Te Tika e te Tarevake—E Kaveinga Irinakiia
Me akatumu tatou i ta tatou ikianga ki runga i to tatou manako e ta tetai pae e manako ra, e mea papu ka tupu te manamanata. Te akakite maira te Pipiria i te tumu. Ka tauturu te reira ia tatou kia kite i te tika e te tarevake e kia mataora te oraanga.
KA ANOANOIA TE ARATAKIANGA
I roto i te Pipiria, kua akamārama mai te Atua ko Iehova a e kua anga aia i te tangata kia aru i tana aratakianga, kare kia akaaere ia ratou uaorai. (Ieremia 10:23) No reira aia i oronga mai ei i te au kaveinga i roto i te Pipiria. Kua akaperepere aia i te tangata e kare aia e inangaro ia ratou kia rokoia e te kino. (Deuteronomi 5:29; 1 Ioane 4:8) No te mea koia Tei Anga ia tatou, tei iaia te kite e te pakari ei tauturu ia tatou kia rave i te au ikianga meitaki. (Salamo 100:3; 104:24) Inara, kare te Atua e māro i te tangata kia aru i tana au kaveinga.
Kua oronga a Iehova ki te nga tangata mua ko Adamu e Eva i te au mea ta raua i anoano kia mataora raua. (Genese 1:28, 29; 2:8, 15) Kua oronga katoa aia i te au aratakianga kia akono raua. Inara, kua akaruke aia e na raua e iki me ka aru raua i tana aratakianga e me kare. (Genese 2:9, 16, 17) Ma te mii, kua iki a Adamu raua ko Eva i te aru i to raua manako, kare i ta te Atua aratakianga. (Genese 3:6) Eaa tei tupu? Kua mataora ainei te tangata i ta raua ikianga no te tika e te tarevake? Kare. I te au mataiti i aereia mai, kua kite mai tatou e me kopaeia te au aratakianga a te Atua, kare e tupu te ’au e te mataora.—Koheleta 8:9.
Kua oronga mai te Pipiria i te aratakianga te ka tauturu ia tatou kia iki i te mea tau noatu e noea mai tatou. (2 Timoteo 3:16, 17; akara i te pia “ E Puka na te Katoatoa.”) Akamanako eaa ta te Pipiria e akakite maira.
Apii i te tumu i kapikiia ai te Pipiria e ‘tuatua na te Atua.’—1 Tesalonia 2:13. Akara i te vitio Naai i Tata i te Pipiria? i runga i te jw.org.
AKAKITE MAI TE PIPIRIA I TA TE ATUA ARATAKIANGA
Te akakite maira te Pipiria i ta Iehova akono anga i te tangata mei te akamataanga. Ka tauturu te reira ia tatou kia mārama i to te Atua manako no te tika e te tarevake, te meitaki e te kino. (Salamo 19:7, 11) Ka tauturu tana kaveinga ia tatou kia rave i te au ikianga meitaki i roto i to tatou oraanga i te au rā ravarai.
Ei akaraanga, akamanako i te akoanga i roto ia Maseli 13:20: “Ko tei kapiti katoa i tona aerenga ki to te aronga pakari ra, ka pakari katoa ïa: ko tei kapiti ra ki te aronga neneva ra, e mate ïa.” Ka tau rai te reira kaveinga no teia tuatau, mei to mua ana. Kua kī te Pipiria i te au kaveinga meitaki e te puapinga.—Akara i te pia “ Te Pakari o te Pipiria.”
Penei ka ui koe, ‘Akapeea te aratakianga a te Pipiria me tauturu iaku i teia rā?’ Ka pau tatou i teia i roto i te atikara ka aru mai.
a Ko Iehova te ingoa o te Atua.—Salamo 83:18.
