Te akara etu e ravenga purepure tei irinaki e kua riro te au etu, te marama e te au paraneta ei akaaere i te oraanga o te tangata i te enua nei. Irinaki te aronga akara etu e na teia au mea e akaaere i te oraanga o tetai tangata me anauia mai aia, tona au tu e eaa te ka tupu kiaia a te tuatau ki mua.

Noatu no Babulonia mai teia peu te ngai i akamata ai, te irinaki nei rai te au tangata i te reira. I roto i tetai kimikimianga i te 2012 i Marike, manako tetai pae e ko te akara etu e “kite taieni,” ta tetai pae kua papu ia ratou e “e kite taieni.” E tika ainei? Kare. Teia te tumu.

• Kare o te au paraneta e te au etu pirianga ki te oraanga tangata mei ta te aronga akara etu e karanga ra.

• Te au tamanako anga tei raveia, kare no tetai tangata anake ua mari ra no te katoatoa.

• Te au tamanako anga a te aronga akara etu i teia tuatau, kua akatumuia te reira ki runga i te irinakianga e te takapini nei te au paraneta i te enua. Inara ko te tika, te takapini nei te au paraneta i te ra.

• Tuke ke te au tamanako anga a te aronga akara etu me akakite ki tetai tangata okotai.

• Kua akanoo te aronga akara etu i te au tangata ki roto e 12 tuanga, me kore te au akairo kia tau ki to ratou rā anauanga. No te mea ra e taui ana te ngai e taka ana te enua i te au anere mataiti, kare te rā anauanga, te au akairo e tano akaou ki te tuatau e iti ana te ra ki runga i te pupu etu i kapikiia ai to ratou ingoa.

Ka akakite mai teia au akairo i te tu o tetai tangata. Te tika anga, tuke ke te tu o te aronga tei aiteite to ratou rā anauanga; kare te rā anauanga e akakite mai i tona au tu. Kare te aronga akara etu i kite i te tu tikai o te tangata, inara ka tamanako ua ratou i te reira na roto i te au mea ta te reira tangata e rave ra. Kare ainei teia i te tu papakitai?

Mei te tuatau taito mai, kua ui te tangata i te au uianga ki te aronga purepure. Ka kimi ratou i te pauanga i roto i te kopu o tetai manu me kore o te tangata, me kore ra i roto i te tu me kai te moa i tana kai. Ta tetai pae ka kimi ratou i roto i te rau rakau me kore te kaope. I teia rā e taangaanga ana ratou i te pere, te poro io, te pere toka e tetai ua atu ravenga kia “kite” i te ka tupu ki tetai tangata. Ka tau ainei kia irinakiia te purepure kia akakite mai i te ka tupu? Kare. Ka uriuri tatou no runga i teia.

Akamanako ana, noatu e tuke ke te au ravenga i te akakite mai i te pauanga, kare e aiteite ana te tamanakoanga a te aronga purepure. Ei akaraanga, me ui tetai tangata ki te aronga purepure i taua uianga rai no runga i te ka tupu kiaia. Te tikaanga ka aiteite te pauanga no te mea ka taangaanga ratou i taua ravenga rai. Inara kare te reira e tupu ana.

E ekoko ana te tangata i te pauanga a te aronga purepure. Akaapa ratou e ko te pere e te poro io e au mea maani ua e ka akakite mai te aronga purepure i te tu o tetai tangata kare ko tana e kite ra i roto i tana apinga purepure. Ei akaraanga, ka ui tetai tangata purepure i tetai au uianga, e ka akara ratou i te tu me pau mai te tangata, na te reira e akakite mai kia ratou i te pauanga. Na roto i teia ka akameitakiia te tangata purepure no tana i kite mai. No te mea kua irinaki tetai au tangata i teia aronga purepure, kua oronga ratou i tetai moni maata ei tutaki i teia aronga.

Karanga te aronga akara etu e te purepure e kua akakoro takereia kia tupu te au mea no tatou a te tuatau ki mua. E tika ainei te reira? Akakite mai te Pipiria e ka rauka ia tatou te iki i ta tatou ka irinaki me kore ka inangaro, e ka riro ta tatou au ikianga ei kaveinga no te tuatau ki mua.—Iosua 24:15.

E tumu tetai i kopae ei te aronga akamori i te Atua i te au peu akara etu e te purepure, no te mea e peu rikarikaia e te Atua. I roto i te Pipiria ka kite tatou i teia au tuatua: “Auraka rava tetai e kitea i rotopu ia kotou . . . ei tauraatua, e te akara tumurangi, e te purepure, e te akarakara, E te kebere, e tei kimi i te vaerua kino, e te peu purepure, e tei ui ki tei mate ra. Ko te aronga katoa oki i rave i te reira au peu e aronga viivii ïa na Iehova.” a—Deuteronomi 18:10-12.