Koai to te Atua Ingoa? Akakite mai te Atua: “Ko au ko Iehova; ko toku ïa ingoa.” (Isaia 42:8) Ka kitea te ingoa o te Atua e 7,000 taime i roto i te Pipiria. Inara, kua mono te maataanga o te au urianga Pipiria i teia ingoa ki te taoonga, “te Atu.” Inangaro te Atua ia koe kia riro ei oa nona, no reira te akamaroiroi maira aia ia koe kia “kapiki i tona ingoa.”—Salamo 105:1.

To Iehova au Taoonga. Akakite te Pipiria i te au taoonga o Iehova mei “te Atua,” “Mana Katoatoa,” “Tei Anga,” “te Metua,” “te Atu,” e te “Tutara Ngateitei.” Maata te au pure i tataia i roto i te Pipiria e kua kapikiia a Iehova ma tona taoonga teitei e tona ingoa ko Iehova.—Daniela 9:4.

 To te Atua Tu. E vaerua kitea koreia te Atua. (Ioane 4:24) Akapapu maira te Pipiria “kare ua e tangata i kite i te Atua.” (Ioane 1:18) Akakite mai te Pipiria i tona au manako ngakau. Ka akatupu rai te tangata i te mamae kiaia, e te “mataora.”—Maseli 11:20; Salamo 78:40, 41.

To te Atua au Tu Manea. Kare te Atua e akara papakitai ana i te tangata e te enua no reira mai ratou. (Angaanga 10:34, 35) Akaari katoa aia i te “takinga-meitaki, e te aroa ua, e te akakoromaki maata, e te meitaki maata, e te tuatua-mou.” (Exodo 34:6, 7) Inara, e a o te Atua au tu manea tikai.

Te Mana. Koia “te Atua Mana katoatoa,” e tei iaia te mana no te akatupu i tana au taputou.—Genese 17:1.

Te Pakari. Meitaki roa atu to te Atua tu pakari i to tetai ke. Te karanga ra te Pipiria e koia te “pakari anake.”—Roma 16:27.

Te Tika. E rave ua ana te Atua i te mea tika. E “tika rava,” e e “tau katoa” Tana au angaanga.—Deuteronomi 32:4.

Te Aroa. Karanga te Pipiria “ko te Atua oki te aroa.” (1 Ioane 4:8) Te akaari ra te Atua i te aroa—e koia rai te tumu o te aroa. Na tona aroa maata tikai i akakeu i tana e rave ra e kia puapingaia tatou.

To te Atua Pirianga Oa ki te Tangata. Ko te Atua to tatou Metua aroa i te rangi. (Mataio 6:9) Me irinaki tatou iaia, ka riro tatou ei oa nona. (Salamo 25:14) Te pati maira te Atua ia kotou kia akavaitata kiaia na roto i te pure e kia “uri i to kotou tumatetenga katoa ki runga iaia; koia oki te tiaki mai ia kotou.”—1 Petero 5:7; Iakobo 4:8.

Kare e ko Iesu, te Atua. Koia ua tei angaia e te Atua. No reira te Pipiria i kapiki ei iaia e ko te Tamaiti a te Atua. (Ioane 1:14) Muri ake i te angaia anga a Iesu, kua taangaanga a Iehova i tana tama mua ei “pu rave angaanga” no te anga i te au mea ravarai.—Maseli 8:30, 31, NW; Kolosa 1:15, 16.

 Kare rava a Iesu Mesia i tuatua ana e koia te Atua. Mari ra kua akataka aia: “Mei reira mai oki au nei [i te Atua], e nana oki au i tono mai.” (Ioane 7:29) I tona tuatua anga ki tetai o tana pipi, kapiki a Iesu ia Iehova e ko “toku Metua ra, e ki to kotou Metua ra” e “ki toku Atua, e ki to kotou Atua ra.” (Ioane 20:17) I te mate anga a Iesu, kua akatu a Iehova iaia ki te rangi e kua oronga i te mana katoa kia Iesu, i Tona rima katau.—Mataio 28:18; Angaanga 2:32, 33.

Ka Tauturu a Iesu Mesia ia Koe Kia Akavaitata ki te Atua

Aere mai a Iesu ki te enua nei i te apii i tona Metua kia tatou. Karanga a Iehova kia Iesu: “Taku Tamaiti akaperepere teia, ka akarongo iaia.” (Mareko 9:7) Ko Iesu tei kite meitaki atu i te Atua. Karanga aia: “E kare tetai i kite i te Metua, mari ra ko te Tamaiti, e te tangata ta te Tamaiti e inangaro i te akakite atu.”—Luka 10:22.

Aru meitaki a Iesu i to te Atua au tu. Aru vaitata a Iesu i te au tu o tona Metua, kua tuatua aia: “Ko te akara mai iaku nei, kua akara ïa i te Metua.” (Ioane 14:9) Kua akavaitata a Iesu i te tangata ki te Atua na te akaari anga i te aroa o tona Metua, na roto i tana i tuatua e i rave. Karanga aia: “Ko au te mataara, e te tuatua-mou e te ora; kare ua e tangata e tae ki te Metua ra, mari ra ei iaku.” (Ioane 14:6) Karanga katoa aia: “E akamori ei i te Metua te aronga akamori tika ra, ma te vaerua e te tuatua-mou: ko te tu ïa o te tangata akamori ta te Metua e anoano ra.” (Ioane 4:23) Akamanako ana i teia! Te kimi ra a Iehova i te au tangata mei ia koe rai tei inangaro i te kite i te tuatua mou no runga iaia.