Kua rokoia ana ainei koe e te maki? Penei kua viviki koe i te meitaki e kua ngaropoina atu te reira. Inara, kare te mii anga mei te reira rai. “Kare te mii e ‘viviki i te ngaro,’” i tata ei a Dr. Alan Wolfelt i roto i tana puka Healing a Spouse’s Grieving Heart. Inara, akakite aia e: “Ka pou rai te tuatau me turuturu mai tetai pae ia tatou, e maru mai ei to tatou mamae ngakau.”

Ei akaraanga, akamanako ana eaa tei tupu ki te pateriareka ko Aberahama te mateanga tana vaine. Akakite te tataanga taito o te Pipiria e “kua akamata a Aberahama i te mii ia Sara, e aue iaia.” Te akaari maira te tuatua “kua akamata” e kua roa te tuatau e rauka ai iaia te akakoromaki i teia tumatetenga. * Tetai akaou akaraanga ko Iakoba, tei akavareia kia irinaki e kua tamateia tana tamaiti ko Iosepha e te manu taae. “E manganui te rā” kua mii aia, e kare i rauka i tona ngutuare tangata i te akapumaana iaia. Kua roa te tuatau i muri mai, kua manamanata rai aia te mateanga a Iosepha.​—Genese 23:2; 37:34, 35; 42:36; 45:28.

Aite rai te reira i teia tuatau, e manganui te aue nei no te mate o tetai tei piri vaitata kia ratou. Akamanako ana e rua akaraanga.

• “Kua mate taku tane ko Robert i te rā 9 o Tiurai 2008. Te popongi i mate ei aia, kare e tuke atu ki tetai rā. Ta maua i matau i muri ake i te kai ti popongi iaia e akaruke ra no te angaanga, kua ongi, kua tatomo, e kua aroa atu i tetai e tetai. E ono mataiti i muri mai, te mamae nei rai toku ngakau. E kare e rauka iaku i te akangaropoina i to Rob tumatetenga.”​—Gail, e 60 mataiti.

• “Noatu e e 18 mataiti te takake anga taku vaine akaperepere, te mii nei rai au iaia. Me kite au i tetai apinga manea i roto i te au mea natura, ka akamanako ua au iaia, e ka akamaara ua rai au e naringa aia i kite i taku e akara ra, ka rekareka aia.”​—Etienne, e 84 mataiti.

Te taka ua ra, e mea matauia e ka roa te mamae ngakau. E tuke te tu e mii ana te au tangata tataki tai, e kare i te mea meitaki i te akaapa i te tu e ariu ra tetai tangata ki te tumatetenga. I taua taime ra, auraka tatou e akaapa ia tatou uaorai me manako tatou e e maata roa to tatou tu mii. Akapeea tatou te akakoromaki anga i te mamae ngakau?