Me tupu te taitaia kia koe, ka inangaro koe i tetai oa meitaki i te tauturu mai ia koe. No te reira, kua karanga tetai aronga e kare te Atua i te oa no ratou, no te mea kare Aia e tauturu mai ana ia ratou. Inara ko te tika, e maata ta te Atua i rave kia tupu te meitaki no tatou, e kare e roa atu ka takore aia i to tatou manamanata e te au tu taitaia e tupu nei kia tatou i teia tuatau. Eaa ta te Atua ka rave?

Ka takore a Iehova i te kino e te tumu o te kino. Te akakite maira te Pipiria e koai te tumu o te kino: “Te vai ua nei rai to te ao ravarai i raro ake i taua vaerua kino ra.” (1 Ioane 5:19) Ko taua “vaerua kino ra” kua kapiki a Iesu iaia e ko “te ariki o teianei ao,” ko Satani te Tiaporo. (Ioane 12:31) No reira rai i tupu ei te manamanata i runga i te enua no te mea te akavare nei a Satani i te tangata. Eaa ta te Atua ka rave?

Kare e roa atu ka taangaanga a Iehova i tana Tamaiti ko Iesu te ka “akangere atu iaia nona te mate ra, koia oki te diabolo.” (Ebera 2:14; 1 Ioane 3:8) Te tika, te akakite maira te Pipiria e kua kite te Tiaporo e e “manga tuatau poto ua tona e toe nei” i mua ake ka takoreia ai aia. (Apokalupo 12:12) Ka takore katoa a Iehova i te aronga rave i te kino.—Salamo 37:9; Maseli 2:22.

Muri ake i te takore anga i te kino mei te enua, ka akatupu a Iehova i tona akakoroanga no te au tangata ravarai e te enua. Eaa ta tatou ka tapapa atu?

Ka vai te au e te tinamou. “Kareka te aronga maru ra, ka noo ïa i te enua, e ka rekareka ratou i te maata o te au ra.”—Salamo 37:11.

E maata te kai memeitaki. “E manga sitona okotai rima i ki i te enua nei, i runga i te take o te au maunga ra.”—Salamo 72:16.

Meitaki te au are e ka maata te angaanga. “E patu ratou i te au are, e na ratou uaorai e noo; e na ratou e tanu i te au kainga vine, ka kai ei i te kai i reira. . . . e rekareka tei ikiia e au ra, i te angaanga a to ratou uaorai rima.”—Isaia 65:21, 22.

Te inangaro ra koe i teia tu oraanga? Kare e roa atu ka kite te katoatoa i teia.

I teia tuatau te tupu nei te maki e te mate ki te katoatoa, inara kare e roa atu ka takoreia te reira. Ka taangaanga a Iehova i te puapinga o te atinga oko o Iesu “kia kore e mate te akarongo iaia, kia rauka ra te ora mutu kore.” (Ioane 3:16) Eaa te ka tupu mai?

Kare e maki akaou. “Kare oki to reira e karanga e, Kua maki au: te au tangata e noo i reira, kua apai keia ta ratou ara.”—Isaia 33:24.

Ka akakoreia te mate. “Nana e akakore rava i te mate e tuatau ua atu; e na te Atu ra na Iehova e orei i te roi-mata i te au mata ravarai.”—Isaia 25:8.

Ka ora te tangata e tuatau ua atu. “Kareka te ora mutu kore ra, e mea oronga uaia mai e te Atua i roto i to tatou Atu ia Iesu Mesia.”—Roma 6:23.

Ka akatuakaouia mai tei mate. “E e tuakaouanga to tei mate, te aronga tuatua-tika e te aronga tuatua-tika kore.” (Angaanga 24:15) Ka kite ratou i te puapinga o te oko, e apinga aroa na te Atua.

Akapeea a Iehova me akatupu pouroa i teia?

Ka akatupu te Atua i tona akakoroanga no te tangata e no te enua na roto i tona patireia i te rangi, e ko Iesu te Tutara tei ikiia e Ia. (Salamo 110:1, 2) Ko te kavamani me kore patireia teia ta Iesu i apii ki tana au pipi kia pure i te na ko anga e: “E to matou Metua i te ao ra, . . . kia tae toou basileia.”—Mataio 6:9, 10.

Ka tutara te Patireia o Iehova ki rungao i te enua e ka takore i te au tu mamae e te taitaia i runga nei i te enua. Ka akatupu teia Patireia i te meitaki no te au tangata ravarai! No reira oki a Iesu i maroiroi ei i te tutu aere i “te evangelia o te basileia” iaia e rave ra i tana angaanga e kua akakite aia ki tana au pipi kia pera katoa ratou.—Mataio 4:23; 24:14.

No tona inangaro i te tangata, kua taputou mai a Iehova e ka akatupu aia i teia au mea pouroa no ratou. Kare ainei teia e akakeu ana ia koe kia apii no runga iaia e te akavaitata atu kiaia? Eaa te meitaki noou me iki koe i te reira? Ka akakite mai te atikara ka aru mai.