Penei ka maara ia koe a Gail tei ekoko me ka rauka iaia te akakoromaki i te mate o tana tane ko Rob, tei taikuia i roto i te atikara i mua akenei. Inara, te tapapa atura aia i te kite akaou ia Rob i roto i te ao ou ta te Atua i taputou mai. Kua karanga aia e, “Taku irava reka rava atu ko Apokalupo 21:3, 4.” Te na ko ra e: “E noo te Atua ki rotopu ia ratou, E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”

Kua akakite a Gail e: “Te akataka maira teia irava i te au mea ravarai. Tangi tikai au i te au tangata tei takake atu to ratou akaperepere, inara kare ratou i kite i te manakonakoanga e ka ora akaou mai to ratou au akaperepere.” Kua angaanga rotai a Gail ki tana e irinaki ra na te angaanga tamou anga ei vaine tutu evangeria, te akakite anga ki tona au tangata tupu i te taputou a te Atua no te tuatau ki mua ka “kore rava te mate.”

Penei ka karanga koe e, ‘E tika tikai teia!’ Inara akamanako ana i te akaraanga o Iobu. E kino tikai tona maki. (Iobu 2:7) Noatu e kua inangaro aia kia mate aia, kua irinaki ra aia e e mana to te Atua no te akaora akaou mai iaia ki runga nei i te enua. Kua tuatua papu aia e: “Naringa koe e akapipini iaku ki te vaarua, . . . Naau e kapiki mai, e naku e io atu kia koe: e tangi rai koe ki te angaanga a to rima ra.” (Iobu 14:13, 15) Kua papu ia Iobu e kare te Atua e akangaropoina iaia e ka inangaro maata te Atua i te akaora akaou mai iaia.

Kare e roa atu ana, ka rave te Atua i teia​—no Iobu e te katoatoa—​me riro mai te enua ei parataito. (Luka 23:42, 43) Te akapapu maira te Pipiria i roto ia Angaanga 24:15 e, “E tuakaouanga to tei mate.” Te akapapu maira a Iesu kia tatou e: “Auraka e poitirere ua i te reira: te vaitata mai nei oki te ora, e akarongo ei te aronga katoa i roto i te rua i tona reo, E kua aere mai ki vao.” (Ioane 5:28, 29) Ka kite a Iobu me akatupuia taua taputou ra. Ka rauka akaou iaia i te ‘maata i te poria o tona ra kopapa i to te tamariki ra’ e ka vai ua rai tona kopapa mei “te au rā o tona ou anga ra.” (Iobu 33:24, 25) Ka tupu katoa teia ki te katoatoa tei āriki rekareka i ta Iehova apinga aroa no te tuakaouanga o tei mate ki runga nei i te enua.

Penei kua mamae ana koe no tei takake atu toou akaperepere, e kare te au mea ta tatou i uriuri ana e apai ke i toou mamae ngakau. Inara na te akamanako oonu anga i ta te Atua i taputou mai i roto i te Pipiria, ka kite mai koe i te manakonakoanga tika tikai e te maroiroi kia akakoromaki ua atu rai.​—1 Tesalonia 4:13.

Ka inangaro ainei koe kia kite maata atu akapeea me akakoromaki i te mamae ngakau? Me e uianga ke atu taau mei teia rai, “Eaa ra te Atua i akatika ai i te kino e te mamae kia tupu?” Aere ki runga i ta matou website, jw.org, kia kite akapeea te Pipiria me oronga mai i te au pauanga pumaana e te tau.