Ko Delphine tei taikuia i te atikara i mua ake, karanga aia e no tona manamanata kua inu maata aia i te kava. Kare te Pipiria i akakite mai ana e eaa te maata o te kava ka inu tatou, inara te karanga ra e: “Auraka koe e kapiti katoa ki te aronga i kona i te wina ra.” (Maseli 23:20) Ka akatupu te kava i te au manamanata, mei te maki, te mate e te pekapeka i roto i te ngutuare. Naringa te tangata e aru ana i ta te Pipiria e akakite ra, kare teia au manamanata e tupu.

Kua aru a Delphine i ta te Pipiria i akakite. Karanga aia i teianei: “Kite mai au e kare e rauka i te kava i te akakore i toku manamanata. Kua rave au i ta Philipi 4:6, 7, e karanga ra e: ‘Auraka rava kotou e apiapi i te au mea katoa nei . . . e akakite ua ra ki te Atua i to kotou anoano i te au mea katoa ra i te pure.’ I te au po me apiapi au i toku au manamanata, e pure ana au kia Iehova. Ka akakite au i to roto i toku ngakau, taku e riri ra, toku turanga taitaia, e ka pati akatenga au kiaia no te tauturu. Me iti mai te rā, akapapu au e kua akangaropoina au i te reira au mea pouroa. Kua riro teia i te akamou i toku manako ki runga i tei rauka iaku kare ki runga i tei kore i rauka iaku. Iki au kia kore rava au e inu akaou i te kava. No te mea e puapinga te au tei rauka iaku, kare au e inangaro kia ngaro te reira.”

Ka akatupu tetai au kino i te mamae ngakau e te manamanata. Ka rauka ra i te au kaveinga Pipiria i te tauturu ia tatou kia kopae i teia au manamanata—ei akaraanga, te akameamea e te akarakara i te au teata peu ainga viivii. Karanga a Samuel e “E mea mama ua i te akameamea. Tetai taime kare au e reka ana i tetai tamaine, kite ra oki au e te akainangaro maira aia iaku—reka atu i reira te akameamea.” Kua akaapaia a Samuel no te akameamea, noatu kare i te mea akakoro nana, i muri mai i reira kua iki aia i te rave putuputu i teia. Kare ra aia i mataora ana no tana i rave. “Kare i te mea tau,” i nana ai, “no te mea ko au uaorai taku e manako ra.”

Tatau a Samuel i tetai atikara no te au mapu i runga i te jw.org. Kua akamanako aia i ta Maseli 20:11, e karanga ra: “E kitea te tu o te tamaiti i tana au ravenga; i te meitaki anga e te tiratiratu.” Akapeea teia te tauturu anga iaia? Kua kite mai a Samuel e ko te akameamea kare i te mea tau. Karanga aia i teianei e: “Kite katoa mai au me akameamea tetai mapu te akatupu ra aia i te au mea ka takino i te oraanga akaipoipo a te tuatau ki mua. Akamanako au i te tuatau e akaipoipo ei au, me akameamea au i tetai vaine ke eaa te manako o taku vaine no runga iaku. Kite mai au i reira e kare teia tu i te mea tau. Noatu e akaraanga mama i te rave, kare rai i te mea tau.” Kua taui a Samuel. Na te kopae anga i te tu akameamea kua tauturu te reira iaku kia kore e rave akaou i teia peu tau kore.

E kino atu te turanga o Antonio: Matau aia i te akara putuputu i te au tutu peu ainga viivii. Noatu kua akaipoipo aia i tana vaine i inangaro, kua rave ua rai aia i teia peu. Karanga aia e na te akamanako anga i ta 1 Petero 5:8 i tauturu iaia. “E akono meitaki, e matakite, te aaere nei oki to kotou enemi ko te diabolo, mei te liona ngunguru ra, i te kimi anga i te tangata e pou iaia.” Akakite katoa a Antonio: “Tei te au ngai pouroa te au tutu peu ainga viivii, e ka mou te reira ki roto i te manako. Kua riro tera irava i te tauturu iaku kia kite i te tumu o teia au ereere. Ka anoanoia au kia kite e kia akamaara e na te Tiaporo teia ereere. Papu iaku i teianei e ko Iehova anake te ka rauka i te oronga mai i te tauturu kia akono meitaki e kia matakite. Ka rauka i reira iaku te kopae i te au mea te ka takino i toku manako, toku ngakau e toku oraanga akaipoipo.” Kua rauka ia Antonio te tauturu tana i anoano, e tei tupu kua akaruke aia i tana i matau i te rave. Na roto i te reira, kua rauka katoa iaia i te kopae i tetai au mea kino.

Taka meitaki e te oronga maira te au kaveinga Pipiria i te tauturu kia rauka ia tatou i te kopae i te au manamanata. Inara akapeea me e ngatā i te kopae i tetai au manamanata o te oraanga? Akara tatou akapeea te Tuatua a te Atua me tauturu ia tatou.