Kua anga te Atua i to tatou kopapa kia rauka i te reira te rapakau iaia uaorai. Me motu, me pakiko me kore me puta te kopapa, “ka tupu tetai mea umere i roto i te kopapa te ka rapakau i te au ngai i motu noatu e meangiti me mea maata.” (Johns Hopkins Medicine) Ka rauka ua i te kopapa i te tāpu viviki i te toto e tae ra, te akatuera i te au ara toto, rapakau i te motu e te akaketaketa i te uaua.

AKAMANAKO ANA: Me kua akakoro tei Anga i to tatou kopapa kia rapakau te reira i te au motu, kare ainei tatou e irinaki i Tana taputou e ka akakore aia i to tatou au manako taitaia? Karanga te tata taramo e “kua rapakau aia i te aronga ngakau paruparu ra, e kua tākai i to ratou au puta.” (Salamo 147:3) Inara me tupu te manako taitaia kia koe, akapeea ra e papu ei ia koe e ka tākai a Iehova i toou au motu, i teia rā e a te tuatau ki mua?

Taputou mai te Atua e: “Auraka e mataku, te vaitata katoao au ia koe: auraka e taitaia, ko au oki toou Atua: e akamaroiroi au ia koe; koia ïa, e tauturu au ia koe.” (Isaia 41:10) Me kite tetai tangata e te manako maira a Iehova iaia, ka rauka iaia te au e te maroiroi kia akakoromaki i te au tu taitaia. Kapiki te apotetoro ko Paulo i teia au e ko te “au o te Atua, ko tei maata ua atu i te kite tangata.” Karanga katoa aia: “E tika iaku te au mea ravarai nei i te Mesia, ko tei akamaroiroi mai iaku nei.”—Philipi 4:4-7, 9, 13.

Tauturu te au Irava ia tatou kia akatupu i te akarongo ki roto i ta Iehova taputou no te tangata. Ei akaraanga, te akakite maira a Apokalupo 21:4, 5 eaa tana ka rave e eaa tatou ka irinaki ei iaia:

• “E nana e orei i te roi-mata katoatoa” mei te mata o te tangata. Ka takore a Iehova i te au turanga taitaia pouroa noatu ka manako tetai pae e kare te reira e puapinga ana.

• “Tei noo ki runga i te terono ra” i roto i te kakā o te rangi ko te Ariki Mana Katoatoa o te au mea angaia, ka taangaanga aia i tona mana ei takore i te au tumu o te taitaia e ka oronga mai i ta tatou ka anoano.

• Akapapu mai a Iehova e ko tana au taputou “e tuatua-mou oki teianei au tuatua e te pikikaa kore.” No reira, kua akatupu aia i tana au taputou ei akapapu e koia te Atua mou.

“E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito. Kua tuatua maira tei noo ki runga i te terono ra, I na, te akariro nei au i te au mea ravarai ei mea ou. E kua tuatua maira aia kiaku, Ka tata ana: e tuatua-mou oki teianei au tuatua e te pikikaa kore.”—Apokalupo 21:4, 5.

Te akaari maira te ao e pini ua ake e te Pipiria i te au tu meitaki o to tatou Metua i te rangi. I te mea ka rauka ia tatou te akatupu i tetai pirianga vaitata ki te Atua na roto i tana au mea i anga ai, karanga ra te Pipiria e: “E akavaitata atu ki te Atua, e nana e akavaitata mai kia kotou na.” (Iakobo 4:8) Karanga katoa ra a Angaanga 17:27: “Kare ra aia i atea ke atu ia tatou katoa nei.”

Ia koe e apii ra no runga i te Atua, ka papu ia koe e “koia oki te tiaki mai ia kotou.” (1 Petero 5:7) Eaa te akameitakianga me irinaki tatou ia Iehova?

Akamanako ana i te akaraanga o Toru i Tiapani. E Kerititiano tona mama, inara kua piri aia ki tetai au pupu tangata kino ko te yakuza, e Mafia i Tiapani. Karanga aia, “Irinaki au e e riri ana te Atua iaku, manako au e kua mate toku au taeake e toku au akaperepere no te mea e utunga te reira na te Atua iaku.” Kua āriki a Toru e kua riro mai aia “ei tangata kino e kare ona aroa i tetai ke,” no te mea kua piri aia ki te au tangata kino. Karanga katoa aia, “Inangaro au i te mate mapu ua i muri ake me tamate au i tetai tangata rongonui atu iaku, no te mea inangaro au kia kite te katoatoa i toku ingoa.”

Inara, te apiianga a Toru e tana vaine ko Hannah i te Pipiria, kua taui to raua oraanga e to  raua manako. “Kua kite au i te tu o taku tane te tauianga,” i karanga ai a Hannah. I teianei, karanga a Toru ma te papu e: “E Atua tetai e manako maira ia tatou tataki tai. Kare aia e inangaro i tetai tangata kia mate, e ka akakore aia i te ara a tetai tangata te ka tataraara. Ka akarongo mai aia i to tatou au manako ngakau kare e tangata e mārama. A te tuatau ki mua, ka takore a Iehova i te au manamanata, te taitaia e te au mamae. I teia taime katoa, te tauturu mai nei te Atua ia tatou na te au mataara tukeke. Te manako maira aia ia tatou me taitaia tatou.”—Salamo 136:23.

Mei tei tupu kia Toru, me kite tatou e ka rauka i te Atua, e kare e roa atu ka takore aia i te au turanga taitaia e ka orei i te au roimata, kare te reira e oronga ua mai i tetai manakonakoanga no tatou mari ra ka akameitaki atu te reira i te tu o to tatou oraanga i teia rā. Noatu te noo nei tatou i roto i tetai ao kua kî i te taitaia, ka puapingaia rai koe mei te aroa o te Atua.