NOATU e kua akarongo kore to tatou nga metua mua, ko Adamu e Eva e kua akatupu i te ara e te mate ki te tangata ravarai, kare to te Atua akakoroanga no te tangata i taui. I roto i tana Tuatua tataia, te Pipiria, kua akapapu putuputu mai te Atua e kare tana akakoroanga i taui.

• “Ka riro te enua no te aronga tuatua-tika, ka noo tamou rai ratou i reira.”—Salamo 37:29.

• “Nana e akakore rava i te mate e tuatau ua atu; e na te Atu ra na Iehova e orei i te roi-mata i te au mata ravarai.”—Isaia 25:8.

• “E taua enemi openga ra, ko te mate, e akakoreia ïa.”—1 Korinetia 15:26.

• “E kore rava te mate, e te aue, e te mii; e te mamae oki, e kore katoa ïa.”—Apokalupo 21:4.

Akapeea te Atua me “akakore rava i te mate,” e te ‘akakore’ takiri i te reira? Mei tei akakiteia e te Pipiria, ko “te aronga tuatua-tika . . . ka noo tamou rai ratou i reira.” Karanga katoa te reira “kare takiri e tangata tuatua-tika i te enua nei, ko tei rave i te tuatua meitaki.” (Koheleta 7:20) Kia autu i te mate, ka kopae ainei te Atua i te akono i tana turanga? Kare rava! No te mea ko “te Atua, ta te kore e tika kia pikikaa.” (Tito 1:2) Eaa ta te Atua ka rave kia akatupu i tana akakoroanga aroa no te tangata?

Kua oronga mai te Atua ko Iehova i tetai ravenga takinga meitaki, kia akaora i te tangata mei te mate—na te tutaki anga i te oko. Te aite anga o te oko, kia aiteite tona tutaki anga me kore kia aiteite te tutaki ki tei anoanoia. Noatu e kua ara te tangata katoatoa e kua akautungaia kia mate, karanga te Pipiria: “Kare rava e tika i te tangata kia akaora i tona taeake, e kare ana tutaki kia apai ki te Atua e rauka mai ei aia ra; Ko te oko oki o te vaerua, e maata ua atu ïa, e ko te kore rai ïa e tuatau ua atu.”—Salamo 49:7, 8.

Me mate tetai tangata apa, kua tutaki aia i tana ara; kare e rauka iaia i te akaora iaia uaorai, e te tutaki i te ara a tetai ke. (Roma 6:7) Ka anoanoia tetai tangata tiama e te apa kore kia oronga i tona oraanga, kare no tana uaorai ara, mari ra no tatou.—Ebera 10:1-4.

Ko teia tikai ta te Atua i rave. Tono maira aia i tana Tamaiti, ko Iesu mei te rangi maira, kia anauia aia ei tangata tiama e te apa kore. (1 Petero 2:22) Karanga a Iesu e, i aere mai aia “e kia oronga atu aia i tona ora ei oko no te tangata e manganui.” (Mareko 10:45) Kua mate aia i te tutaki i ta tatou ara e te akarangatira ia tatou mei te mate.—Ioane 3:16.

Teia tuatau kua akatupuia te totou Pipiria, e “ka tupu te kino maata” e te noo nei tatou i te “tuatau openga” o teia akatere anga kino. (2 Timoteo 3:1) Ka taopenga atu ki “te rā akavaanga, e te mate o te aronga akono kore i te Atua ra.” (2 Petero 3:3, 7) Ko te aronga tei inangaro i te Atua ka ora ratou e ka rauka te akameitaki anga o “te ora mutu kore.”—Mataio 25:46.

Ka rauka i te mirioni ua atu tangata i te ora mutu kore me akatuakaouia mai ratou. Kua rave a Iesu i teia akatuakaou anga i tona atoro anga i te oire o Naina. Kua mate te tamaiti anau tai a tetai vaine  takaua, kua “aroa atura [Iesu] iaia,” e kua akaora iaia. (Luka 7:11-15) Pera katoa, karanga te apotetoro ko Paulo: “Te irinaki nei au ki te Atua . . . e e tuakaouanga to tei mate, te aronga tuatua-tika e te aronga tuatua-tika kore.” Akaari mai teia manakonakoanga i to te Atua aroa i te tangata ravarai.—Angaanga 24:15.

E pirioni ua atu te tatari atu nei i te ora mutu kore. Karanga te Pipiria: “Ka riro te enua no te aronga tuatua-tika, ka noo tamou rai ratou i reira.” (Salamo 37:29) A te reira tuatau, ka mataora ratou i te kite i te tupu anga o te au tuatua akamaroiroi ta te apotetoro ko Paulo i tata e 2,000 mataiti i topa: “E ade e, teiea toou re?” (1 Korinetia 15:55) I reira, e akakoreia ai to te tangata enemi ko te mate!