Ka Mataora Rai te Oraanga i Teia Tuatau
TE ORAANGA kare e maki, te ruaine, e te mate—ka rauka ia koe te reira oraanga manea a te tuatau ki mua! Noatu rai, kua ki te oraanga i teia tuatau i te au manamanata kino. Eaa te ka tauturu ia koe kia rauka te oraanga mataora i teia tuatau? Te oronga maira te Pipiria i te au ako anga, ei tauturu ia koe kia kite i te oraanga au e te mataora. Akamanako ana i tetai au manamanata o te oraanga, e akapeea te Pipiria me tauturu mai.
KA KITEA TE MATAORA
Te ako a te Pipiria: “Ei noo anga noinoi kore i te apinga to kotou; kia mareka i ta kotou i rauka ra.”—Ebera 13:5.
Kua tuku putuputu mai teianei ao i te au apinga tei māro ia tatou kia oko. Inara, te karanga ra te Pipiria e ‘kia mareka tatou i ta tatou i rauka ra.’ Akapeea ra?
Kopae i “te anoano maata oki i te moni.” Kua akaatinga te tangata i to ratou oraanga kopapa, te ngutuare tangata, te au pirianga oa, te tu akono, e to ratou tu ngateitei—no “te anoano maata oki i te moni.” (1 Timoteo 6:10) Kare e pauna te taime! I te openga, tei anoano ra i te moni “kare ïa e mareka.”—Koheleta 5:10.
E akaperepere i te tangata, auraka te apinga. Tika rai, te vaira te puapinga o te au apinga materia. Inara kia mareka ua e ko te tangata te ka aroa mai ia tatou. Me rauka te “oa mou” ka mataora to tatou oraanga.—Maseli 17:17, NW.
KA MATAORA TE ORAANGA I TEIA TUATAU ME ARUIA TE ARATAKIANGA A TE PIPIRIA
AKAKOROMAKI ANGA I TE MAKI
Te ako a te Pipiria: “E meitaki to te ngakau rekareka mei te vairakau ra.”—Maseli 17:22.
Mei “te vairakau” meitaki, ka tauturu ia tatou kia akakoromaki i te maki. Akapeea tatou me kimi i te mataora, me rokoia tatou e te maki?
E akaari i te tu akameitaki. Me akamou to tatou manako ki runga i te au “rā kino” ka kinokino rai te oraanga. (Maseli 15:15) Kareka ra “kia mareka oki kotou,” i karanga ai te Pipiria. (Kolosa 3:15) E akaari i te inangaro no te au mea meitaki o te oraanga. Te manea o te opu anga ra, te maru o te matangi, e te mata katakata o te aronga akaperepereia—ka akatupu i te tu mareka kia tatou.
E angaanga na tetai ke. Noatu te apikepike o to tatou oraanga, “e mea meitaki i te oronga atu i te rave mai.” (Angaanga 20:35) Me āriki tetai aronga i ta tatou i rave no ratou, ka mareka tatou, e ka akakore teia i te manamanata. Ka rauka ia tatou te oraanga meitaki na te tauturu anga i tetai ke, kia meitaki atu to ratou oraanga.
AKAKETAKETA ANGA I TE ORAANGA AKAIPOIPO
Te ako a te Pipiria: “Kia timata oki kotou i te au mea e maata ua atu te meitaki.”—Philipi 1:10.
Te au tokorua kare e akapou i te taime tau, ka tupu te ke. E mea tau no te au tane e te au vaine kia akamanako i to ratou oraanga akaipoipo—ko tetai mea puapinga rava atu teia i to ratou oraanga.
E angaanga kapiti. E angaanga kapiti te nga tokorua, kare e angaanga takake? Karanga te Pipiria: “E meitaki nga tangata toko rua i te takitai.” (Koheleta 4:9) Ka tunu kai raua, ka akamatutu i te kopapa, ka akaangaroi kapiti e te kangakanga kapiti.
E akaari i toou aroa. Te akamaroiroi ra te Pipiria i te tane e te vaine kia aroa e te akangateitei i tetai e tetai. (Ephesia 5:28, 33) Na roto i te mata katakata, te takave anga maru, e te apinga aroa, ka tauturu i te akamatutu i te oraanga akaipoipo. E tika, ka anoanoia te au tokorua kia akaari i te inangaro no te pirianga ainga.—Ebera 13:4.