Me inangaro koe i te kite i tetai tangata, e mea meitaki kia kite koe e eaa tana i rave e te au turanga taitaia tana i akakoromaki ana. Pera katoa, me inangaro koe i te kite meitaki i te Atua, ka anoanoia koe kia kite eaa tana i rave. Ia koe e rave ra i teia, ka kite koe eaa tana i rave i te au tuatau i topa e akapeea te reira me tauturu ia tatou i teianei e a te tuatau ki mua.

Ko Tei Anga i te au mea ravarai ko Iehova ïa, e “te au mea oki nona tei kore e tau kia akara ra, tei kitea puia nei ïa, i te au mea katoa i angaia nei, mei te maani anga mai i teianei ao.” (Roma 1:20) “Nana i anga te enua i tona mana, e nana i akamou te ao katoa nei i tona ra pakari, e i tona kite i totoaʼi aia i te au rangi ra.” (Ieremia 10:12) Ka kitea katoaia to Iehova inangaro ia tatou i roto i te au mea tana i anga.

Akamanako ana i te meitaki ta Iehova i rave no tatou te tangata, kua angaia tatou “i tona uaorai tu.” (Genese 1:27) No reira, ka rauka rai ia tatou te akaari i tona au tu. Kua anga mai aia ia tatou ma te inangaro i te au mea pae vaerua, kia mārama tatou i tona manako e tana au kaveinga. Ia tatou e tauta ra i te akono i teia, ka kite tatou i te oraanga mataora e te meitaki. E tetai, kua oronga mai aia i te tikaanga kia tatou kia akatupu i tetai pirianga vaitata kiaia.

Te akaari maira te au mea i angaia i runga i te enua i to te Atua inangaro ia tatou. Akakite a Paulo e, “kare ra aia [te Atua] i ngere i te akakite iaia uaorai, koia i takinga-meitaki mai, i te oronga anga mai i te ua [no tatou] no runga i te rangi, e te tuatau mou, e te akaki anga mai i to tatou ngakau ki te kai ma te rekareka.” (Angaanga 14:17) E maata ta te Atua i oronga mai no tatou e rauka ai te ora. E tuke ke tana au mea i anga ei meitaki no to tatou oraanga. E akaraanga ua teia no te au mea tana i anoano no tatou.

 Anga a Iehova i te enua no te tangata kia noo ki runga i reira e tuatau ua atu. Akakite te Pipiria: “Kareka te enua nei, kua oronga mai aia na te tamariki a te tangata nei,” e “kare ra aia i anga ei mea puapinga kore ua; kua anga ra aia kia tangataia.” (Salamo 115:16; Isaia 45:18) Koai ma ka noo ki reira, e eaa te roa? “Ka riro te enua no te aronga tuatua-tika, ka noo tamou rai ratou i reira.”—Salamo 37:29.

Kia tau ki te reira, kua anga a Iehova i te tane mua e te vaine mua, ko Adamu e Eva, e kua tuku atura ia raua ki roto i te kainga parataito kia “tatanu, e ei tiaki” i te reira. (Genese 2:8, 15) Kua oronga a Iehova i ta raua angaanga: “Kia anau korua, e kia maata roa, e e akaki i te enua nei, e e akavi.” (Genese 1:28) Ka rauka i reira ia Adamu e Eva tetai oraanga mutu kore ki runga i te enua. Te mea maromaroa ra, kua iki raua i te akarongo kore i te Atua e no te reira kua ngere raua te manakonakoanga kia piri atu ki “te aronga tuatua-tika” te ka noo tamou ki te enua nei. Inara ka kite mai tatou, kare ta raua i rave i taui i to Iehova akakoroanga no tatou e te enua. Mea mua ra ka akara tatou e eaa atu ta te Atua i rave.

Te Pipiria e Tuatua na te Atua. Eaa te tumu i oronga mai ei a Iehova i te Pipiria na tatou? Kia rauka ia tatou i te apii no runga iaia. (Maseli 2:1-5) E tika, te vaira tetai au uianga no runga i te Atua kare te pauanga i roto i te Pipiria e kare rai e kitea i roto i tetai ua atu puka. (Koheleta 3:11) Noatu rai ka tauturu te au mea i tataia i roto i te Pipiria ia tatou kia apii no runga i te Atua. Ka kite tatou i tona tu aroa na roto i tana akono anga i te tangata. Ka kite tatou i tona manako no te au tangata e inangaro ra aia e tana kare e inangaro ana. (Salamo 15:1-5) Ka kite tatou i tona manako no runga i te akamorianga, tona turanga viivii kore, e te au apinga no te kopapa. E te akakite maira te Pipiria no runga i to Iehova tu kia tatou, na roto i te au tuatua e te angaanga a Iesu.—Ioane 14:9.

Tetai tumu i oronga mai ei a Iehova i tana Tuatua te Pipiria, kia rauka ia tatou tetai oraanga mataora e te meitaki. Roto i te Pipiria, kua akakite mai a Iehova akapeea to tatou ngutuare tangata e mataora ai, e mareka ai i to tatou oraanga, e akapeea me akakoromaki i te au taitaia. Ka akakite mai teia makatini i te pauanga i roto i te Pipiria no teia au uianga: Eaa te tumu i maata ai te taitaia? Eaa te ka tupu a te tuatau ki mua? Te akamārama katoa maira te reira e eaa ta te Atua i rave no te akatupu i tona akakoroanga.

Te Pipiria na te Atua te reira e Nona rai te manako i roto i te reira. Kua tataia te Pipiria e tetai 40 tangata no tetai 1,600 mataiti te roa, noatu te reira kua rotai te karere no te mea kua akauruia te reira e te Atua. (2 Timoteo 3:16) Tuke ki tetai au puka, kare te karere i roto i te Pipiria i tauiia e tae mai ki teia tuatau, kua akapapuia teia e te au tataanga o mua ana o te Pipiria. Kua rauka i tetai aronga i te uri i te Pipiria, te tuʼa aere e te tatau i te reira. I teia rā ko te Pipiria te puka maata roa atu e tuʼa aereia nei e te uriia nei. No te mea te vai nei rai te Pipiria i teia tuatau te akapapu maira e ko “te tuatua a to tatou Atua, e tu ïa e rimua.”—Isaia 40:8.

Tetai angaanga ta te Atua i rave kua oronga mai aia i tetai ravenga ei akatupu i tona akakoroanga no tatou. Mei tei taikuia i mua akenei, kua inangaro te Atua i te tangata kia ora e tuatau ua atu ki runga i te enua. Inara, te iki anga a Adamu kia akarongo kore ki te Atua kua ara atura aia, e kua ngere aia e tana uanga i te oraanga mutu kore. “E teianei no te tangata okotai ra i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa.” (Roma 5:12) Kua patoi te tu akarongo kore o te tangata i ta te Atua i akakoro. Eaa ta Iehova i rave?

Kua āu ta Iehova i rave ki tona tu. Kua tau rai tana akautunga anga ia Adamu e Eva no ta raua i rave, no tona aroa kua oronga mai aia i te ora ki ta raua uanga. Na roto i te tu pakari kua viviki a Iehova i te akatikatika i teia meameaau, kua akakite  mai aia i tetai ravenga. (Genese 3:15) Ka rauka ua te ora mei te ara e te mate, na roto ia Iesu te Tamaiti a te Atua. Eaa te ka anoanoia?

Ei akaora i te au tangata mei te meameaau ta Adamu i akatupu, kua tono mai a Iehova ia Iesu ki te enua i te apii i te tangata i te mataara e rauka ai te ora e “kia oronga i tona ora ei oko no te tangata e manganui.” a (Mataio 20:28; Ioane 14:6) Kua rauka ia Iesu i te oronga mai i te oko no te mea e tangata apa kore aia mei ia Adamu rai. E tuke ra aia kia Adamu, kua vai tiratiratu a Iesu e tae ua atu ki tona matenga. No te mea kare a Iesu i tau kia mate, kua akaora mai a Iehova iaia ki tetai oraanga i te rangi. Kua rauka ia Iesu i te oronga mai i te oraanga mutu kore ki te au tangata tiratiratu kia Iehova. “Mei te tangata katoa e manganui i akariroia ei tangata ara i te akono kore o te tangata okotai ra, manganui oki tei akariroia ei tangata tuatua-tika i te akono a te tangata okotai ra.” (Roma 5:19) Na roto i te atinga oko o Iesu, kua akatupu te Atua i tana taputou no te au tangata ravarai kia ora e tuatau ua atu i te enua.

E maata ta tatou i kite mai no runga i ta Iehova i rave no te meameaau ta Adamu i akatupu. Kua kite mai tatou kare e rauka i tetai apinga i te tāpu ia Iehova e te akaoti i tana i akamata ai; ka “manuia oki” tana i tuatua. (Isaia 55:11) Kua kite katoa tatou i te maata i to Iehova inangaro ia tatou katoatoa. “Kua kitea to te Atua aroa ia tatou nei, koia i tono mai i tana Tamaiti anau tai ki te ao nei, kia ora tatou iaia. Ko te aroa mou teia, kare ïa na tatou i aroa atu i te Atua, koia ra tei aroa mai ia tatou nei, e kua tono mai i tana Tamaiti ei tarangaara i ta tatou nei ara.”—1 Ioane 4:9, 10.

Kare te Atua “i akaperepere i tana uaorai Tamaiti, ko tei tuku ua mai iaia no tatou katoa nei,” kua papu i reira ia tatou e ka “oronga katoa mai [Aia] i te au mea ravarai no tatou” mei tana i taputou e ka rave aia. (Roma 8:32) Eaa ta te Atua i taputou mai ka rave aia no tatou? E tatau ua atu.