Akameitaki te Atua i te Aronga Tei Akarongo
Karanga te peroveta ko Mose me akarongo tatou i ta te Atua akauenga, ka akameitaki te Atua ia tatou. (Deuteronomi 10:13; 11:27) Kare tatou e akarongo i te Atua no te mea ka akautungaia tatou. Ka akakeu tona au tu ia tatou kia akarongo no to tatou inangaro iaia e te kopae i te rave i te kino. “Teia oki te inangaro i te Atua, ko te akono i tana au akauenga.”—1 Ioane 5:3.
Inara akapeea tatou me akameitakiia me akarongo ki te Atua? E rua ravenga.
1. AKARONGO KI TE ATUA KA PAKARI TATOU
“Ko au toou Atua ra ko Iehova, ko tei akakite ia koe i te mea e puapingaʼi koe na; ko tei arataki ia koe na te arataa e tau ei kia aere koe ra.”—ISAIA 48:17.
Ko Tei Anga ia tatou ko Iehova, kite aia ia tatou e kua oronga mai i tana aratakianga. Me inangaro tatou kia puapingaia mei tana apiianga, ka apii tatou i te Tuatua Tapu a te Atua e te taangaanga i te reira.
2. E AKARONGO KA MATAORA TATOU
“Ko tei akarongo i te tuatua a te Atua e kua akono atura, ko ratou tei meitaki roa.”—LUKA 11:28.
I teia tuatau, mataora te mirioni tangata tei akarongo i te Tuatua a te Atua. Akamanako ana i tetai tangata i Paniora e aka riri tona e te takinokino i tetai—e tana vaine. I tetai rā tatau aia i te tataanga a te peroveta ko Mose no te tu maru o Iosepha, te tamaiti a Iakoba. Kua okoia a Iosepha ei tuikaa e kua titiriia ki roto i te are auri; kua vai maru aia, ‘au, e te akakore i te ara a tetai. (Genese, pene 37-45) Karanga te tangata Paniora: “Akamaroiroi mai to Iosepha akaraanga iaku, kia akaari i te tu maru, takinga meitaki, e te akono meitaki. Tei tupu, mataora au.”
Oronga mai te au Tuatua Tapu i te au akauenga akapeea me akono i tetai e tetai. Ka uriuri tatou i teia i te atikara ka aru mai.
