Eaa taau ka tuatua me ui mai tetai e, “Ka inangaro ainei koe kia ora e tuatau ua atu?” Te maata anga ka pau ratou e ae, inara manako ratou e kare i te mea tika kia irinaki i te reira. Ka karanga ratou e mea matauia te mate, ka tupu kia tatou katoatoa.

Inara, akapeea me ui mai tetai e, “Ka inangaro ainei koe i te mate?” Ka akakite mai te maata anga e kare. Noatu te au turanga ngata e te au akaaoanga, ka inangaro tatou i te ora. Te akaari maira te Pipiria e kua anga te Atua i te tangata ma te inangaro kia ora e tuatau ua atu. Te tika, “kua tuku aia i te manako [mutu kore] ki roto i to ratou ngakau.”​—Koheleta 3:11.

Inara, kare te tangata e ora ana e tuatau ua atu. No reira eaa te tarevake? Kua rave ainei te Atua i te akatikatika i teia turanga? E mea pumaana tikai te au pauanga i roto i te Pipiria, e te akamārama maira i te tumu i mamae ei e i mate ei a Iesu.

I te pene mua e toru o te puka o Genese, te akakite maira e kua tuku te Atua kia Adamu raua ko Eva, te manakonakoanga no te ora mutu kore. Kua akakite katoa aia eaa ta raua ka rave kia rauka te reira. E oti, kua akataka mai te papaanga e kare raua i akarongo ana ki te Atua, e kua ngere i taua manakonakoanga. Kua akakiteia teia tua ma te māmā ua​—no reira rai te maata anga i karanga ai e tua maani ua. Inara mei te au Evangeria rai, te akaari maira te puka o Genese e e tika tikai teia tuatua enua. *

Eaa tei tupu te akarongo kore anga a Adamu? Te pau maira te Pipiria e: “No te tangata okotai ra i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa.” (Roma 5:12) No tona akarongo kore ki te Atua, kua ara a Adamu. No reira kua ngere aia i te manakonakoanga no te ora mutu kore e i muri mai kua mate aia. Ei uanga nana, kua iri mai tona tu ara ki runga ia tatou. Tei tupu, ka tu tatou i te maki, te ruaine, e te mate. Te rotai ra teia akamārama anga ki ta tatou i kite no te tu tei iri ki runga i tana uanga. Inara e apinga ainei ta te Atua i rave kia akatikatika i teia turanga?

Ae, kua rave te Atua i te au akanoonoo anga kia akaora me kore kia akaoki i ta Adamu i ngere, koia oki te manakonakoanga o te ora mutu kore. Akapeea te Atua i te rave anga i teia?

Te akakite ra a Roma 6:23: “E utunga te mate no te ara.” Te aiteanga, ka akatupu te ara i te mate. Kua ara a Adamu, no reira kua mate aia. Mei te reira katoa, kua ara tatou no reira tei raro ake tatou i te utunga o te ara koia te mate. Inara kare na tatou te apa, kua anauia tatou ma te ara. No teia, kua tono mai te Atua i tana Tamaiti ko Iesu kia apai ke i te ‘utunga no te ara.’ Akapeea teia me tupu?

Na te tangata okotai apa kore ko Adamu, tei apai mai i te ara e te mate ki runga ia tatou no tona akarongo kore, no reira kua anoanoia tetai tangata apa kore tei akarongo kia akamatara mai ia tatou mei te utunga o te ara. Te akamārama maira te Pipiria: “Mei te tangata katoa e manganui i akariroia ei tangata ara i te akono kore o te tangata okotai ra, manganui oki tei akariroia ei tangata tuatua-tika i te akono a te tangata okotai ra.” (Roma 5:19) Ko Iesu taua “tangata okotai ra.” Kua akaruke aia i te rangi, kua riro mai ei tangata apa kore *, e kua mate aia no tatou. Tei tupu, ka rauka ia tatou i te riro mai ei aronga tuatua tika i mua i te Atua e kia rauka te manakonakoanga no te oraanga mutu kore.

Inara eaa te tumu i anoanoia ai a Iesu kia mate ei akatupu i teia au mea? Kare ainei te Atua Mana Katoatoa i rauka i te tuku i tetai akauenga kia ora te uanga a Adamu e tuatau ua atu? E tika, e mana tona kia akapera. Inara na te rave anga i teia, ka kopae aia i tana ture koia oki, te utunga o te ara, e mate. Kare teia i te ture puapinga kore ua te ka rauka i te taui. E mea puapinga tikai te reira kia tau ki tana tuatua tika.​—Salamo 37:28.

Naringa kua kopae te Atua i tana tuatua tika i roto i teia turanga, penei ka manako te tangata e ka rave akaou aia i te reira i te au atianga ke. Ei akaraanga, ka akaari ainei aia i te tu tau me iki e koai ma te uanga a Adamu te ka tau no te ora mutu kore?  Ka rauka ainei kia irinaki iaia kia akatupu i tana au taputou? Na te aru anga i tana tuatua tika i te akaora anga mai ia tatou, e akapapu anga te reira e ka rave ua rai te Atua i te mea tika.

Na roto i to Iesu matenga, kua akatuera te Atua i te manakonakoanga no te ora mutu kore i te enua Parataito. E akamanako ana i ta Iesu tuatua i roto ia Ioane 3:16: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” Kare te matenga o Iesu i akaari ua mai i te tuatua tika no te Atua mari ra tei maata rava atu, te akaari maira i tona aroa maata no te tangata.

Inara, eaa te tumu i anoanoia ai a Iesu kia tamamaeia e kia tamateia mei tei akatakaia i roto i te au Evangeria? Na te tuku anga iaia uaorai ki roto i te timata anga pakari e te vai tiratiratu anga, kua patoi a Iesu i te au maro anga a te Tiaporo e kare te tangata e vai tiratiratu ki te Atua me aro atu i te timata anga. (Iobu 2:4, 5) I te akara anga, kua tau rai teia maro anga no te mea kua timata a Satani i te tangata apa kore ko Adamu kia rave i te ara. Inara ko Iesu, e tangata apa kore mei ia Adamu rai, kua akarongo aia noatu te au tamamae anga pakari. (1 Korinetia 15:45) Kua akapapu i reira aia e ka rauka ia Adamu i te akarongo i te Atua naringa aia i iki i te rave i te reira. Na te akakoromaki anga i te au timata anga, kua akanoo a Iesu i te akaraanga no tatou kia aru. (1 Petero 2:21) Kua akameitaki te Atua i te tu akarongo apa kore o tana Tamaiti, te oronga anga i te oraanga mate kore no Iesu i te rangi.

Kua tupu tikai te matenga o Iesu. Kua akatueraia te mataara ki te ora mutu kore. Ka inangaro ainei koe kia ora e tuatau ua atu? Kua akaari mai a Iesu eaa ta tatou ka rave i te na ko anga e: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.”​—Ioane 17:3.

Te pati nei te aronga nenei o teia makatini ia koe kia apii maata atu no runga i te Atua mou ko Iehova, e tana Tamaiti ko Iesu Karaiti. Ka mataora te Au Kite o Iehova i toou ngai i te tauturu atu ia koe. Ka rauka katoa te au akakite anga me aere koe ki ta matou website, www.pr418.com.