KA RAUKA AINEI IA KOE TE IKI EAA TE KA TUPU A TE TUATAU KI MUA? Irinaki tetai aronga e kua tupu te au mea i roto i to ratou oraanga no te mea kua akakoroia te reira, kare no te mea kua iki ratou. Me kare e tupu ta ratou i manako, karanga ratou e “kua akakoroia rai kia akapera!”

Kare tetai pae e mataora me kare e ravenga ke atu mei teia au kino e tupu nei. Tauta ratou i te akameitaki i to ratou oraanga—inara te tupu ra rai te au kino mei te tamaki, te ta tangata, te au tumatetenga natura, e pera te au maki. Ui ratou kia ratou uaorai, ‘Eaa au ka kaimoumou ei i toku taime?’

E tika rai e ka riro teia au turanga i te akakore i taau e anoano ra kia tupu. (Koheleta 9:11) Inara, me inangaro koe kia mataora toou oraanga a te tuatau ki mua, e ikianga tetai ka anoanoia koe kia rave. Te akakite maira te Pipiria e ko te au mea ka tupu a te tuatau ki mua, tei runga i taau ka iki. Akamanako i teia au tuatua.

Akakite a Mose te arataki o te ngati Iseraela, ki tona iti tangata i mua ake ka tomo ei ratou ki roto i te Enua Taputouia: “Kua tuku au i te ora e te mate, i te meitaki e te kino, ki mua ia koe: e tenana, ka rave i te ora, kia ora koe e toou katoa uanga: Kia inangaro oki koe i to Atua ra ia Iehova, e kia akarongo koe i tona reo, e kia piri atu koe kiaia.”—Deuteronomi 30:15, 19, 20.

“Kua tuku au i te ora e te mate, i te meitaki e te kino, ki mua ia koe: e tenana, ka rave i te ora.”—Deuteronomi 30:19

Ae! Kua akaora te Atua i te ngati Iseraela mei te tuikaa i Aiphiti, e kua oronga i tetai oraanga mataora no ratou i roto i te Enua Taputouia. Inara kare te reira e tupu ua mai. E rauka ai teia akameitakianga, ka anoanoia ratou kia iki i te “ora.” Akapeea ratou me rave i te reira? ‘Na te inangaro anga i te Atua, akarongo i tona reo e kia piri vaitata kiaia.’

I teia tuatau, e ikianga katoa taau ka rave, e ka riro na te reira e akatupu i te au mea noou a te tuatau ki mua. Me inangaro koe i te Atua, me akarongo i tona reo, e te piri vaitata kiaia, te iki ra koe i te ora—te ora mutu kore i runga nei i te enua parataito. Inara eaa tei anoanoia no teia au takainga?

Ko te aroa to te Atua tu maata rava atu. Kua akauruia te apotetoro ko Ioane kia tata e “ko te Atua oki te aroa.” (1 Ioane 4:8) I te uiia anga e eaa te akauenga maata roa atu, karanga a Iesu e: “E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.” (Mataio 22:37) Kare e tupu tetai pirianga vaitata ki te Atua ko Iehova, no te mataku me kore kia akarongo ua, mari ra no te inangaro. Eaa ra tatou ka iki ei i te inangaro i te Atua?

Kua aite to Iehova aroa no te tangata, mei to tetai metua aroa rai i tana tamariki. Noatu te tu apa, ka apii te au metua aroa, ka akamaroiroi, ka tauturu e ka ako i ta ratou tamariki no te mea te inangaro ra ratou kia mataora e kia meitaki te oraanga o te tamariki. Eaa ta te au metua e anoano maira mei te tamariki? Anoano ratou kia inangaro mai ta ratou tamariki ia ratou, e kia tamou i te apiianga ei meitaki rai no ratou. Kare ainei i te mea papu e te inangaro maira to tatou Metua i te rangi kia akaari tatou i te aroa maata rava atu no te au mea ravarai tana i rave no tatou?

I roto i te Pipiria, te aiteanga o te tuatua “akarongo” koia oki kia “kauraro.” Kare ainei ko teia te aiteanga me karangaia ki tetai tamaiti e, “Akarongo ki toou nga metua”? Kia akarongo i te reo o te Atua, ka tamou tatou i te apiianga e ka kauraro kiaia. Noatu kare tatou e rongo i Tona reo, ka akarongo tatou kiaia na roto i te tatau e te taangaanga i tana Tuatua te Pipiria.—1 Ioane 5:3.

Ei akaari i te puapinga no te akarongo i te reo o te Atua, akakite a Iesu e: “Kare o te kai anake ra te mea e oraʼi te tangata nei, ko te au mea katoa ra no roto mai i te vaa o te Atua ra.” (Mataio 4:4) Mei te kai e apinga puapinga kia tatou, koia katoa kia kite i te pakari o te Atua, ko tetai mea puapinga rava atu te reira. No teaa ra? Kua tuatua te Ariki ko Solomona e: “E akapuanga oki tei te pakari, e akapuanga tei te moni; teia ra te meitaki o te pakari, na taua pakari oki e oronga mai i te ora i te aronga pu ra.” (Koheleta 7:12) Te kite e te pakari mei ko mai i te Atua, ka paruru te reira ia tatou i teia rā e ka tauturu katoa ia tatou kia rave i tetai ikianga meitaki kia ora e tuatau ua atu.

Akamanako ana i te akatutuanga a Iesu i roto i te atikara i muaʼo, karanga ra aia e: “Te kokota ua nei te ngutupa, e te piri oki o te ara, e tae atu ei ki te ora, e tokoia ua ake tei kite atu i te reira.” (Mataio 7:13, 14) Me ka na runga tatou i te reira mataara, ka puapingaia tatou me aru e me piri vaitata tatou ki tetai arataki meitaki e tae ei—ki te ora mutu kore. No reira tatou ka anoanoia ai kia piri vaitata ki te Atua. (Salamo 16:8) Akapeea ra tatou me rave i te reira?

I te au rā ravarai, e maata te au mea kia rave tatou e e maata katoa te au mea ka inangaro tatou i te rave. Ka riro ra teia ei kaimoumou i to tatou tuatau e ka manako tatou e kare e taime no te rave i ta te Atua e inangaro maira ia tatou kia rave. No reira te akamaara maira te Pipiria kia tatou e: “E tenana, kia matakite i to kotou aerenga, eiaa mei ta te kite kore, mei ta te aronga pakari ra. Ma te taporoporo marie i te tuatau, no te mea e tuatau kino teia.” (Ephesia 5:15, 16) Kia piri vaitata tatou ki te Atua na te tuku anga iaia na mua i roto i to tatou oraanga.—Mataio 6:33.

Kare e rauka ia koe i te taui i te au mea i tupu, inara ka rauka ia koe i te iki i tetai oraanga meitaki noou e toou ngutuare tangata no te tuatau ki mua. Karanga te Pipiria e te aroa maira to tatou Metua ko Iehova ia tatou, e ka akakite mai aia eaa tana ka inangaro ia koe kia rave. Akamanako i te tuatua a te peroveta ko Mika:

“Kua akakite mai aia kia koe, e te tangata na, i te mea meitaki: e eaa ta Iehova inangaro ia koe ra, mari ra ko te rave i te tuatua-tau, e kia inangaro i te aroa, e te aerenga akamako tikai i to Atua ra?”—Mika 6:8.

Ka āriki ainei koe i te patianga a te Atua kia aru iaia e kia rauka ia koe te au akameitakianga tana i akakoro noou a te tuatau ki mua? Naau te ikianga!