ME TUPU TE AU TUMATETENGA, I MANAKO ANA KOE E, ‘TEIEA RA TE ATUA?’ ME KORE KUA TUPU TETAI TURANGA TAITAIA I ROTO I TOOU ORAANGA E KUA MANAKO KOE E, ME TE MANAKO MAIRA TE ATUA IA KOE?

Penei kua aite toou turanga ki to Sheila, e noo ana aia i Marike. Karanga aia: “Mei toku tamariki anga, inangaro tikai au i te Atua no te mea Nana i anga mai ia tatou. Inara kare oku pirianga vaitata kiaia. Toku manako te akara maira aia iaku mei tetai ngai mamao mai. Kare au e manako ana e e riri ana te Atua iaku, e kare katoa au e irinaki ana e te manako maira aia iaku.” Eaa a Sheila i manako ekoko ei no runga i te Atua? Akamārama aia: “Kua tupu ana te au turanga taitaia ki toku ngutuare tangata, kore ake rai e kare te Atua e inangaro i te tauturu mai ia matou.”

Mei ia Sheila rai, penei ka irinaki koe e Atua Mana Katoatoa tetai. Inara penei ka manako katoa koe e, me te manako maira aia ia koe. Kua manako ekoko katoa ana te tangata tiratiratu ko Iobu, noatu kua irinaki aia i te mana e te pakari o tei Anga iaia. (Iobu 2:3; 9:4) I muri ake te tupuanga te au tumatetenga kia Iobu, no te mea kare e akapumaana i rauka iaia, kua ui aia ki te Atua: “Eaa oki koe i uunaʼi i to mata, e i akono mai ei koe iaku ei enemi noou?”—Iobu 13:24.

Eaa ta te Pipiria e akakite maira? No te Atua ainei te apa i tupu ei te au tumatetenga? E akapapuanga ainei tetai e te manako maira te Atua i te au tangata tataki tai pouroa? Ka rauka ainei ia tatou i te kite e me te manako maira te Atua ia tatou, me te mārama maira aia i to tatou turanga, me te akaaroa maira aia ia tatou, me kore te inangaro maira ainei aia i te tauturu ia tatou no te au manamanata e tupu nei?

I roto i te au atikara ka aru mai, ka kite tatou eaa ta te au mea i angaia e akakite maira no runga i to te Atua manako ia tatou. (Roma 1:20) E ka akara katoa tatou eaa ta te Pipiria e akakite maira. Te maata atu ka “kite tatou iaia” na roto i tana i anga e tana Tuatua, ka papu i reira ia tatou e “koia oki te tiaki mai” ia tatou.—1 Ioane 2:3; 1 Petero 5:7.