ME AKATURI toou tokorua akaipoipo, e mea mamae tikai te reira. E tika, ka rauka i tetai pae i te akakore i te ara a tona tokorua e te akaketaketa akaou i to raua pirianga. * Inara noatu me ka meitaki mai to raua oraanga akaipoipo e me kare, ka vai ua rai te mamae ngakau o te tokorua kare i akaturi ana. Akapeea teia aronga me akakoromaki i teia mamae ngakau?

Noatu te kino o te mamae ngakau, kua kite mai te maata anga i te akapumaana mei roto i te Pipiria. Kua apii mai ratou e te kite maira a Iehova i to ratou mamae e te aue.—Malaki 2:13-16.

“I rotopu i toku nei manako mirimiri-ngata i roto iaku nei, na to akapumaana e akarekareka mai i toku vaerua.”—Salamo 94:19.

“Iaku e tatau ra i teia irava, ka akamanako au ia Iehova e tamaru maira i toku mamae ngakau, mei tetai metua aroa rai,” i karanga ai a Bill.

“I te tangata e aroa ua ra, e aroa ua katoa koe.”—Salamo 18:25.

“Kare taku tane i vai tiratiratu ana kiaku,” i akakite mai ei a Carmen, kua pou tetai au marama iaia te akaturi anga. “Inara irinaki au e ka vai tiratiratu a Iehova. Kare rava aia e akaruke iaku.”

“Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure . . . e te pati anga atu; E na te au o te Atua, ko tei maata ua atu i te kite tangata, e akamaroiroi mai i to kotou ngakau.”—Philipi 4:6, 7.

“Ka taoki ua rai au i te tatau i teia irava,” i karanga ai a Sasha. “Me pure putuputu au, ka akatupu a Iehova i te au i roto i toku oraanga.”

Pouroa te au taeake i taikuia i runga akenei, kua inangaro ratou i te tamate ia ratou i tetai taime. Inara kua apii ratou i te Tuatua a Iehova e kua akamaroiroi mai te reira ia ratou. Karanga a Bill: “No toku akarongo i puapingaia ai toku oraanga noatu te au kino tei tupu kiaku. Kua aere ana au ‘na te o ra o te maru-mate,’ te vaitata katoa maira te Atua iaku.”—Salamo 23:4.