Me Mate Tetai o Toou Akaperepere
ME KUA mate tetai tei akaperepereia e koe, penei kua kite rai koe i te au tu mamae tukeke, mei te mii, te maromaroa e te taitaia. Penei kua riri ana koe, kua tataraara e kua mataku. E penei kua manako ana koe, me e puapinga rai kia ora ua atu koe.
Kare te aue i te akairo no te tu paruparu. Te akaari maira te reira i toou inangaro maata ia ratou. Inara, ka rauka ainei ia koe te kimi i tetai akapumaana no toou mamae ngakau?
AKAPEEA TETAI PAE TE AKAKOROMAKI ANGA
Penei kare e ngaro anga toou mamae, inara ka rauka ia koe te akapumaana anga mei te au akaraanga i raro akenei:
EIAA E TĀPU I TE AUE
Kare e aiteite ana te tu me kore te roa o te tuatau me aue tetai tangata i tei mate. Inara, ka tauturu te aue anga i te akaiti mai i toou mamae ngakau. Karanga a Vanessa: “Ka aue au; inangaro au kia maru mai toku mamae.” Karanga a Sofía, te mate poitirere
anga tona teina: “E mea mamae tikai me akamanako au i tei tupu, kua aite te mamae mei te tāmā anga i tetai motu kua akamaki. Pakari tikai te mamae, inara, ka meitaki mai te reira.”AKAKITE I TOOU MANAKO KI TETAI KE
I tetai taime, kare rai koe e inangaro i te tuatua atu ki tetai tangata. Inara kare i te mea meitaki kia tāpu koe i te aue. Karanga a Jared, e 17 ona mataiti, te mate anga tona papa: “Kua akakite au i toku manako ki tetai ke. Kare paa e aiteanga o taku tuatua, inara e mea meitaki kia akakite au i taku e manako ra.” Akakite mai a Janice i tetai akaou puapinga: “E mea pumaana tikai i te tuatua ki tetai ke. Kite mai au e te mārama maira ratou i toku turanga, e te tauturu maira ratou iaku kia akakoromaki.”
ĀRIKI I TE TAUTURU
Karanga tetai taote: “Te aronga tei āriki i te tauturu a te kopu tangata e te au oa i te akamataanga o te tumatetenga, ka māmā atu ia ratou te akakoromaki i to ratou mamae.” Akakite ki toou au taeake eaa ta ratou ka rauka i te rave ei tauturu ia koe; penei te inangaro ra ratou i te tauturu, kare ra i kite ka akapeea.—Maseli 17:17.
AKAVAITATA ATU KI TE ATUA
Karanga a Tina: “Te mate anga taku tane no te maki cancer, kare aku tangata e pukapuka akaou i te akakite i toku manamanata, i na kua akakite au ki te Atua! Ka pati au kiaia kia tauturu mai iaku i te au rā ravarai. E maata tana tauturu i oronga mai.” Ko Tarsha, e 22 ona mataiti te mate anga tona mami, karanga aia: “Kua riro te tatau putuputu i te Pipiria i te akapumaana iaku. Kua rauka iaku i te kite i tetai au manako tauturu.”
AKAMANAKO I TE TUAKAOUANGA
Karanga katoa a Tina: “I mua ana, kare te tuakaouanga i akapumaana mai iaku no te mea kua inangaro au i taku tane—e te inangaro ra taku tamariki i to ratou papa. I teianei, e ā mataiti i muri mai, te mou piri nei au ki teia manakonakoanga. Ko toku ora te reira. Te tapapa nei au i te aravei akaou iaia, na teia e oronga mai i te au e te mataora kiaku!”
Kare toou mamae ngakau e viviki i te ngaro. Inara kua riro tei tupu kia Vanessa ei akamaroiroi ia tatou. Karanga aia, “Ka manako koe e kare koe e mataora akaou, inara ka meitaki akaou mai rai toou oraanga.”
E akamaara, noatu kare e ngaro toou mamae ngakau, e puapinga rai to te oraanga. Ma te tauturu aroa a te Atua, ka rauka ia koe tetai pirianga oa tumanava e tetai oraanga mataora tikai. E kare e roaia atu, ka akatuakaou mai te Atua i te aronga tei mate. Inangaro aia kia aravei akaou koe i toou au akaperepere. I reira toou mamae ngakau e kore ei, e tuatau ua atu!