Kite Tatou i te Atua Mei Tana au Peroveta
I mua ana, kua oronga te Atua i tana karere puapinga ki te au peroveta no te tangata. Akaari mai ainei teia au karere e ka akameitakiia tatou e te Atua? Ae. Ka apii tatou mei te au peroveta tiratiratu e toru.
ABERAHAMA
E Atua akaperepere e te akameitaki i te tangata.
Taputou te Atua ki te peroveta ko Aberahama e “ei ia koe e meitaki ei te au kopu-tangata katoa o te ao nei.”—Genese 12:3.
Eaa te apiianga? Akaperepere maata te Atua ia tatou e te inangaro ra i te akameitaki i te au kopu ravarai—te au tane, au vaine, e te au tamariki—tei akarongo kiaia.
MOSE
E Atua aroa ua e te akameitaki i te aronga inangaro iaia.
Oronga te Mana Katoatoa i te mana ki te peroveta ko Mose kia rave i te au temeio. Kua pure a Mose: “E akakite mai koe kiaku i toou aerenga, e kia kite au ia koe, kia kite aroaia au e koe ra.” (Exodo 33:13) Mareka iora te Atua i ta Mose patianga e kua akameitaki iaia kia kite e kia mārama i Tona aerenga e tona au tu. Ei akaraanga, kua kite a Mose i Tei Anga, koia te “Atua takinga-meitaki, e te aroa ua.”—Exodo 34:6, 7.
Eaa te apiianga? Inangaro te Atua te akameitaki ia tatou katoatoa—te tane, vaine, e te tamariki—me aruaru tatou i te apii kia kite iaia. Akakite maira Aia i roto i tana Tuatua Tapu, akapeea tatou me akamori iaia e te anoano maira aia i te akameitaki ia tatou.
IESU
Akaora aroa ua a Iesu i te tangata mei te au tu maki
Ka rekareka tatou i ta te Atua akameitakianga me apii tatou i to Iesu oraanga.
Te akakite maira te Tuatua a te Atua i to Iesu oraanga e tana au apiianga. Oronga te Atua i te mana kia Iesu kia rave i te au temeio, akaora i te aronga matapo, te turi, e te pirikoki. Kua akaora mai aia i tei mate. Akaari mai a Iesu i te au mea meitaki ka rave te Atua no te tangata a te tuatau ki mua. Akakite mai aia akapeea tatou e kite ei i teia akameitakianga: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.”—Ioane 17:3.
E tangata aroa a Iesu, maru e te takinga meitaki. Akavaitata mai te au tane, te au vaine, te mapu e te ruaine kiaia: “Kia apiiia kotou e au; te maru nei au, e ngakau akaaka toku, e rauka oki ia kotou te akaangaroianga i to kotou vaerua.” (Mataio 11:29) Tuke ki tetai i tona tuatau tei takinokino i te vaine, kua akaperepere a Iesu e te takinga meitaki i te au vaine.
Eaa te apiianga? Akaperepere atura a Iesu i te tangata, akaari mai aia akapeea tatou me akono i tetai e tetai.
KARE A IESU I TE ATUA
Apii te Tuatua Tapu e “kareka ia tatou nei, okotai rava ïa Atua” e ko Iesu Mesia te tavini akaaka. (1 Korinetia 8:6) Taka meitaki ta Iesu tuatua e maata oki te Atua iaia e kua tono mai iaia ki te enua nei.—Ioane 11:41, 42; 14:28. *
^ para. 17 No tetai akakiteanga maata atu no Iesu Mesia, akara i te tuanga 8 e te 9 o te poroutia reo Papaa Real Faith—Your Key to a Happy Life ka rauka i te kopi mai mei te www.pr418.com.
