I ROTO i to Jordan rima tetai apinga akakoi penitara tei taraiia mei te paī rai, i te akara anga e mea umere kore. Inara, ko teia tana apinga akaperepere roa atu. Akamārama a Jordan, “Ko Russell, e taeake pakarikari no te ngutuare, nana i oronga mai i teia kiaku i toku tamariki anga.” I muri ake i to Russell mateanga, kua apii a Jordan e kua riro a Russell ei akakeuanga maata i roto i te oraanga o tona papa ruau e tona nga metua, tei akamaroiroi ia ratou i te au tuatau ngata. “I teianei e maata atu taku i kite no runga ia Russell,” i na Jordan ei, “kua riro teia apinga aroa meangiti ei mea akaperepere maata kiaku.”

Tei akatutuia mai i roto i ta Jordan akaraanga, penei ka riro tetai apinga aroa ei mea puapinga kore ki tetai papaki. Inara ki te tangata tei rauka mai teia apinga aroa, ka riro ei mea akaperepere nana. Te akataka maira te Pipiria i tetai apinga aroa kare ona aite na roto i teia au tuatua rongonui: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.”​—Ioane 3:16.

E apinga aroa te ka oronga mai i te ora mutukore! Eaa atu te apinga aroa te aite ra tona puapinga? Noatu e kare tetai pae i kite i te puapinga o teia apinga aroa, “e maata ua atu ïa” tona puapinga ki te au Kerititiano mou. (Salamo 49:8; 1 Petero 1:18, 19) Inara, eaa te tumu i oronga mai ei te Atua i te oraanga o tana Tamaiti ei apinga aroa ki to te ao nei?

Akamārama te apotetoro ko Paulo i te tumu i te na ko anga e: “No te tangata okotai ra i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate.” (Roma 5:12) Te tangata mua ko Adamu, kua akakoro aia i te ara na te akarongo kore anga ki te Atua e no reira kua akautungaia aia kia mate. Na roto ia Adamu, kua taea katoaia te mate ki tana uanga​—te tangata katoatoa.

 “E utunga te mate no te ara; kareka te ora mutu kore ra, e mea oronga uaia mai e te Atua i roto i to tatou Atu ia Iesu Mesia.” (Roma 6:23) Ei akamatara i te tangata mei te utunga o te mate, kua tono te Atua i tana Tamaiti ko Iesu Mesia, ki te enua nei ei akaatinga i tona oraanga apa kore no te ao katoa. Kia tau ki teia atinga, tei kapikiia e ko te “oko,” ka rauka mai te aronga pouroa tei tuku i te akarongo ki roto ia Iesu te ora mutukore.​—Roma 3:24.

No runga i te au akameitakianga ta te Atua e oronga ra ki tona aronga akamori na roto ia Iesu Mesia, kua akakite a Paulo: “Kia akameitakiia te Atua i tona oronga kare e tika kia tuatua.” (2 Korinetia 9:15) Ae, e apinga umere tikai te oko kare e rauka ia tatou i te akataka. Inara i te au apinga aroa ta te Atua i oronga ki te tangata nei, no teaa ra te oko i riro ei ei mea umere tikai? Akapeea teia apinga aroa a te Atua kare ona aite? * E akapeea tatou me ariu ki te reira? Te pati nei matou ia koe kia tatau i te pauanga a te Pipiria ki teia au uianga i roto i te nga atikara ka aru mai.