Akamanako ana i te pirianga vaitata roa atu tei rauka i te tangata—te pirianga vaitata i rotopu i tetai nga maanga. E pirianga tumanava tikai to raua. Tetai au maanga “kua kite ratou mei teaa te tu kia tuatua koe ki tetai tangata tei mārama tikai eaa taau e tuatua ra ma te kore e akamārama kiaia i te aiteanga,” i karanga ai a Nancy Segal te pu maata o te Twin Studies Center e maanga katoa aia. Akakite mai tetai vaine i te pirianga i rotopu iaia e tona maanga: “Kua kite meitaki tikai maua i tetai e tetai.”

Eaa ra teia i tupu ei? I roto i tetai kimikimianga, ko te aronga ta ratou e piri ra e pera te tu i utuutuia ai raua ko te reira tetai tumu. Inara ko te tumu maata, no te mea e nga maanga raua kua aiteite to raua au tu pouroa.

AKAMANAKO ANA: Kua mārama tikai tei Anga i teia au mea pouroa ia tatou tataki tai. Karanga te tata taramo ko Davida e: “Naau i tapoki iaku i roto i te kopu o toku metua vaine ra. Toku nei kopapa kare ïa i ngaro ia koe, ka angaiaʼi au i te ngai ngaro ra. . . . Kua kite oki to mata i toku tu, i toku vai oti kore anga ra; e kua tataia toku au melo katoa.” (Salamo 139:13, 15, 16) Ko te Atua anake tei kite e tei mārama i te tu i angaia ai tatou e pera katoa te au mea i tupu ana i roto i to tatou oraanga. Akapapu maira to te Atua kite no runga ia tatou e kua mārama tikai aia ia tatou.

Kua pure a Davida: “E Iehova, kua unuunumouia au e koe, e kua kitea oki au. Kua kite koe i toku noo anga ki raro, e toku tu anga ki runga; kua kite koe i toku nei manako i te atea ke. Kare rava oki e tuatua o roto i toku vaa, i toe i te kitea puia e koe, e Iehova.” (Salamo 139:1, 2, 4) Kua kite katoa a Iehova i to tatou manako ngakau e “te kite ra aia i te akakoroanga o te au manako katoa.” (1 Paraleipomeno 28:9; 1 Samuela 16:6, 7) Eaa ta teia au irava e akakite maira no runga i te Atua?

Noatu kare tatou e akakite i to tatou au manako na roto i te pure, te kite maira tei Anga eaa ta tatou e rave ra e kua mārama aia eaa tatou i pera ai. Kua kite katoa aia i te au mea meitaki ka inangaro tatou i te rave, noatu ka ngata ia tatou i te rave i ta tatou ka inangaro. No te mea na te Atua i anga mai ia tatou kia akaari i te aroa, inangaro aia i te kite e te mārama i to tatou au manako e ta tatou e inangaro ra i te rave.—1 Ioane 4:7-10.

 Akapapu mai te au Irava e

• “Tei te aronga tuatua-tika ra to Iehova mata, e tei ta ratou kapiki tona taringa.”—1 PETERO 3:12.

• Kua taputou mai te Atua: “E apii atu au ia koe, e akakite atu ei kia koe i taau arataa kia aere ra; e ako atu au ia koe; ei runga ia koe toku mata vaoo ei.”—SALAMO 32:8.

Me kite tatou e te mārama maira te Atua i to tatou turanga e ta tatou e manako ra, ka tauturu mai ainei aia ia tatou? Akamanako ana eaa tei tupu kia Anna i Nigeria. Karanga aia e “E manako ana au me e puapinga rai kia ora ua atu au no te mea e ngata tikai taku e na roto nei. E vaine takaua au e akono nei i taku tamaine i roto i te are maki tei tuʼia e te maki hydrocephalus (kîia te roro e te vai). Te akakiteia mai anga e cancer toku i roto i te ū mama e ka vaʼiia, ka raveia te chemotherapy, e te radiotherapy. Ngata roa atu i te akono iaku uaorai e taku tamaine.”

Akapeea i rauka ai ia Anna te akakoromaki? “Na te akamanako anga i te au irava mei ia Philipi 4:6, 7 e karanga ra e ‘na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako.’ Me maara iaku teia au irava, ketaketa roa atu toku pirianga kia Iehova no te mea kite au kua mārama aia i toku turanga. Kua rauka katoa iaku te akamaroiroianga mei toku au taeake e te au tuaine i roto i taku putuputuanga Kerititiano.

“Noatu e te maki nei rai au, kua meitaki mai toku turanga e to taku tamaine, no te mea te tauturu mai nei a Iehova ia maua, e kua kite mai maua e kare i te mea meitaki kia manako taitaia me tupu te au turanga ngata. Akapapu maira a Iakobo 5:11 e: ‘I na oki, te karanga nei tatou e, kua meitaki te aronga i tamou marie i te akakoromaki. Kua kite kotou i te akakoromaki o Iobu ra, e kua kite oki kotou i ta te Atu i rave i te openga ra; e kua ki te Atu i te aroa e te takinga-meitaki maata.’” Kua mārama tikai a Iehova i te turanga o Iobu, e ka papu katoa ia tatou e te kite maira aia i te au turanga ngata e na roto nei tatou.