ME KUA ora mai ana koe mei tetai tumatetenga natura, ka mārama koe eaa ta tetai aronga i na roto ana: te mataku, te ngere, te taitaia, te apiapi e te moe kino i te po. Te maata anga o teia aronga, kua kore to ratou inangaro i te akameitaki akaou i to ratou oraanga.

Me kua ngere koe i taau au apinga i roto i tetai tumatetenga natura, penei ka manako rai koe e kare e rauka akaou ia koe te akakoromaki. Penei ka ō mai te manako e kare koe e inangaro i te ora ua atu rai. Inara, te akakite maira te Pipiria e ka puapinga rai te oraanga e ka rauka ia koe te manakonakoanga no tetai oraanga meitaki a te tuatau ki mua.

Karanga a Koheleta 7:8: “E ngari ake te openga ra i te akamataanga.” Me te akameitaki akaou ra koe i toou oraanga mei tetai tumatetenga, penei ka manako koe e puapinga kore te reira. Inara me akakoromaki koe i te rave anga i te reira, ka meitaki mai toou turanga.

Kua totou mai te Pipiria e e tuatau tetai “kare oki e kitea akaouia . . . te reo aue, e te reo evakaku.” (Isaia 65:19) Ka tupu teia me riro te enua ei parataito i raro i te tutaraanga a te Patireia o te Atua. (Salamo 37:11, 29) Kare te au tumatetenga natura e tupu akaou. To tatou au taitaia e te mamae ka akakoreia te reira, no te mea kua taputou mai te Atua Mana Katoatoa e: “Kare oki tei muatangana ra e maaraia, kare e akamanako akaouia atu.”—Isaia 65:17.

Akamanako ana: Kua karanga Tei Anga ia tatou e ka “oronga atu au ia kotou i te openga ta kotou i manako ra”—e oraanga au i raro i ta te Atua tutaraanga. (Ieremia 29:11) Me kite koe i teia tuatua mou, ka tauturu ainei te reira ia koe kia akapuapinga i toou oraanga? Karanga a Sally, “Me akamanako ua rai koe i te au mea ta te Patireia o te Atua ka rave a te tuatau ki mua, ka tauturu te reira ia koe kia akangaropoina i te au mea tei tupu ana, e kia akakoromaki i teia tuatau.”

Ka rauka ia koe te apii maata atu no runga i ta te Patireia o te Atua ka rave no te tangata. Ka papu i reira ia koe e noatu te tumatetenga tei tupu, e puapinga rai to te oraanga i teianei, ia koe e tiaki atura i te tuatau kare e tumatetenga natura e tupu akaou. I teianei, te oronga maira te Pipiria i te au kaveinga meitaki kia rauka ia koe te akakoromaki i te au tumatetenga. Teia tetai au akaraanga.