E anoano tau kore ainei teia? Kare! Akakite maira te Pipiria e kua tuku te Atua i teia anoano ki roto ia tatou. (Koheleta 3:11) Karanga katoa teia e “ko te Atua oki te aroa.” (1 Ioane 4:8) Kua tuku ainei te Atua aroa i te anoano ki roto ia tatou kia ora e tuatau ua atu e oti kare te reira i tupu?

Taka meitaki, kare te mate i te oa. Akamārama mai te Pipiria e e “enemi” teia. (1 Korinetia 15:26) Ka tupu viviki ki tetai pae; e ka roa ki tetai pae. Inara ka tupu rai te mate. Ki te maata anga, e mea matakuia. Ka takoreia ainei teia enemi? Ka rauka ainei?

Ka poitirere ainei koe i te kite e kare te Atua i akakoro ana e kia mate te au tangata? Akaari mai te puka Pipiria o Genese i to te Atua akakoroanga no te tangata, kia ora e tuatau ua atu. Anga te Atua ko Iehova i te enua no te tangata kia mataora. E oti kua anga i te tangata mua ko Adamu, e kua tuku iaia ki roto i tetai parataito, i te aua o Edene. I muri akera, “akara akera te Atua i te au mea katoa tana i anga, e i na, te meitaki roa ra.”—Genese 1:26, 31.

Angaia a Adamu i to te Atua tu, kare e apa. (Deuteronomi 32:4) E tu apa kore katoa to Eva,  te vaine a Adamu, i te pae manako e te kopapa. Karanga a Iehova kia raua: “Kia anau korua, e kia maata roa, e e akaki i te enua nei, e e akavi; e kia mana korua ki rungao i te au ika o te tai, e ki rungao i te au manu o te reva, e ki rungao i te au mea ora katoa e totoro aere ua ki rungao i te enua nei.”—Genese 1:28.

Ka pou te tuatau no te akaki i te enua ki ta raua uanga. Ka anau a Eva i te tamariki, e ka anau ratou i ta ratou tamariki e ki ua atu te enua i te tangata, mei ta te Atua i akakoro. (Isaia 45:18) E mea tau ainei kia akamanako e ka oronga a Iehova kia Adamu e Eva teia manakonakoanga, me kua akakoroia raua kia ora no tetai ua tuatau kia kite i ta raua tamariki e te au mokopuna, e kare raua i kite ana e eaa te ka aru mai?

Akamanako katoa i te akauenga kia mana raua ki rungao i te au manu. Kua akakiteia kia Adamu kia tapa i te ingoa o te au manu. (Genese 2:19) Te aiteanga ka anoanoia aia kia apii no runga i to ratou tu e kia mārama akapeea me akono ia ratou. Ka pou rai te tuatau.

Te akakite maira ta te Atua ikuikuanga kia akaki i te enua e kia mana ki rungao i te au manu, e kua angaia te nga tokorua mua kia ora e tuatau ua atu. Te tika, kua ora rai a Adamu no tetai tuatau roa.

Te akaari maira te Pipiria e kua ora ana te tangata no tetai tuatau roa. Karanga te reira: “E to Adamu ra au rā katoa i te ora anga, e iva ïa anere e toru ngauru te mataiti.” Kua taiku katoa te reira e ono tangata tei ora e tere atu i te 900 mataiti! To ratou ingoa ko Seta, Enosa, Kainana, Iareda, Metusela, e Noa. Kua ora ratou i mua ake i te Vaipuke i to Noa tuatau—kua ora a Noa e 600 mataiti i mua ake ka tupu ei te Vaipuke. (Genese 5:5-27; 7:6; 9:29) Eaa te tumu i ora ai ratou no tetai tuatau roa?

Kua ora te reira au tangata i te tuatau te apa kore ra te tangata. No reira rai ratou i ora ai no tetai tuatau roa. Inara, eaa te pirianga o te tu apa kore ki te ora anga e tuatau ua atu? E akapeea te mate me takoreia? E kitea ai te pauanga, ka anoanoia tatou kia mārama i te tumu i ruaine ei tatou e i mate ei.