Eaa Tatou i Ruaine ei e i Mate Ei?
KARE te Atua i akakoro ana kia mate te tangata. Kua angaia to tatou nga metua mua, ko Adamu e Eva, ma te kopapa e te manako apa kore; ka ora rai raua i teia tuatau. Te taka meitaki ra, mei ta Iehova i tuatua kia Adamu no runga i tetai pu rakau tei tupu i te aua o Edene.
Kua akakite te Atua kia Adamu, “i te rā e kai ei koe [mei te rakau], ka mate ïa koe.” (Genese 2:17) Kare te reira akaueanga e tau ana mei te mea e ka ruaine e ka mate a Adamu. Kua kite a Adamu, me kare aia e kai mei te rakau, kare aia e mate.
KARE TE ATUA I AKAKORO ANA KIA MATE TE TANGATA
Kare a Adamu raua ko Eva i anoanoia kia kai mei te rakau e ora ai—kua ki te aua i te au ua rakau taurekareka. (Genese 2:9) Na te kore anga e kai mei te rakau, kua akaari rai te nga tokorua mua, i to raua akarongo ki Tei oronga mai i te ora kia raua. Kua akaari katoa te reira e kua āriki raua i to te Atua tika anga kia arataki ia raua.
TE TUMU I MATE EI A ADAMU E EVA
Kia mārama i te tumu i mate ei a Adamu e Eva, ka anoanoia tatou kia akara matatio i te pukapuka anga tei tupu e tei akao mai ia tatou ki roto. Kua taangaanga te Tiaporo ko Satani, i tetai ovi kia akakite i tetai pikikaa kino tikai. Karanga te Pipiria: “E pakari maata to te ovi i to te au manu katoa o te enua, i ta te Atua ra ta Iehova i anga ra; e kua tuatua maira aia ki te vaine, Koia ïa, kua tuatua mai te Atua e, Auraka korua e kai i to te au rakau katoa o te kainga nei?”—Genese 3:1.
Kua karanga atura a Eva: “E kai maua i to te au rakau o te kainga nei; Mari ra o to taua rakau i rotopu i te kainga nei, kua tuatua mai ïa te Atua e, Auraka korua e kai i to reira, auraka oki korua e arapaki atu, ka mate aea korua.” Tuatua maira taua ovi ra kiaia: “Kare rava korua e mate. Kua kite oki te Atua e, i te rā e kai ei korua i to reira, ka puera ïa to korua mata, e ka riro korua mei te Atua ra te tu, i te kite i te meitaki e te kino.” Karanga a Satani e e pikikaa a Iehova, tei tapupu i te mea meitaki mei to tatou nga metua mua.—Genese 3:2-5.
Kua irinaki a Eva i tana i akarongo. Akara ua atura aia i te reira rakau. E taurekareka tikai ki te mata! Kua rave aia i te ua rakau e kua kai iora. Karanga te Pipiria: “Apai atura oki ki tana tane, e kua kai katoa iora oki aia.”—Genese 3:6.
Akakite te Atua kia Adamu: “I te rā e kai ei koe i to reira, ka mate ïa koe.”—GENESE 2:17
Papu kua maromaroa te Atua i te kite i tana tamariki akaperepere, tei akakoro i te akarongo kore kiaia! Eaa tana i rave? Te tuatua anga a Iehova kia Adamu, karanga aia: “E oki ua atu koe ki raro i te one; no reira mai oki koe: e one-pueu oki koe, e ka riro akaou rai koe ei one-pueu.” (Genese 3:17-19) Tei tupu akera, “to Adamu ra au rā katoa i te ora anga, e iva ïa anere e toru ngauru te mataiti: e mate iora aia.” (Genese 5:5) Kare a Adamu i aere ana ki te rangi me kore ki tetai ngai ke. Kare aia i ora ana i mua ake ka anga ai a Iehova iaia mei te one pueu. No reira i tona mate anga, kua oki rai aia ei one pueu. Kua mate aia. Aue!
NGERE TATOU I TE TU APA KORE
No tei akakoro raua i te akarongo kore, kua ngere a Adamu e Eva i te tu apa kore e te manakonakoanga kia ora e tuatau ua atu. Kua tupu te tu kinokino kia raua i te pae kopapa; kua apa raua e kua ara. Inara kare ta raua ara i takino ia raua anake ua. Kua iri to raua turanga ara ki runga i ta raua uanga. Karanga a Roma 5:12 e: “No te tangata okotai ra [ko Adamu] i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa.”
Te akataka ra te Pipiria i te ara e te mate ei “tapoki i tapokiiaʼi te mata o te tangata katoa ra, e te vaî i rarangaia i rungao i te au enua katoa ra.” (Isaia 25:7) Te vaî ra te reira i te tangata ravarai, mei te vaî poitini kare e rauka te ora. E tika rai, “mei te tangata i ope [ei] i te mate ia Adamu.” (1 Korinetia 15:22) Te uianga i reira, mei ta te apotetoro ko Paulo i ui: “Naai au e akaora i teianei kopapa mate?” Ka rauka ainei i tetai ua atu?—Roma 7:24.