Akakite te au atikara i mua ake nei, e kare e roa atu, ka takore te Atua i te au tangata rave kino e te au manamanata pouroa. Papu ia tatou e ka tupu teia. No teaa ra? No te mea, taputou te Tuatua a te Atua, te Pipiria:

“Te ngaro ke nei teianei ao.”​—1 IOANE 2:17.

Ka papu ia tatou e e aronga tetai te ka ora mai, no te mea kua taputou katoa mai te Pipiria:

“Ko tei akono ra i to te Atua ra anoano, e tika ïa i te ora anga e tuatau ua atu.”

No reira, kia rauka te ora, ka rave tatou i to te Atua anoano. Kia kite i to te Atua anoano, ka apii tatou no runga iaia.

Karanga a Iesu: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) Kia ora i te openga o teia ao e kia noo e tuatau ua atu, ka anoanoia tatou “kia kite” i te Atua. E maata atu te ō maira ki te irinaki anga e e Atua tetai. Ka anoanoia kia riro mai tatou ei oa nona. Me ka inangaro koe kia rauka tetai pirianga oa meitaki, ka akapou koe i tetai taime ki toou oa. Aite rai te reira kia riro mai ei oa no te Atua. Akamanako ana i tetai au tuatua mou i roto i te Pipiria te ka tauturu ia tatou kia akatupu e kia tamou i to tatou pirianga oa ki te Atua.

E kai putuputu ana tatou i te kai. Inara karanga a Iesu: “Kare o te kai anake ra te mea e oraʼi te tangata nei, ko te au mea katoa ra no roto mai i te vaa o te Atua ra.”​—Mataio 4:4.

Teia tuatau, ka kitea ta Iehova au tuatua i roto i te Pipiria. Me apii koe i teia puka tapu, ka kite mai koe i te pirianga oa o te tangata ki te Atua i te tuatau taito, i teia tuatau, e te tuatau ki mua.

Eaa taau ka rave me inangaro koe i te akarongo ki te Atua, inara te ngata ra i te akamutu i te rave i te au mea tana i karanga e e tarevake? Me kite koe i te Atua, ka tauturu te reira ia koe.

Akamanako ana i tetai vaine, kapiki tatou iaia ko Sakura, e oraanga ainga tau kore tona. Te apii anga aia i te Pipiria, kua kite mai aia i ta te Atua akaueanga kia “rere ke atu i te akaturi.” (1 Korinetia 6:18) Kua pure a Sakura ki te Atua no te maroiroi e kua rauka iaia te akamutu i te rave i teia peu kino. Inara, te vai ra rai te au timataanga. Karanga aia, “Me tupu mai tetai manako tau kore, ka pure au kia Iehova, ma te kite e kare e rauka iaku i te patoi i te reira ko au anake. Kua akavaitata te pure iaku kia Iehova.” Mei ia Sakura, e mirioni ua atu tei kite mai i te Atua. Kua oronga Aia i te maroiroi kia ratou kia taui i to ratou oraanga taito ki te oraanga te ka akamareka iaia.​—Philipi 4:13.

Te maata atu taau ka kite no runga i te Atua, ka ‘kiteaia mai koe e te Atua’ ei oa akaperepere. (Galatia 4:9; Salamo 25:14) I reira koe e ora ai e e tae ei ki roto i te ao ou o te Atua. Inara, mei teaa te tu o tera ao ou? Ka akamārama te atikara ka aru mai i te reira.