To te Tangata Manako no te Pure
“Me pure au, mei te mea atura e tei te pae te Atua iaku. Te mou ra aia i toku rima e te arataki ra iaku me kare au e kite eaa taku ka rave.”—MARÍA.
“Kua tuia taku vaine i te maki cancer no tetai 13 mataiti e kua mate atu aia. Maara iaku toku pure anga ki te Atua i te au rā ravarai, kua kite au te akarongo maira aia i toku ngakau mamae e kua akapumaana te reira iaku.”—RAÚL.
“E apinga aroa manea te pure na te Atua ki te tangata.”—ARNE.
Kia María, Raúl, e Arne, e apinga aroa te pure kia ratou e ki te maataanga o te tangata. Na roto i te pure kua rauka ia ratou i te tuatua ki te Atua, te akameitaki iaia, e te kimi i tana tauturu. Kua irinaki tikai ratou i ta te Pipiria e akakite maira no runga i te pure ki te Atua: “Teia taua taitaia kore no tatou i rauka iaia ra, kia pati ua atu tatou i te au mea ravarai i tau iaia ra, te akarongo maira aia ia tatou.”—1 Ioane 5:14.
Ki tetai aronga ke, e ngatā ia ratou i te āriki i ta te Pipiria e akakite maira no te pure. Akakite a Steve i tona manako no runga i te pure: “E 17 oku mataiti, kua tupu tetai tumatetenga ki toku au oa e toru. Kua ū e kua mate atu tetai i roto i te motoka, e rua kua mate atu i te moana.” Eaa ta Steve i rave? “Kua pure au ki te Atua kia kite eaa teia i tupu ei, inara kare taku pure i pau ia mai ana. No reira kua ui au kiaku uaorai, ‘Eaa au ka pure ei?’” Maata te tangata tei manako e no te mea kare ta ratou pure i pauia mai, eaa i reira ratou ka pure ei.
Penei e tumu ke atu tetai i manako ei tetai pae e kare te pure e tauturu ia ratou. Karanga tetai pae e noatu kua kite te Atua i te au mea ravarai, to ratou au anoano, e to ratou au manamanata, eaa i reira te puapinga kia akakite i te reira kiaia.
Irinaki tetai pae e kare te Atua e inangaro i te akarongo ki ta ratou pure no te au tarevake ta ratou i rave i mua ana. Karanga a Jenny, “Toku manamanata maata, kua manako au e e vaine puapinga kore au. Kua rave ana au i tetai au mea kino, e kua papu iaku e kare te Atua e akarongo mai ki taku pure.”
Eaa toou manako no runga i te pure? Me kua aite toou manako ki teia au aronga me kore te ekoko ra koe i te pure, ka pumaana koe i te kite i te pauanga a te Pipiria. Ka rauka ia koe te irinaki i ta te Pipiria e akakite maira no runga i te pure, * e ka tauturu te reira ia koe kia kite i te pauanga ki teia au uianga:
-
Te akarongo tikai maira ainei te Atua i ta tatou pure?
-
Eaa ra tetai au pure kare i pauia mai?
-
Akapeea koe me pure e kia akarongoia mai?
-
Akapeea te pure me tauturu ia koe?
^ para. 9 Tei roto i te Pipiria te au pure a te au tavini o te Atua e pera katoa ta Iesu Mesia. E 150 pure tei tataia i roto i te Tuatua Tapu Epera me kore te Koreromotu Taito.
Ka Reka Katoa Koe i Teia
UI TE AU MAPU E
Eaa ra Au ka Pure Ei?
E ravenga ainei te pure kia maru te ngakau, me e mea maata atu?
TE PUNANGA TIAKI
Ka Tau Ainei Kia Pure Koe?
Ka rauka te Atua te pau i taau pure ma te kore e rave temeio.
