Te Tika e te Tarevake: Aratakianga Puapinga
Kua tauturu te Pipiria i te mirioni ua atu tangata i roto i teia au ravenga e ā.
1. Oraanga Akaipoipo
E tukeke te manako o te tangata no runga i te oraanga akaipoipo e eaa te ka anoanoia kia mataora te reira.
KARANGA TE PIPIRIA: “E aroa ra te tangata katoa i tana uaorai vaine mei te aroa iaia uaorai; e te vaine oki e kauraro aia i tana tane.”—Ephesia 5:33.
TE AITEANGA: Na te Atua i akamata i te oraanga akaipoipo, no reira kua kite aia i te ka anoanoia no tetai nga tokorua kia mataora. (Mareko 10:6-9) Me akono te tane e te vaine i tetai e tetai e kare ia raua uaorai, ka tupu te mataora. Me akaperepere te tane i tana vaine, ka akaari aia i te reira na te akono meitaki anga i tana vaine. E me akangateitei te vaine i tana tane, ka akaari aia i te reira na roto i tana tuatua e tana ka rave.
PUAPINGAIA TE ARATAKIANGA PIPIRIA: Kua kite mai a Quang e Thi mei Vietnam mai e kare to raua oraanga akaipoipo e mataora ana. E tu kino to Quang. Karanga aia: “E akakino ana e e taakamā ana au ia Thi.” Kua inangaro a Thi i te akaruke i tana tane. Karanga aia: “Kare au e irinaki e te akangateitei akaou iaia.”
Noatu ra, kua apii a Quang e Thi i te Pipiria e akapeea raua me taangaanga i te akoanga i roto ia Ephesia 5:33 i roto i to raua oraanga akaipoipo. Karanga a Quang, “Kua tauturu teia irava iaku kia akaari i te tu meitaki e te akono ia Thi i te pae materia, pae kopapa, e te pae manako. Na roto i teia, kua akaperepere e kua akangateitei aia iaku.” Kua akakite katoa a Thi, “Me taangaanga putuputu au ia Ephesia 5:33 e te akangateitei i taku tane, te maata atu i tona inangaro iaku, te paruru iaku e te akatupu i te ’au.”
No tetai akakiteanga no runga i te oraanga akaipoipo, e tatau i te E Ara! Nu. 2 2018, te tumu manako “E 12 Tauturu Kia Puapingaia te Ngutuare” i runga i te jw.org.
2. Me Akono i Tetai Ke
Ka akakino te tangata i tetai ke no to ratou reo, te enua, to ratou tu, te akonoanga e to ratou manako no te peu ainga.
KARANGA TE PIPIRIA: “E akangateitei atu i te tangata ravarai.”—1 Petero 2:17.
TE AITEANGA: Kare te Pipiria e apii ana ia tatou kia akavaavaa i te tangata mei tetai enua ke, te reo, te pirianga tane ki te tane e te vaine ki te vaine. Mari ra, te akamaroiroi maira te reira ia tatou kia akangateitei i te au tangata ravarai noatu noea mai ratou, to ratou reo, te enua, me e aronga moni me kore e putaua ratou. (Angaanga 10:34) Noatu kare tatou e āriki i ta tetai ke e irinaki ra me kore ta ratou e rave ra, kia takinga meitaki tatou e te akangateitei ia ratou.—Mataio 7:12.
PUAPINGAIA TE ARATAKIANGA PIPIRIA: Kua apii a Daniel e ko te aronga no Asia, ka akatupu ratou i te kino ki tona enua. Kua makitakita aia i tetai ua atu tangata no Asia mai e kua akakino ia ratou i te ngai tangata. Kua tuatua a Daniel “Kua manako tikai au e te paruru ra au i toku enua. Kare rava au i manako ana e tarevake taku e rave ra.”
Noatu ra, kua kite mai a Daniel i ta te Pipiria e apii maira. Karanga aia, “Kua taui au i toku manako. Kua akara au i te tangata mei te Atua rai, e aiteite pouroa tatou noatu noea mai tatou.” Kua akamārama a Daniel i tona manako i teianei me aravei aia i te tangata. Karanga aia: “Kare au e manata akaou ana e noea mai ratou. Mari ra, ka akaperepere au i te au tangata ravarai i teianei e kua rauka tetai pirianga oa ki te aronga takapini i teianei ao.”
No tetai akakiteanga, e tatau i te E Ara! Nu. 3 2020, te tumu manako “E Rapakau Ainei to te Tu Papakitai?” i runga i te jw.org.
3. Moni
Te maata anga o te tangata, kua irinaki ratou me maata te moni ka mataora ratou a te tuatau ki mua.
KARANGA TE PIPIRIA: “E akapuanga oki tei te pakari, e akapuanga tei te moni; teia ra te meitaki o te pakari, na taua pakari oki e oronga mai i te ora i te aronga pu ra.”—Koheleta 7:12.
TE AITEANGA: Ka anoano tatou i te moni, inara kare te reira e akatupu i te mataora e te oraanga tinamou a te tuatau ki mua. (Maseli 18:11; 23:4, 5) Mari ra e rauka ai te oraanga mataora e te tinamou, e taangaanga tatou i te pakari mei ko i te Atua i roto i te Pipiria.—1 Timoteo 6:17-19.
PUAPINGAIA TE ARATAKIANGA PIPIRIA: Ko tetai tangata ko Cardo mei Indonesia mai, kua akamou aia i tona manako ki runga i te apinganui. Karanga aia, “Kua rauka iaku i te au mea pouroa ta te tangata e inangaro ra, kua turoto au i te au enua ke, te oko i te au apinga moni mei te motoka e te au are.” Inara, kua ngere pouroa aia i teia au mea. Akakite a Cardo, “Kua akavare tetai tangata iaku e kua keia i taku moni, taku i angaanga pakari ana no tetai au mataiti. Kua angaanga pakari au no tetai tuatau roa kia rauka te au apinga maata. Inara i teianei kua putaua au, kua puapinga kore e te manako taitaia.”
Kua taangaanga a Cardo i te ako a te Pipiria no te moni. Kare aia e akamanako akaou ana i te oraanga kia maata te moni, mari ra kia rauka tetai oraanga māmā. Karanga aia, “Kua rauka iaku tetai apinga puapinga koia oki ko tetai pirianga ki te Atua. Ka moe meitaki ua au i te au po ma te mataora.”
No tetai akakiteanga no runga i te manako o te Pipiria no te moni, e tatau i te atikara “Na te Turanga Apii e te Moni Ainei e Rauka’i te Oraanga Tinamou?” i roto i Te Punanga Tiaki Nu. 3 2021, i runga i te jw.org.
4. Pirianga Ainga
E tukeke te manako o te tangata no runga i te pirianga ainga.
KARANGA TE PIPIRIA: “Kia kore kotou e akaturi: Kia kite kotou ravarai e pini ua ake i te vaio i tona uaorai āriki ma te tapu e te ngateitei; Auraka i te inangaro tika kore, mei te etene tei kore i kite i te Atua.”—1 Tesalonia 4:3-5.
TE AITEANGA: Kua kotingaia te pirianga ainga i roto i te Pipiria. Ko te ainga tau kore, te kapiti maira i te akaturi, te pirianga ainga i rotopu i te aronga kare i akaipoipo, te oraanga homosexual, e te pirianga ainga ki te manu. (1 Korinetia 6:9, 10) E apinga aroa te pirianga ainga ta te Atua i oronga anake no te tane e te vaine i roto i te oraanga akaipoipo.—Maseli 5:18, 19.
PUAPINGAIA TE ARATAKIANGA PIPIRIA: Karanga tetai vaine ko Kylie no Autireria mai: “Ei vaine mapu kare i akaipoipo, kua manako au me piri ainga au ki tetai tangata, ka akaperepereia au e ka tupu te oraanga tinamou. Inara, kare te reira i tupu ana. Kua manako puapinga kore au iaku e te mamae ngakau.”
I muri mai, kua apii e kua taangaanga a Kylie i ta te Pipiria e apii ra no te pirianga ainga. Karanga aia, “Te kite nei au i ta te Atua au kaveinga tei paruru iaku mei te mamae ngakau.” “I teianei, e oraanga mataora e te tinamou toku no te mea te rave nei au i ta Iehova e anoano ra noku. Kua paruru te aratakianga a te Pipiria iaku kia kore e mamae ngakau!”
No tetai akakiteanga, e tatau i te atikara “Eaa ta te Pipiria e Karanga ra no te Noo Kapiti Kare e Akaipoipo?” i runga i te jw.org.
Ka tauturu Tei Anga ia tatou kia kite i te tika e te tarevake. Noatu kare i te mea māmā i te aru i ta Iehova au aratakianga, ka puapingaia tatou. Kia irinaki e ka taki te reira ki te oraanga mataora e te tinamou.