Mei te mangungu to ratou oro anga! Te akatutu ra teia au oroenua ririnui tokoā ma tona au akaoro i tetai akatutuanga oraora mei roto i te Pipiria! Tei mua te oroenua teatea, ko tona akaoro e ariki ou tei akakoronaia. Tei muri iaia tetai oroenua mei te aʼi rai te muramura, kua akamanaia tona akaoro kia apai ke i te au i te ao nei. Aru mai ko te toru o te oroenua, mei te poiri tangotango tona kara, te mou ra tona akaoro i te arite ma te tuatua akakite e ka ngere i te kai. Te ā o te oroenua e pateatea te kara, nana e akatotoa i te maki e te tumatetenga, ko te Mate tona akaoro. Ko Ade, koia te Vaarua tei aru vaitata ma te kokoti i te oraanga tangata e tumatatini!​—Apokalupo 6:1-8.

“Mataku tikai au te tatau anga i te akaoro oroenua tokoā. Manako au e te vaitata maira te Rā Akavaanga e no te mea kare au i papa, kare au e ora.”​—Crystal.

“Umere au i te au akaoro tukeke i runga i te au oroenua kara ke. Te mārama anga au i te aiteanga o te orama, kua puapingaia au.”​—Ed.

Aite ainei toou manako kia Crystal no te tokoā akaoro oroenua o Apokalupo? Me te manako ra ainei koe mei ia Ed rai? Noatu te tu, ko te akaoro anga umere o te oroenua tetai akatutu anga rongonui i roto ia Apokalupo, te puka openga o te Pipiria. Kua kite ainei koe e ka puapingaia koe me mārama i teia orama? Akapeea ra? Te taputou nei te Atua e ka kite koe i te mataora mou me tatau, apii, e me akono i te au mea tei tataia i roto i teia puka totou.​—Apokalupo 1:1-3.

Noatu kua mataku tetai pae i te orama o te tokoā akaoro oroenua, kare tona akakoroanga kia tamataku ia koe. Mari ra, e mirioni ua atu kua akamaroiroiia to ratou akarongo e kua rauka te manakonakoanga manea no te tuatau ki mua. Ka pera katoa rai noou! Me ka tika, e tatau ua atu ine.