Te au Turanga Taitaia—E Utunga Ainei na te Atua?
AKAMATE TE VAEVAE O LUZIA. I tona meangiti anga, kua tuiia aia e te maki poliomyelitis, teia maki ka akamate tetai au ngai o te kopapa. E 16 ona mataiti, karanga tona pu kiaia, “E utunga tena na te Atua no te mea kare koe e akarongo ana, e te kino ia koe ki toou mama.” Eia mataiti i muri mai, maara rai ia Luzia tera au tuatua.
TE KITE ANGA A DAMARIS E CANCER TONA I ROTO I TE RORO, ui tona papa kiaia: “Eaa taau i rave ei i tupu ei tena kia koe? E angaanga kino taau i rave ei. No reira te Atua i akautunga ai ia koe.” Taitaia tikai a Damaris no te au tuatua a tona papa.
No tetai tauatini ua atu mataiti to te tangata irinakianga e e utunga te maki na te Atua i te tangata. Karanga te puka Manners and Customs of Bible Lands e e manganui ua atu tei irinaki i to Iesu tuatau “e kua tupu te maki ki tetai tangata no tana ara i rave e tona tu oraanga, no reira kua akautungaia aia ki te maki.” Karanga te Medieval Medicine and the Plague e, i te au anere mataiti mua, “kua irinaki tetai aronga e kua akatupu te Atua i te maki ei akautunga ia ratou no ta ratou au ara.” Te mateanga te mirioni ua atu tangata i Europa no te maki mate i te 14 T.N., na te Atua ainei i akatupu i te reira? Me kua tupu te reira no tetai au manumanu, mei ta tetai au taote i kite mai? Penei ka manako tetai pae, kua akatupu ainei te Atua i te maki ei tamamae i te tangata? *
AKAMANAKO ANA: Eaa a Iesu i rapakau ei i te maki o te tangata me na te Atua i akatupu i te reira? Kare ainei te reira e akaapa ana i to te Atua tu tika e te tau? (Mataio 4:23, 24) Kare roa a Iesu e patoi i te anoano o te Atua. Karanga aia: “Kare oki au i tukumoe i te rave i te mea e mareka mai ei aia,” e te “anoano nei au i te Metua; e te akono nei au i ta te Metua i akaue mai iaku ra.”—Ioane 8:29; 14:31.
Taka meitaki ta te Pipiria. E Atua “kino kore” a Iehova. (Deuteronomi 32:4) Ei akaraanga, kare rava te Atua e akatupu i tetai tumatetenga ki tetai pairere, kia mate e anere ua atu tangata, no te mea ua nei e inangaro aia i te akautunga okotai ua tangata! Kia tau ki to te Atua tu tika, karanga tona tavini tiratiratu ko Aberahama, e kare rava te Atua e tamate kapiti i te “tangata tuatua-tika, e te akono kore i te Atua.” Karanga katoa aia “auraka roa oki koe e akapera.” (Genese 18:23, 25) Te akakite katoa ra te Pipiria “kare takiri te Atua e rave i te tuatua kino”; kare aia e rave ana i “te ara.”—Iobu 34:10-12.
TA TE PIPIRIA E APII MAIRA NO RUNGA I TE AU TURANGA TAITAIA
Kare te au turanga taitaia e tupu nei kia tatou i te utunga na te Atua. Taka meitaki ta Iesu i tuatua no runga i teia i te kite anga aia e tana au pipi i tetai tangata matapo. “Kua ui maira tana au pipi kiaia, na ko maira, E Rabi, naai te ara, nana uaorai aina e na nga matua ainei, i anau matapo mai ei aia? Kua karanga aturā Iesu, Kare to te ara a teianei tangata, e te ara a nga matua ra: no te mea ra, kia kitea te angaanga a te Atua iaia nei.”—Ioane 9:1-3.
Kua poitirere te au pipi a Iesu i tona akakiteanga e kare no te ara a tera tangata e tona nga metua i matapo ei aia. Kare a Iesu i rapakau ua i te matapo o tera tangata mari ra kua taui aia i te irinakianga tarevake e na te Atua i akatupu i te Ioane 9:6, 7) Te aronga e tupu nei te au maki mamae, ka rauka ia ratou te pumaana na te kite anga e kare na te Atua i akatupu i to ratou mamae.
mamae. (Eaa a Iesu ka rapakau ei i te maki o te tangata me na te Atua te reira i akatupu?
Akapapu mai te au Irava e
-
“Kare rava te Atua e vavare i te kino, kare rava oki aia e pikikaa i te tangata.” (IAKOBO 1:13) Kare e roaia atu, ka takoreia te “kino” te maki, te mamae e te mate.
-
“Akaora atura [a Iesu] i te aronga katoa i mate i te maki.” (MATAIO 8:16) I te akaora anga aia i te maki o te au tangata, akaari te Tamaiti a te Atua eaa ta te Patireia o te Atua ka akatupu takapini i teianei ao.
-
“E nana [na te Atua] e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”—APOKALUPO 21:3-5.
NOAI RA TE APA?
Eaa ra te tumu i tupu ei te mamae e te au turanga ngata ki te tangata? Kua ui ana te tangata i teia uianga no tetai anere ua atu mataiti. Me kare no te Atua te apa i tupu ei teia, noai i reira te apa? Ka pauia teia nga uianga i roto i te atikara ka aru mai.
^ para. 4 Noatu kua akautunga ana te Atua i tetai au tangata no ta ratou au ara i rave, kare te Pipiria i akakite mai e te taangaanga nei a Iehova i te maki ei akautunga i te tangata no ta ratou ara.