Manako tetai aronga me kua tauiia ainei te Tuatua tataia a te Atua. Karanga te peroveta ko Isaia, kareka te tuatua a te Atua, “e tu ïa e rimua.” (Isaia 40:8) Akapeea tatou e papu ei e kare te au taputou a te Atua i tauiia?

Tei te Atua te mana i te paruru i tana Tuatua e te arai kia kore e tauiia. I te tuatau taito, me kopiia te reira, ka tare meitaki te aronga kopi karape i te au reta tataki tai, kia kore e kapitiia, e tauiia, e akarukeia tetai manako. Noatu rai, e apa ua te tangata, ka ō mai te tarevake a te aronga kopi.

Te vaira e tauatini ua atu kopi no te au tataanga taito o te Tuatua Tapu. Me tuke tetai kopi, ka akaaiteia te reira ki te au kopi tei akamouia te tuatua mou.—Ei apii maata atu, akara i te atikara reo Papaa “Has the Bible Been Change or Tampered With?” i runga i te jw.org.

Ei akaraanga, ko te tataanga taito te Dead Sea Scroll, tei kiteaia mai e tetai tangata Arapia i roto i te ana i te pae i te Dead Sea i te 1947. E au tuanga te reira o te Tuatua Tapu tei tataia e 2,000 mataiti akenei. Kua akaaite te aronga kite i teia tataanga taito ki te Tuatua Tapu o teia tuatau. Eaa ta ratou i kite?

Kua āū te au karere o te Tuatua a te Atua o teia tuatau ki te au tataanga o mua ana. * Akapapu mai teia tataanga taito i ta tatou e tatau ra i roto i te Tuatua Tapu, e karere mou na te Atua. Kua papu ia tatou e kua paruru meitaki te Atua i tana Tataanga Tapu no tatou i teia tuatau.

Ka tatau i reira tatou i te Tuatua a te Atua ma te irinaki papu e mea mou. Aru mai, ka apii tatou i te Atua mei tana au peroveta.