Koai te Atua?
Maata te tangata e karanga ana e te irinaki ra ratou i te Atua. Inara me uiia kia ratou e koai te Atua, e tuke ke te au pauanga. Ki tetai pae, e akava kino te Atua, ka akautunga aia i te aronga tei rave i te kino. Karanga tetai pae, e tu aroa e te akakore ara to te Atua, noatu eaa ta ratou ka rave. Tetai pae te irinaki ra e e mamao te Atua e kare aia e inangaro mai ia tatou. No teia au tumu, penei ka manako te maata anga e e ngata i te kite i te Atua.
E mea puapinga ainei teia? Ae. Me kite meitaki tatou i te Atua ka oronga mai te reira i tetai akakoroanga e te tumu tikai o te oraanga. (Angaanga 17:26-28) Me akavaitata koe ki te Atua, ka maata atu tona inangaro i te tauturu ia koe. (Iakobo 4:8) No reira, me kite maata toou i te Atua ka rauka ia koe te ora mutu kore.—Ioane 17:3.
Akapeea ra koe e kite ei i te Atua? Akamanako ana i tetai tangata kua kite meitaki koe, tetai oa piri mou. Akapeea korua i riro mai ei ei oa? Penei kua kite koe i tona ingoa, tona tu, tana e reka ana e kare e reka ana, tana i rave e ka rave, e te vai atura. Ko teia te au mea tei akavaitata atu ia koe ki teia tangata—ko taau i kite mai no runga iaia.
No reira, ka rauka ia tatou i te kite i te Atua na te akamanako anga i teia au tumu manako:
Ka oronga mai teia makatini i te au pauanga mei roto mai i te Pipiria. Ka tauturu teia au atikara ia koe kia kite e koai te Atua e ka akapeea koe e puapingaia ai me akatupu koe i tetai pirianga oa kiaia.
