Te Kite Maira Ainei te Atua ia Koe?
TA TE AU MEA ANGAIA E APII MAIRA
Ko te ora mua i muri ake me anauia tetai pepe te tuatau puapinga roa atu nona. Eaa te tumu? No te mea me akatupu te au metua vaine i tetai pirianga vaitata ki tana pepe i roto i teia tuatau, ka riro te reira i te tauturu i te tupuanga o tana pepe. *
Eaa te akakeu ana i te metua vaine kia inangaro i tana pepe? Akamārama mai te Professor ko Jeannette Crenshaw i roto i te The Journal of Perinatal Education e i roto i te kopapa tangata te vaira tetai apinga ko te hormone oxytocin, “na teia e akatupu i te inangaro o tetai metua vaine me mou aia, me akara e me angai aia i tana pepe ou.” I roto katoa i teia tuatau “ka viviki aia i te rave i tei anoanoia no tana pepe” e kare aia e inangaro kia kore aia e kite i tana pepe. Eaa teia i puapinga ai?
Na tei Anga ia tatou ko te Atua ko Iehova i akatupu i te pirianga vaitata i rotopu i tetai metua vaine e tana pepe. * Kua akameitaki te Ariki ko Davida i te Atua no tei rave mai iaia “mei roto i te kopu” kia moe mataku kore aia i runga i nga ū o tona metua vaine. Pure aia: “Kua tukuia atu au kia koe mei te kopu mai: ko toku Atua oki koe mei te kopu mairai o toku metua vaine.”—Salamo 22:9, 10.
AKAMANAKO ANA: Me kua anga te Atua i teia apinga umere kia rauka i tetai metua vaine i te manako i tana pepe e kia ngaki meitaki iaia, kare ainei e tano e te manako katoa maira te Atua ia tatou, “e tamariki tatou na te Atua”?—Angaanga 17:29.
TA TE PIPIRIA E APII MAIRA NO RUNGA I TO TE ATUA MANAKO IA TATOU
Ko Iesu Mesia, kua kite meitaki tikai aia i te tu o tei Anga mai ia tatou. Apii mai aia e: “Kare aina e taki rua mea manu rikiriki e okoia i te asario okotai nei? kare oki tetai o ratou ra e ngaro i to kotou Metua kia topa ki raro i te enua. Te rauru oki o to kotou na upoko, kua ope ïa i te tatauia. Auraka mari kotou e mataku, e maata to kotou meitaki i to te au manu rikiriki e manganui.”—Mataio 10:29-31.
Me topa te au manu rikiriki ki raro i te enua, kare te maata anga o tatou e manako atu ana ia ratou. Inara te kite maira to tatou Metua i te rangi i te au manu rikiriki tataki tai! Inara e puapinga maata atu te tangata kiaia i te au manu pouroa. Taka meitaki te apiianga i konei: “Auraka mari kotou e mataku” e kare te Atua e manako mai ana ia koe. E inangaro maata tona ia koe!
Inangaro te Atua i te kite eaa te tupu nei i roto i to tatou oraanga e te akara maira aia ia tatou ma te aroa
Akapapu mai te au Irava e
-
“Tei te au ngai katoa nei to Iehova mata, i te akara anga i te kino e te meitaki.”—MASELI 15:3.
-
“Tei te aronga tuatua-tika ra to Iehova mata, e tei ta ratou kapiki tona taringa.”—SALAMO 34:15.
-
“Ka pereperekavana au e ka rekareka au i toou ra aroa: i akara ana oki koe i toku tumatetenga anga; kua kite mai koe i toku vaerua i te au mate noku nei.”—SALAMO 31:7.
“MANAKO AU KARE A IEHOVA E INANGARO ANA IAKU”
Ka tuke ainei to tatou oraanga me kite tatou e te manako maira te Atua ia tatou, e me te inangaro maira aia ia tatou? E mea papu roa ka tupu te reira, mei ta Hannah * i Peritane i karanga:
“Manganui ua atu te taime e manako ana au e kare a Iehova e inangaro mai ana iaku, e kare katoa aia e pau mai ana i taku pure. Penei paa kare oku akarongo. Manako katoa au e kare te Atua e manako mai ana iaku no te mea kare oku puapinga kiaia. Iaku kare rai te Atua e manako mai ana iaku.”
I teia taime, kare a Hannah e manako ekoko akaou ana no runga ia Iehova. Akapeea tona tu i taui ei? Karanga aia “Kua roa te tuatau i taui ei toku manako. Maara iaku tetai akoanga Pipiria no runga i te atinga oko o Iesu, na te reira i akapapu mai e te inangaro maira a Iehova iaku. Muri mai te pauia mai anga taku pure, aue tikai au no te mea kite au e te manako maira a Iehova iaku. Kua riro katoa te apii i te Pipiria, te aere ki te au uipaanga i te apii mai iaku no runga ia Iehova, tona au tu e tona manako ia tatou. E teianei kite meitaki tikai au i to Iehova inangaro ia tatou e tona anoano kia akono ia tatou tataki tai.”
E akamaroiroianga tikai te au tuatua a Hannah. Akapeea ra tatou e papu ei e, kua mārama e ka maara i te Atua ia tatou? Ka kite tatou i te pauanga i roto i te atikara ka aru mai.
^ para. 3 Tetai au metua vaine ka tuia ratou e te maki postpartum depression no reira ka ngata ia ratou te akatupu i tetai pirianga vaitata ki ta ratou tamariki. Auraka ra ratou e manako e no ratou te apa. Karanga te U.S. National Institute of Mental Health, “e tupu ana teia me roiroi te metua vaine i muri ake i tona anauanga me kore kare aia i akakoro ana kia anau tamariki aia . . . kare teia i tupu no te mea kua rave te mama i tetai apinga me kore kare aia i rave ana i tetai apinga.” Me ka inangaro koe i te kite maata atu no runga i teia, akara i te atikara “Understanding Postpartum Depression” i roto i te Awake! o Tiunu 8, 2003.
^ para. 5 Ko Iehova te ingoa o te Atua mei ta te Pipiria e akakite maira.—Salamo 83:18.
^ para. 15 Tauiia te au ingoa i roto i te au atikara.
Ka Reka Katoa Koe i Teia
TE PUNANGA TIAKI
Kua Mārama Ainei te Atua ia Koe?
No te mea kua kite te Atua ia tatou e to tatou au turanga papu e kua mārama tikai aia ia tatou.
TE PUNANGA TIAKI
Ta te Atua Apinga Aroa Maata—No Teaa ra i Akaperepereia Ai?
Eaa te tumu i puapinga ai tetai apinga aroa i tetai? Ka tauturu teia au tumu ia tatou kia āriki oonu i te oko.
