Te Mea Akaaroa i te Mate
AKAMANAKO ana ia koe e akara ra i tetai vitio no tetai vaine rongonui e te kite i te akatangi imene. Kua akamata teia teata mei tona rikiriki anga, iaia e apii ra i te akatangi imene, e te tuatau apiipii. E oti kua akariari aia i tana au akatangi anga imene ki te katoatoa, kua teretere aia ki te ngai mamao, e kua riro mai ei vaine rongonui i teianei ao. Kare i roa i muri mai, kua akara anga pakarikari aia e kua mate.
E tua tika tikai teia, inara te akaari maira i tetai oraanga poto ua. Noatu e e vaine akatangi imene teia e me e tangata taieni, e tangata oro, e me e tangata rongonui, ka aiteite rai te oraanga. Penei e maata ta teia tangata ka akatupu, inara kare ainei koe i akamanako ana e e maata atu tana ka akatupu, naringa kare te tu pakarikari e te mate?
Noatu teia turanga akaaroa, ka tupu rai kia tatou. (Koheleta 9:5) Noatu ta tatou tauta anga, ka rokoia rai tatou e te ruaine e te mate. Kare ko te reira ua, penei ka tupu viviki te tumatetenga e te maki kino. Mei tei akakiteia e te Pipiria, ka aite tatou mei te au o te popongi “e roa poto akera, ngaro atura ïa.”—Iakobo 4:14.
Ki tetai pae, kare te oraanga i te mea papu, no reira ratou i karanga ai “e kai tatou, e e inu oki; apopo oki tatou e mate ei.” (1 Korinetia 15:32) Inara kare ainei teia tu oraanga e te āriki ra tatou i te mea mii o te mate. Kare e roa atu ana—me na roto tatou i tetai oraanga mamae—penei ka ui koe, ‘Ko teia ua ainei te oraanga?’ Ka aere tatou kiea no te pauanga?
E manganui te irinaki nei i te kite taieni. Kua riro te kite taieni e te tua o te vairakau ei akaroa atu i te oraanga. E te angaanga pakari nei te aronga taieni no te akaroa atu i te oraanga. Noatu ta ratou tauta anga, te vaira te uianga: Eaa tatou i ruaine ei e i mate ei? Te vaira ainei te manakonakoanga e ka takoreia to tatou enemi, ko te mate? Ka akara matatio teia au atikara i teia au manako e ka pau i te uianga, Ko teia ua ainei te oraanga?