Inara, ka rauka ainei te kaveinga Pipiria i te oronga mai i te tauturu no te au manamanata te kare e rauka i te akatikatika i teia tuatau, mei te maki kino e te mamae ngakau?