Ka āriki te katoatoa e e tika tetai au angaanga e e tarevake tetai pae. Ei akaraanga, ka akaapaia te tā tangata, te kukumi vaine e te pirianga ainga ki te tamariki. Kareka ra te tu tika, te takinga meitaki e te akaaroa, ka ārikiia te reira. Akapeea ra te au ikianga mei te pirianga ainga, te akakite i te tika e te utuutu i te tamariki? Kua irinaki te maata anga e kare e ikianga tika e te tarevake no te reira. Irinaki ratou e ka ārikiia te au ikianga katoatoa. Me rave ratou i te au ikianga, ka akatumuia te reira ki runga i to ratou manako e te manako o tetai ke. E mea meitaki ainei teia?

Me rave tatou i te au ikianga, ka akaata te reira i to tatou manako no te tika e te tarevake, tei kapikiia e ko to tatou akava ngakau. (Roma 2:​14, 15) Ka kite katoa te tamariki i te tuke i rotopu i te mea tika e te tarevake, e ka manako apa me rave ratou i te tarevake. I te tuatau ka aereia, ka apii tatou i te mea tika e te tarevake mei to tatou ngutuare tangata, au oa, te au puapii, te iti tangata, te akonoanga e te au peu. No reira me rave tatou i te au ikianga no te tika e te tarevake, ka akaapa mai to tatou akava ngakau me kua rotai te reira ki ta tatou i apii mai.

Ko to tatou manako no te tika e te tarevake, ka akakeu te reira ia tatou kia akaari i te tu tangi, āriki rekareka, tu tika e te aroa no tetai ke. Ka tāpu te reira ia tatou kia kore e takinga kino e te taakamā i to tatou au akaperepere.

E meitaki ainei i te aru i toou uaorai manako? I tona mapu anga, kua aruaru a Garrick i tetai oraanga mei tana i karanga e, “Ka rave ua au i tetai ua atu mea taku i inangaro.” Inara, kua kite mai aia e kua taki atu te reira ki te tumatetenga. Kua akataka aia i tona oraanga ei mea puapinga kore no te mea “kua kī te reira i te ainga tau kore, te kai apinga akakona, te konā kava e te tā ua.”

Me rave tatou i te au ikianga, ka aru tatou i to tatou uaorai manako e te manako o tetai ke. Ka tauturu teia ia tatou kia puapingaia mei ta ratou i kite. Ka mareka to tatou ngutuare tangata, au oa e te oire tangata me rave tatou i te mea tika i roto i to ratou mata.

E meitaki ainei i te aru i te manako o tetai ke? I tona mapu anga, kua rave a Priscila i te mea mātauia e tona au oa e kua piri ainga ki tetai ke. Inara, noatu kua manako tetai ke e e mea meitaki ua tana e rave ra, kare ra aia i mataora. Karanga aia: “Kua taitaia tikai au i te rave i ta te katoatoa e rave ra no te mea kua rave au i te au angaanga kino e te neneva.”

Me iki tatou i te mea tika e te tarevake, ka puapinga to tatou uaorai manako e te manako o tetai ke. Inara, kare teia nga mea e rua e akatupu ua rai i te meitaki. Ka rokoia tatou e te tumatetenga no to tatou tu kamakura e ka tupu te kino ki tetai ke no tatou au ikianga. (Maseli 14:12) E kare e akapapuanga me e mea meitaki to tatou uaorai manako e te manako o tetai ke, e kare e anoanoia te tauianga. Ko te tika, ko te au peu tei manakoia e mea tarevake i te tuatau mua, ka ārikiia e te katoatoa i teianei. E te mea tei manakoia e meitaki, e tarevake te reira i teia tuatau.

E ravenga meitaki atu ainei tetai no te iki i te tika e te tarevake? E kaveinga tau ainei tetai ta tatou ka aru i teia rā te ka akatupu i te meitaki no te au mataiti ka aereia mai?

E tauturu tetai te ka oronga mai i te kaveinga meitaki e ka puapingaia te katoatoa i te au ngai ravarai. I te atikara ka aru mai, ka uriuri tatou e eaa te arataki meitaki rava atu no te iki i te tika e te tarevake.