KUA MANAKO akapera ana koe, e kare koe e inangaro kia ora ua atu rai? Kua mārama i reira koe i to Adriana manako. E maki manako to Adriana e ka apiapi aia ma te manako puapinga kore i te au taime ravarai.

Akamanako katoa ia Kaoru no Tiapani mai, e tiaki ana aia i tona nga metua makimaki e te pakarikari. Karanga aia: “I te reira taime e maata tikai te manamanata i taku ngai angaanga. Aere ua rai, kare au e kaikai meitaki akaou e kare e moe meitaki ana. Manako mai au e ka ngaro teia tu me ka mate ake au.”

Karanga a Ojebode no Nigeria mai, “E maromaroa ua ana au e ka pururu toku roimata, no reira ka kimi au i tetai ravenga kia mate au.” Te mea meitaki, kare a Ojebode, a Kaoru, e Adriana i tamate ia ratou uaorai. Inara i te au mataiti ravarai, e tauatini ua atu tangata tei rave i te reira.

E au tane te maata anga o te aronga tei tamate ia ratou uaorai no te akamā i te pati tauturu. Karanga a Iesu e ka anoanoia te aronga maki kia aere ki te taote. (Luka 5:31) No reira me kua aite toou turanga ki teia, eiaa e akamā i te pati tauturu. Te maata anga o te tangata tei tu ia e te maki manako, ka rauka i te au taote i te tauturu ia ratou. Kua tauturu te au taote ia Ojebode, Kaoru, e Adriana, e i teianei kua rauka ia ratou i te akakoromaki i to ratou turanga.

Penei ka oronga atu te taote i tetai vairakau me kore tetai ravenga ke i te tauturu ia koe. Ka anoano katoaia kia mārama toou ngutuare tangata e te au oa i toou turanga e kia tauturu ia koe. Ko te oa meitaki rava atu ra, ko Iehova, ko tei oronga mai i te Pipiria ei tauturu ia koe.

Te aronga maki manako, ka anoanoia ratou kia aere ki te taote no tetai tuatau roa, e kia taui katoa i te au mea ta ratou i matau i te rave. Me kua tupu teia kia koe, e akamanako i te taime mataora a te tuatau ki mua mei ia Ojebode rai. Karanga aia, “Inangaro au i te kite i te tuatau me akatupuia te taputou i roto ia Isaia 33:24, te akakite ra e kare e tangata i te enua nei e karanga e ‘kua maki au.’” Mei ia Ojebode rai, e kimi i te akapumaana i roto i ta te Atua taputou no “te enua ou,” te tuatau e kore ei “te mamae.” (Apokalupo 21:1, 4) Te taputou katoa maira te reira e kare e tupu akaou te maki manako e te mamae ngakau. Ka kore rava toou au manako taitaia, e kare rava “e maaraia, kare e akamanako akaouia atu.”—Isaia 65:17.