Te maata atu i ta tatou ka kite no runga i te tu o tetai tangata, ka kite meitaki tatou iaia e ka tupu tetai pirianga oa. Mei te reira katoa, me kite maata atu tatou i to Iehova au tu, ka kite meitaki atu tatou iaia, e ka tupu to tatou pirianga oa kiaia. E manganui to te Atua au tu meitaki, inara e ā ona tu tei maata atu: tona mana, te pakari, te tu tau, e te aroa.

“E te Atu e! e Iehova! I na, naau te rangi nei i anga, e te enua, i te mana maata noou ra.”—IEREMIA 32:17.

Ka kiteaia to te Atua mana i roto i te au mea tei angaia. Ei akaraanga, me iti mai te rā ki runga ia koe, eaa te ka tupu ki toou kopapa? Ka kite koe i te maana o te rā. Ko te tika, te kite ra koe i te mana ririnui o Iehova. Mei teaa rai te ririnui o te rā? Kua karanga ia e, i rotopu roa, tona vera mei tetai 27,000,000 degrees Fahrenheit (15,000,000°C). I te tekoni okotai, ka aiteite te vera o te rā me akaaruruia e anere mirioni nuclear pomu.

Inara e meangiti ua to tatou rā me akaaiteia te reira ki te mirioni ua atu etu i te ao katoa e pini ua ake. Kua tamanako te aronga kite taieni e ko te etu maatamaata roa atu, ko UY Scuti, e 1,700 taime te maatamaata atu i to tatou rā. Me tukuia te etu ko UY Scuti ki te ngai o te rā, ka tae roa tona maatamaata ki tetai ope roa o te etu ko Jupiter. Penei ka tauturu teia ia tatou kia mārama meitaki i te aiteanga  o ta Ieremia tuatua, e kua anga te Atua ko Iehova i te rangi e te enua, koia oki te ao katoa e pini ua ake, ma te mana ririnui.

Akapeea tatou e puapingaia ai mei te mana o te Atua? Ka anoano to tatou oraanga kopapa i te au mea ta te Atua i anga mai, mei te rā e te au apinga meitaki o te enua nei. Pera katoa, ka puapingaia te au tangata tataki tai mei te mana o te Atua. Akapeea ra? I te anere mataiti mua, kua oronga te Atua i te mana kia Iesu kia rave i te au temeio. Ka tatau tatou: “Te rauka nei te kite i te matapo, kua aere te pirikoki, kua tamāia te lepera, kua akarongo te taringa turi, kua akatuia tei mate.” (Mataio 11:5) Akapeea i teia rā? Karanga te Pipiria: “Te oronga nei aia i te maroiroi no tei paruparu,” e pera: “Ko te aronga ra e tapapa ia Iehova, e rauka ïa te maroiroi ou.” (Isaia 40:29, 31) Ka oronga mai te Atua i te “mana maata meitaki” kia rauka ia tatou i te akakoromaki i te au turanga ngata o te oraanga. (2 Korinetia 4:7) Penei ka inangaro rai koe i te akavaitata atu ki tetai Atua te ka taangaanga i tona mana ririnui i te tauturu ia tatou?

“Tumatatini taau ra angaanga, e Iehova e! e au ravenga pakari anake rai taau.”—SALAMO 104:24.

Te maata atu ta tatou ka apii no runga i te au mea ta te Atua i anga, ko te maata atu ïa to tatou umere i tona tu kite pakari. E tuanga kimikimianga tetai tei kapikiia e ko te biomimetics, me kore biomimicry, koia oki, ka akara matatio te aronga kite taieni i te au mea ta Iehova i anga e ka aru ratou i te reira no te akameitaki atu i ta ratou apinga e maani ra. Mei tetai apinga rikiriki ki tetai apinga maatamaata mei te pairere rai.

Tetai akaraanga umere rava atu o te tu kite pakari o te Atua, tei roto te reira i te kopapa tangata. Ei akaraanga, e akamanako ana i te tupuanga o tetai pepe. Ka akamata te reira i roto i tetai cell kua akapiriia, tei roto te au akapapaanga ka anoanoia. E maata te au cell tei aiteite te ka tupu mai mei teia cell okotai. Inara i te taime tau tikai, ka akamata teia au cell i te taui ki te au tu tuke ke, mei te toto, te au uaua, e te ivi. E i muri mai, ka akamata te au mero tuke ke i te angaanga. I roto i te iva marama, ka riro mai te pirioni ua atu au cell ei pepe. Ka akakeu te tu kite pakari i roto i teia i te manganui kia āriki ki ta te tata Pipiria i karanga: “Ka akameitaki au ia koe, e mea mataku e te taka ke oki toku anga angaia.”—Salamo 139:14.

Akapeea tatou e puapingaia ai mei te kite pakari o te Atua? Kua kite tei Anga akapeea tatou e mataora ai. Mei tona kite oonu e tona mārama, kua oronga mai aia i te kaveinga pakari i roto i tana Tuatua, te Pipiria. Ei akaraanga, te raurau maira te Pipiria: “E tauturu atu tetai ki tetai, e akakore tetai i ta tetai ara.” (Kolosa 3:13) E kaveinga pakari ainei teia? Ae. Karanga te au taote, me akakore koe i te ara a tetai ke, ka moe meitaki koe e ka topa te vaito toto ki raro. Ka akaiti katoa mai i te maki manako e tetai ua atu maki tuke ke. E Atua  pakari aia, e taeake akono e ka oronga ua mai aia i te au mea meitaki e te puapinga no tatou. (2 Timoteo 3:16, 17) Kare ainei koe e inangaro i tetai taeake mei teia te tu?

“Mea inangaro oki na Iehova te tuatua-tau.”—SALAMO 37:28.

E rave ua ana te Atua i te mea tau. Ko te mea tika, “kia atea ke atu te tuatua kino i te Atua; e te ara i te Mana katoatoa.” (Iobu 34:10) E akavaanga tau tana, mei ta te tata taramo i tuatua ei: “Nana [na Iehova] e akava i te au tangata ma te tuatua-tika.” (Salamo 67:4) No te mea te kite maira a Iehova i te ngakau, kare aia e vavare i te pikikaa, mari ra ka kimi aia i te mea tika e ka rave i te akavaanga tau. (1 Samuela 16:7) Pera katoa, kua kite te Atua i te au tu tau kore e te kino i te enua nei, e kua taputou mai aia e kare e roa atu ana “ka tipu keia ra te aronga kino i te enua nei.”—Maseli 2:22.

Kare te Atua i te akava kino i te akautunga i te tangata. E akaari ana aia i te aroa tei tau. Karanga ra te Pipiria: “E aroa e te takinga-meitaki to Iehova,” e ki te aronga tei rave i te kino kia tataraara ratou ma te ngakau tae. Kare ainei te reira i te tuatua tau?—Salamo 103:8; 2 Petero 3:9.

Akapeea tatou e puapingaia ai mei te tu tau o te Atua? Akakite a Petero: “Kare te Atua e akono i te tu o te tangata, ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.” (Angaanga 10:34, 35) Puapingaia tatou mei te tuatua tika a te Atua no te mea kare aia e akaari ana i te tu papakitai e te inangaro tika kore. Ka rauka ia tatou i te aere kiaia noatu te kara o te tangata, te enua, toou kite e te turanga o te oraanga.

Inangaro te Atua kia kite e kia puapingaia tatou mei tona tu tika, kua oronga mai aia i tetai akava ngakau tau. Akamārama te au irava i te tu akava  ngakau mei tetai ture i ‘tataia i roto i to tatou ngakau,’ “te akakite ra” e me ko te mea tika te reira me ko te mea tarevake. (Roma 2:15) Akapeea tatou e puapingaia ai? Kia tereni meitaki, ka tauturu to tatou akava ngakau ia tatou kia akaruke i te au mea kino me kore te rave i te mea tau kore. Me rave tatou i tetai tarevake, ka akakeuia tatou kia tataraara e kia akatano i te reira. Ae, me mārama tatou i te tu tika o te Atua, ka tauturu te reira ia tatou kia akavaitata atu kiaia!

“Ko te Atua oki te aroa.”—1 IOANE 4:8.

Akaari te Atua i tona mana, tona pakari e tona tu tau, inara kare te Pipiria i karanga ana e koia te mana, te pakari me kore te tuatua tika. Karanga ra e koia te aroa. Eaa ra? Te akatakaia ra e na te mana o te Atua e rauka ai iaia te rave i tana angaanga, e na tona tu tika e te pakari e arataki iaia kia rave i te reira. Inara na tona aroa e akakeu iaia. Ko te aroa te akaari pouroa ra i tana e rave ra.

Noatu kare a Iehova e ngere ana i tetai apinga, na tona aroa i akakeu iaia kia anga i te au mea ora o te rangi e te enua, kia puapinga e kia mataora ratou i tona tu akono. Kua anga aia i te enua ei ngai nooanga no te tangata. E te akaari nei rai aia i te aroa ki te katoatoa, e “te akaiti nei aia i tona rā ki rungao i te kino e te meitaki, e te akatopa mai nei aia i te ua ki runga i te tangata tuatua-tika e te tangata tuatua-tika kore.”—Mataio 5:45.

“Kua ki te Atu [ko Iehova] i te aroa e te takinga-meitaki maata.” (Iakobo 5:11) Akaari aia i tona inangaro ki te aronga te tauta ra ma te ngakau katoa i te kite e te akavaitata atu kiaia. Te kite ra te Atua i te au tangata tataki tai. Mea papu, e “koia oki te tiaki mai ia kotou.”—1 Petero 5:7.

Akapeea tatou e puapingaia ai mei te aroa o te Atua? E mataora ana tatou i te manea o te rā me opu mai. E reka ana tatou i te akarongo i te pepe me kata. E akaperepere ana tatou i te aroa o tetai i roto i te ngutuare tangata. Penei kare teia i te au mea puapinga, inara ka akameitaki te reira i to tatou oraanga.

Ka puapinga katoa tatou me akaari i te aroa ki te Atua: na roto i te pure. Karanga te Pipiria e: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki.” Mei tetai metua aroa, inangaro aia kia pati tatou i te tauturu kiaia no to tatou au manamanata. E na Iehova, te aroa maata, i taputou mai e ka riro “te au o te Atua, ko tei maata ua atu i te kite tangata.”—Philipi 4:6, 7.

Kua riro ainei teia au uriurianga poto no te au tu puapinga o te Atua mei tona mana, te pakari, te tuatua tau e te aroa i te tauturu ia koe kia kite meitaki i te tu tikai o te Atua? Kia maata atu taau akameitakianga i te Atua, te patiia atu nei koe kia apii i tana i rave e tana ka rave kia puapingaia koe.