“Mei te aa te roa, e Iehova, o toku kapiki anga, e kare koe akarongo mai! o toku kapiki nui anga atu ia koe i te takinga-kino, e kare koe i akaora?” (Habakuka 1:2, 3) Ko teia te au tuatua a Habakuka, e tangata tiratiratu tei rauka iaia te akameitakianga a te Atua. Kua akaari mai ainei tana au uianga e kare ona akarongo? Kare rava! Akapapu te Atua kia Habakuka e kua akanoo aia i tetai tuatau ei akakore i te au turanga taitaia.—Habakuka 2:2, 3.

Me tupu tetai turanga taitaia kia koe me kore ki tetai tei akaperepereia e koe, ka manako koe e kua roa rava te Atua, naringa aia i viviki i te tauturu mai. Inara, te akapapu maira te Pipiria kia tatou e: “Kare ua te Atu i akaroaroa i tana i tuatua maira, mei ta tetai pae e karanga ra e, e akaroaroa; e akakoromaki maata ra tona ia tatou, kare rava i anoano e kia mate atu tetai, kia rauka katoatoa ra te tataraara.”—2 Petero 3:9.

Kare e roa atu ana! Akakite a Iesu e ka kite tetai uki tangata i te au akairo no “te openga o teianei ao.” (Mataio 24:3-42) Riro te au totou a Iesu e tupu nei ei akapapuanga e kare e roa atu, ka takore te Atua i te au turanga taitaia o te tangata. *

Ka akapeea ra te Atua me takore i te au turanga taitaia? Ia Iesu i te enua nei, kua akaari aia i te mana o te Atua ei akakore i to te tangata taitaia. Akamanako ana i tetai au akaraanga.

Au Tumatetenga Natura: Ia Iesu e tana au pipi e tere ra na runga i te Tai o Galilea, kua tupu tetai uriia maata. Inara kua akaari a Iesu e ka rauka iaia e tona Metua i te akaaere i te tai e te matangi. (Kolosa 1:15, 16) Teia ta Iesu i tuatua: “Kua oti ana, kia aki!” Tei tupu? “Torue atura te matangi, marino rava atura.”—Mareko 4:35-39.

Maki: Kua kiteia a Iesu ei tangata ka rauka iaia te rapakau i te matapo, te pirikoki, te maki uti, te repera, e te vai atura. “Akaora atura i te aronga katoa i mate i te maki.”—Mataio 4:23, 24; 8:16; 11:2-5.

Onge: Taangaanga a Iesu i te mana tei orongaia mai e tona Metua kiaia ei angai i te tangata. Karanga te Pipiria e rua taime tona angai anga e tauatini ua atu tangata, iaia e rave ra i tana angaanga orometua.—Mataio 14:14-21; 15:32-38.

Mate: Riro te akatuakaouanga e toru ta Iesu i rave ei akapapu mai e mana to Iehova i te akaora akaou mai i tetai tangata tei mate. Tetai tangata ta Iesu i akaora mai, kua mate ana aia no tetai ā rā.—Mareko 5:35-42; Luka 7:11-16; Ioane 11:3-44.