Te Tika e te Tarevake: Naau Rai te Ikianga
Ko te au kaveinga ta tatou ka iki i te aru i roto i to tatou oraanga, ka akatupu te reira i te mataora me kore te mamae. Kua kite te Atua ko Iehova i teia. No reira aia i inangaro ei ia tatou kia akono i tana au kaveinga.
Ka inangaro a Iehova ia tatou kia rauka te oraanga ’au e te mataora.
“Ko au toou Atua ra ko Iehova, ko tei akakite ia koe i te mea e puapinga’i koe na; ko tei arataki ia koe na te arataa e tau ei kia aere koe ra. Angairi koe i akarongo mai ki te au akauenga naku! kua riro ïa toou au mei te vai ta’e ra; e taau tuatua-tika mei te ngaru moana ra.”—Isaia 48:17, 18.
No te mea koia Tei Anga ia tatou, kua kite te Atua akapeea e rauka ai te oraanga meitaki rava atu no tatou. Te pati maira aia kia aru tatou i tana aratakianga no te mea ka puapingaia tatou. Me aru tatou i ta te Atua au akauenga, kare tatou e ekoko e ka tupu te meitaki. Mari ra, ka rave ua rai tatou i te au ikianga tau te ka akatupu i te ’au e te mataora.
Kare a Iehova e pati ia tatou kia rave i tetai mea ngatā tikai.
“Kare oki teianei akauenga taku e akaue atu kia koe i teianei rā, i te mea kitea koreia e koe ra, kare oki tei te mamao ke.”—Deuteronomi 30:11.
Me aru tatou i ta te Atua au kaveinga, ka anoanoia kia taui i to tatou aerenga manako e ta tatou au peu. Inara, kare a Iehova e pati ia tatou kia rave i tetai mea ngatā tikai. Koia Tei Anga ia tatou e kua kite meitaki aia i ta tatou ka rauka i te rave. Me apii tatou ia Iehova, ka kite mai tatou e “kare oki tana au akauenga i te mea teiaa.”—1 Ioane 5:3.
Taputou mai a Iehova i te tauturu i te aronga tei akono i tana au kaveinga.
“Ko au oki to Atua ra, ko Iehova, ko tei akamaroiroi i to rima katau ra; ko tei tuatua [atu] ia koe e, Auraka e mataku, naku koe e tauturu.”—Isaia 41:13.
Ka rauka ia tatou i te akono i te au kaveinga ta te Atua e apii maira no te mea ka tauturu aia ia tatou. Na roto i tana Tuatua te Pipiria, ka akamaroiroi aia ia tatou e ka oronga mai i te manakonakoanga.
E mirioni ua atu tangata tei kite mai e na te akono anga i te au kaveinga Pipiria, kua meitaki atu to ratou oraanga. Penei ka inangaro koe i te apii i te akoanga meitaki a te Pipiria. Ei tauturu ia koe, e apii i te puka Oraanga Mataora e Tuatau Ua Atu! i runga i te jw.org. Teia te au apii te ka uriuriia:
-
Akapeea te Pipiria me Tauturu ia Koe?
-
Oronga Mai te Pipiria i te Manakonakoanga Meitaki
-
Ka Irinaki Ainei Koe i te Pipiria?
Me apii koe i te Tuatua a te Atua te Pipiria, ka kite mai koe e kare te reira i te puka taito e e puapinga rai te reira. “Ka mou rai te reira e tuatau ua atu.” (Salamo 111:8) Ka rauka te oraanga meitaki rava atu me akono koe i te au kaveinga Pipiria. Inara, kare te Atua e māro ia koe kia rave i te reira. (Deuteronomi 30:19, 20; Iosua 24:15) Naau rai te ikianga.
