Ka rauka ainei ia koe i te akamanako i te oraanga i te enua nei ma te kore e ra? Oronga mai te ra i te au mea anoanoia ki te tumu rakau kia nionio te rau, puera te tiare, uua te rakau ma te au ua tukeke. Ka ngote te tumu rakau i te vai mei te one, na roto i te au aka e aere ua atu ki te au rau e ki te mareva.

E apinga aroa te ua no ko mai i te Atua, te ka akatupu i te kai i te enua ei kai na tatou. Oronga mai te Atua i te ua mei te au rangi i te tuatau tau, akamerengo ia tatou i te kai e te akarekareka i to tatou ngakau.

Apiapi ana te au metua e kare e rava te kai e te kakau no te ngutuare. Karanga te Tuatua Tapu e: “Ka akara na i te au manu o te reva nei: kare ratou i tanu, kare oki i kokoti, kare oki o ratou are kai; na to kotou Metua i te ao ra i angai ia ratou. Kare aina e meitaki maata to kotou i to ratou?”—Mataio 6:25, 26.

“Ka maara na i te au lili o te enua, te peea nei to ratou tupu; . . . E karanga atu au kia kotou, E tae ua atu ki te manea ope o [te Ariki ko] Solomona, kare rai tona manea i arite i tetai o ratou nei. I pera oki te Atua i te akamanea anga i te rakau rikiriki o te enua . . . ka tanga atu ei oki ia kotou.”—Mataio 6:28-30.

Ka rauka i te Atua i te oronga mai i te kai e te kakau no tatou, papu e ka tauturu mai aia ia tatou i te kimi i te au mea no te oraanga. Me rave tatou i to te Atua anoano, ka akameitaki aia ia tatou kia tanu kai me kore kia kimi angaanga ei oko apinga no tatou.—Mataio 6:32, 33.

E tumu meitaki ta tatou kia akaperepere i te Atua me akamanako ana i te au mea angaia te ra, te ua, te manu e te au tiare. Aru mai ka uriuri tatou akapeea Tei Anga ia tatou me karangaranga ki te tangata.